އިހުތިޖާޖުގައި ބައިވެރިނުވާ ޓެކްސީތައް ވެސް ޓޯކުރި: ޑްރައިވަރުން

އިހުތިޖާޖުގައި ބައިވެރިވި ކަމަށް ބުނެ ފުލުހުން ޓޯކުރި ބައެއް ޓެކްސީތަކުގެ ތެރޭގައި އެ އެއްވުމުގައި ބައިވެރި ނުވާ ޓެކްސީތައް ވެސް ހިމެނޭ ކަމަށް ޑްރައިވާސް އެސޯސިއޭޝަން އޮފް މޯލްޑިވްސް އިން އިއްޔެ ބުނެފި އެވެ.

އެ ޖަމިއްޔާއިން ނެރުނު ބަޔާނެއްގައި ބުނީ ސަރުކާރުން ފަށަން އުޅޭ ޓެކްސީ ލައިނާ ދެކޮޅަށް ހުޅުމާލޭގައި މިދިޔަ ބުދަ ދުވަހުގެ ރޭ ބޭއްވީ ސުލްހަވެރި އިހުތިޖާޖެއް ކަމަށެވެ. އެ އިހުތިޖާޖުގައި ހުޅުމާލެއިން ހައިވޭއަށް އަރާ މަގު ޓެކްސީ ޑްރައިވަރުން ބްލޮކް ކުރި ކަމަށް ފުލުހުން ބުންޏަސް، އެއީ އެކަން ހިނގައިދިޔަ ގޮތް ނޫން ކަމަށް އެ ޖަމިއްޔާއިން ބުންޏެވެ.

"އިހުތިޖާޖު ނިންމާލުމަށް ފަހު ޓެކްސީ ޑްރައިވަރުން ގެއަށް އަދި ދަތުރުކުރަން ދިޔަ މަގުމަތީގައި ފުލުހުން އަމަލުކޮށްފައިވާ ގޮތުން ހައިވޭއާ ދިމާލުން ވަނީ ޓްރެފިކް ވަރަށް ބޮޑަށް ބާރުބޮޑުވެގެން ގޮސްފަ އެވެ،" އެ ބަޔާނުގައި ބުންޏެވެ.

ބަޔާނުގައި މިހެން ބުންޏަސް ޑްރައިވަރުން އިހުތިޖާޖުކުރީ ހުޅުމާލެއިން ހައިވޭއަށް އަރާ މަގުގެ މެދުގައި ކާރުތައް އެއް ލައިނަކަށް މަޑުކޮށްގެން ތިބެ އެވެ. ޑްރައިވަރުން ވެސް ތިބީ ކާރުން ފައިބައިގެންނެވެ. އެހެންވެ، އެ ރޭ އެ މަގު ވަރަށް ބޮޑަށް ތޮއްޖެހި، އާންމު ދަތުރުފަތުރަށް ބުރޫއެރި އެވެ.

ޑްރައިވަރުންގެ ޖަމިއްޔާއިން ބުނި ގޮތުގައި، ފުލުހުން ތުހުމަތުކުރާ ގޮތަށް، އާންމުންނަށް ދަތިވާ ގޮތަށް މަގުތައް ބަންދުކުރުމަކީ އެ ޖަމިއްޔާއިން އެއްވެސް ވަރަކަށް ތަރުހީބު ދޭނެ ކަމެއް ނޫނެވެ. އަދި އެ ކަހަލަ ކަމެއް އެ ދުވަހު ބޭއްވި އިހުތިޖާޖުގައި ހިނގާފައި ނުވާ ކަމަށް އެ ޖަމިއްޔާގެ ބަޔާނުގައި ބުނެފައިވެ އެވެ.

ޓެކްސީ ޑްރައިވަރުން ތަމްސީލުކުރާ އެ ޖަމިއްޔާއިން ބުނީ އިހުތިޖާޖުގައި ބައިވެރިވި ޑްރައިވަރުންނާއި އިހުތިޖާޖުހައި ބައިވެރި ނުވާ ގިނަ އަދަދެއްގެ ޓެކްސީތައް ވެސް ޓޯކުރުމުގެ ސަބަބުން ޑްރައިވަރުންނަށް ބޮޑެތި ގެއްލުންތަކެއް ލިބެމުންދާ ކަމަށެވެ. އެކަމަކު ފުލުހުން ޓޯކުރީ އިހްތިޖާޖްގައި ބައިވެރިނުވާ ކިތައް ޓެކްސީ ކަމެއް ބަޔާނުގައި ނުބުނެ އެވެ.

ބައެއް ޓެކްސީތައް ހިފެހެއްޓި ސަބަބުން ވެސް ފުލުހުން އަދިވެސް ޑްރައިވަރުން އަންގާފައި ނުވާ ކަމަށް އެ ޖަމިއްޔާއިން ބުންޏެވެ.

ހުޅުމާލޭގައި ބޭއްވި މުޒާހަރާއިން ފުލުހުން ވަނީ 22 ޓެކްސީ ޓޯކޮށްފަ އެވެ. އަދި ފުލުހުންގެ އަމުރަށް ތަބާނުވި ކަމަށް ބުނެ ހަތަރު މީހަކު ހައްޔަރުކުރި އެވެ. އެތަނުން ދެ މީހަކު ފަސް ދުވަހަށް ބަންދުކޮށް އެކަކު ޝަރުތުކޮށްފައި ގެއަށް ދޫކޮށްލި އެވެ. އަދި، ހަތަރު ވަނަ މީހާ ހައްޔަރުކުރީ، ކޯޓު އަމުރެއްގެ ދަށުން މިދިޔަ ހޮނިހިރު ދުވަހު އެވެ.

އެއްގަމު ދަތުރުފަތުރުގެ ގާނޫނު އޮންނަ ގޮތުން ފުލުހުން ޓޯކުރާ ވެހިކަލްތައް ގިނަވެގެން 30 ދުވަހަށް ހިފެހެއްޓުމުގެ ބާރު އެ އިދާރާއަށް އޮވެ އެވެ.

ޓެކްސީ ޑްރައިވަރުން އިހުތިޖާޖުކުރީ ސަރުކާރުން ޓެކްސީ ލައިނެއް ތައާރަފުކުރަން އުޅޭތީ އެކަމާ ދެކޮޅަށެވެ. ނަމަވެސް، ސަރުކާރުގެ ޓެކްސީ ލައިނާ ގުޅޭ އެއްވެސް މަސައްކަތެއް އަދި ނުފަށާ ކަމަށް ޓްރާންސްޕޯޓް މިނިސްޓްރީން ވަނީ ބުނެފަ އެވެ.