ބިންވެރިޔާ ސްކީމުގެ ލިސްޓުގެ ބޭރުން ހުޅުމާލޭން ގޯތިތަކެއް ދޫކުރި މައްސަލަ ފުލުހުން ބަލަނީ

ބިންވެރިޔާ ސްކީމުގެ ބޭރުން ހުޅުމާލެ އިން ގޯތިތަކެއް ދޫކުރި މައްސަލައެއް ފެންމަތިވެ، އެ މައްސަލަ ފުލުހުން ބަލަން ފަށައިފި އެވެ.

މިކަން ފަޅާއެރީ ބިންވެރިޔާ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެ އިން ގޯތިތަކެއް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދޫކޮށްފައި ވަނިކޮށް، އޭގެ ތެރެއިން ދެ ބިމެއްގެ އިންފާރު ރޭނުމުގެ ހުއްދަ އަށް ހައުސިން މިނިސްޓްރީގައި އެދުމުންނެވެ. އެކަމަކު، އެއީ އެ ސްކީމުގެ ދަށުން ދޫކުރި ގޯތިތަކެއް ނޫން ކަމަށް މިނިސްޓްރީން ވަނީ އެޗްޑީސީއަށް އަންގައިފަ އެވެ.

ސޯޝަލް މީޑިއާގައި އާންމުވެފައިވާ ސިޓީގައިވާ ގޮތުން ގޯތީގައި ފާރު ރޭނުމުގެ ހުއްދަ އަށް އެދިފައިވަނީ އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދާއި އަބްދުލްމަޖީދު މާހިރު ކިޔާ ދިއްދޫ މީހަކަށެވެ.

މި ބިންތަކުގައި ފާރު ރޭނުމުގެ ހުއްދަ އަށް އެޗްޑީސީން އެދުނީ މިދިޔަ ޖުލައި މަހު އެވެ. ނަމަވެސް ހައުސިން މިނިސްޓްރީގެ ސިޓީގައިވާ ގޮތުން އެ ދެ ފަރާތަކީ ބިންވެރިޔާ ސްކީމްގެ ދަށުން ގޯއްޗަށް އެދުނު ފަރާތްތަކެއް ނޫނެވެ.

އެނގިފައިވާ ގޮތުގައި އިތުރު ގޯތިތަކަކާ ގުޅޭގޮތުން ވެސް މިފަދަ މައްސަލަތަކެއް ވަނީ ފެންމަތިވެފަ އެވެ. އެހެންވެ، ފުލުހުން އެ މައްސަލަ ތަހުގީގު ކުރަން ފަށާފައިވާ ކަން "މިހާރު" އަށް އެނގިފައި ވެ އެވެ.