ދަތުރުފަތުރަށް ހުރަސް އެޅި އިތުރު ޓެކްސީ ޑްރައިވަރަކު ހައްޔަރުކޮށްފި

ޓެކްސީ ޑްރައިވަރުން ހުޅުމާލޭގައި މިދިޔަ ބުދަ ދުވަހުގެ ރޭ ބޭއްވި އިހުތިޖާޖުގައި ޓެކްސީތަކުން މަގު ބްލޮކްކޮށް، އާންމު ދަތުރުފަތުރަށް ހުރަސް އެޅި ކަމަށް ބުނާ މައްސަލާގައި އިތުރު ޓެކްސީ ޑްރައިވަރަކު ރޭ ހައްޔަރުކޮށްފި އެވެ.

ފުލުހުން މިއަދު ބުނީ ކޯޓު އަމުރެއްގެ ދަށުން މި ފަހަރު ހައްޔަރުކުރީ މއ. ނަހީދީމަންޒިލް، މިސްބާހު ޝަރީފު، 31 ކަމަށެވެ.

ޑްރައިވާސް އެސޯސިއޭޝަންގެ އިންތިޒާމް ސެކްރެޓަރީގެ މަގާމު ވެސް ފުރަމުން އަންނަ މިސްބާހު ހައްޔަރުކުރީ ޓެކްސީތަކުން މަގު ބްލޮކްކޮށް، އާންމު ދަތުރުފަތުރަށް ހުރަސް އަޅައި، އެ އިހުތިޖާޖުގައި ފުލުހުންގެ ދައުރު އަދާކުރުމަށް ހުރަސް އެޅުމުން ކަމަށް ފުލުހުން ބުންޏެވެ.

އާންމު ދަތުރުފަތުރަށް ހުރަސްއަޅައި މަގު ބްލޮކްކުރި މައްސަލާގައި ފުލުހުންގެ ބަންދުގައި މިހާރު ވެސް ދެ ޑްރައިވަރަކު އެބަތިއްބެވެ. އެއީ މއ. ވިރާހު، މުހައްމަދު ޝާމިން، 39 އާއި ލ. ދަނބިދޫ ސަންރޭ، އަހުމަދު ޝަބީން، 33 އެވެ. އެ ދެ މީހުން ތަހުގީގުގެ ބޭނުމަށް ފަސް ދުވަހުގެ މުއްދަތަށް ފުލުހުންގެ ބަންދުގައި ބައިތިއްބަން މިދިޔަ ބުރާސްފަތި ދުވަހު ދަށު ކޯޓުން ވަނީ ހުއްދަ ދީފަ އެވެ. އެކަމަކު، އެ މީހުން ބަންދުކުރި މައްސަލަ މިހާރު ވަނީ ހައި ކޯޓުގައި އިސްތިއުނާފުކޮށްފަ އެވެ.

ޝާމިން އާއި ޝަބީންއާ އެކު، އެހެން ޓެކްސީ ޑްރައިވަރަކު ވެސް މަގު ބްލޮކް ކުރި މައްސަލާގައި މިދިޔަ ބުދަ ދުވަހުގެ ރޭ ފުލުހުން ހައްޔަރުކުރި އެވެ. އެއީ ހދ. ކުމުންދޫ ހޮލިޑޭވިލެޖް، ނުއުމާން، 36 އެވެ. އެކަމަކު ކޯޓުން ވަނީ ޝަރުތުތަކާ އެކު، އޭނާ ދޫކޮށްލައިފަ އެވެ.

ހުޅުމާލެ އިން ސިނަމާލެ ބްރިޖުގެ ހައިވޭ އަށް އަރާ މަގުގައި ޓެކްސީތައް މަޑުކޮށްގެން އެހެން ދުއްވާ އެއްޗިއްސަށް ދަތިވާ ގޮތަށް ތިބެ އިހުތިޖާޖުކުރި މައްސަލާގައި 22 ޓެކްސީއެއް ވެސް ވަނީ 30 ދުވަހުގެ މުއްދަތަށް ބުދަ ދުވަހުގެ ރެ އިން ފެށިގެން ޓޯކޮށްފަ އެވެ. އެ ޑްރައިވަރުން އިހުތިޖާޖުކުރީ ހައިވޭ އަރާ މަގުގެ މެދުގައި ކާރުތައް އެއް ލައިނަކަށް މަޑުކޮށްގެން ތިބެ އެވެ. ޑްރައިވަރުން ވެސް ތިބީ ކާރުން ފައިބައިގެންނެވެ. އެހެންވެ، އެ ރޭ އެ މަގު ވަރަށް ބޮޑަށް ތޮއްޖެހި، އާންމު ދަތުރުފަތުރަށް ބުރޫއެރި އެވެ.

ޓެކްސީ ޑްރައިވަރުން އިހުތިޖާޖުކުރީ ސަރުކާރުން ޓެކްސީ ލައިނެއް ތައާރަފުކުރަން އުޅޭތީ އެކަމާ ދެކޮޅަށެވެ. ނަމަވެސް، ސަރުކާރުގެ ޓެކްސީ ލައިނާ ގުޅޭ އެއްވެސް މަސައްކަތެއް އަދި ނުފަށާ ކަމަށް ޓްރާންސްޕޯޓް މިނިސްޓްރީން ވަނީ ބުނެފަ އެވެ.

ޓެކްސީ ޑްރައިވަރުން ބުނާ ގޮތުގައި، ސަރުކާރުން މި ހިދުމަތުގެ ތެރެއަށް ވަނުމުން އެކަމުގެ ގެއްލުން ޑްރައިވަރުންގެ އިތުރުން ޓެކްސީ ސެންޓަރުތަކާއި ގަރާޖުތަކަށް ވެސް ކުރާނެ އެވެ. ޑްރައިވަރުން މި ވަގުތު ތިބީ ޓެކްސީ ފްލީޓާ އެކު، އެ މީހުންގެ މުސްތަގުބަލަށް ވާނެ ގޮތަކާ މެދު ސުވާލު އުފެދިފައި ކަމަށް ވެސް އެ މީހުން ބުނެ އެވެ.

ރައްޔިތުންގެ މަޖިލީހުގެ އިގުތިސާދީ ކޮމިޓީގައި ޓްރާންސްޕޯޓް މިނިސްޓަރު މުހައްމަދު އަމީން މިދިޔަ އޮކްޓޯބަރު މަހުގެ 29 ވަނަ ދުވަހު ވިދާޅުވެފައި ވަނީ، ޓެކްސީ ހިދުމަތުގެ ތެރެއަށް ސަރުކާރުން ވަދެ، އުސޫލުތަކާއި ގާނޫނުތަކެއް ހަދައިގެން ކޮންޓްރޯލް ނަގަން ޖެހޭ ކަމަށެވެ. އެކަން ނުކޮށްފި ނަމަ ވެހިކަލްތަކުން މާލެ "ބަންޑުންވާ" ހިސާބަށް ދާނެ ކަމަށާއި މިހާރު ވެސް ރައްކާތެރިކަން ގެއްލިފައިވާ ކަމަށް މިނިސްޓަރު ވިދާޅުވި އެވެ.

އެކަމަކު އަމީން ވިދާޅުވި ގޮތުގައި، މިހާރަށް ވުރެ ރަނގަޅަށް ޓެކްސީގެ ހިދުމަތް ދިނުމަށް ސަރުކާރު ހިއްސާވާ ކުންފުންޏަކާ ހަވާލުކުރިޔަސް ޓެކްސީ ޑްރައިވަރުންނަށް ގެއްލުން ނުވާނެ އެވެ.