ކަންބޮޑުވުންތަކަށް ހައްލެއް ނުލިބުމުން ޓެކްސީ ޑްރައިވަރުން އަނެއްކާވެސް އިހުތިޖާޖަށް ތައްޔާރުވަނީ!

މާލެ އާއި ހުޅުމާލެއާ ދެމެދު މިހާރަށް ވުރެ ރަނގަޅަށް ޓެކްސީގެ ހިދުމަތް ދިނުމުގެ ބޭނުމުގައި ސަރުކާރުން ޓެކްސީ ފްލީޓެއް ފެށުމަށް ކުރާ މަސައްކަތާ ގުޅިގެން ޓެކްސީ ޑްރައިވަރުންގެ ހުރި ކަންބޮޑުވުންތަކަށް މިހާތަނަށް ހައްލެއް ނުލިބޭތީ، އިހުތިޖާޖަށް ނުކުންނަން ޑްރައިވަރުން ނިންމައިފި އެވެ.

ޑްރައިވާސް އެސޯސިއޭޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޖަމިއްޔާގެ ނައިބު ރައީސް އަހުމަދު ހަބީބް ވިދާޅުވީ، ސަރުކާރުގެ ޓެކްސީ ފްލީޓެއް ހެދުމާ އެކު، ކުރިމަތިވާނެ ގޮންޖެހުންތައް ހުށަހަޅަން ޓްރާންސްޕޯޓް މިނިސްޓްރީގެ އިސްވެރިންނާ އެތައް ފަހަރަކު ބައްދަލު ކޮށްފައިވާ ކަމަށެވެ.

ރައީސް ޑރ. މުހައްމަދު މުއިއްޒާ ބައްދަލުކުރަން ސިޓީއަކުން އެދިފައިވާއިރު، އޭގެ ޖަވާބު ވެސް އަދި ނުލިބޭ ކަމަށް އޭނާ ހަބީބް ވިދާޅުވި އެވެ.

ޓެކްސީ ޑްރައިވަރުން ބުނީ ސަރުކާރުން މި ހިދުމަތުގެ ތެރެއަށް ވަނުމުން އޭގެ ގެއްލުން ޑްރައިވަރުންގެ އިތުރުން ޓެކްސީ ސެންޓަރުތަކާއި ގަރާޖުތަކަށް ވެސް ކުރާނެ ކަމަށެވެ. ޑްރައިވަރުން މިވަގުތު ތިބީ ޓެކްސީ ފްލީޓާ އެކު، އެ މީހުންގެ މުސްތަގުބަލަށް ވާނެ ގޮތަކާ މެދު ސުވާލު އުފެދިފައި ކަމަށް ޖަމިއްޔާ އިން ބުންޏެވެ.

ޑްރައިވަރުންގެ ޖަމިއްޔާގެ މެންބަރު އާދަމް ސަލީމް ބުނީ، ޓެކްސީ ފްލީޓަށް ސަރުކާރުން 320 ކާރު ގެންނަން ނިންމާފައިވާއިރު، އާންމުން އެތެރެ ކޮށްފައިވާ ގިނަ ކާރުތަކެއް ހުރީ ރަޖިސްޓަރީ ނުކޮށް ކަމަށާއި އެއީ ވެސް ބަލައިގަނެވޭނެ ކަމެއް ނޫން ކަމަށެވެ.

ޓެކްސީ ޑްރައިވަރުން ވަނީ ސަރުކާރުގެ ޓެކްސީ ފްލީޓާ ގުޅޭ ގޮތުން މައުލޫމާތު ހޯދުމަށް އާރްޓީއައި ވެސް ހުށަަހަޅައިފަ އެވެ. އާރްޓީއައިގެ މުއްދަތު މިއަދު ހަމަވިއިރު، އޭގެ ޖަވާބު ނުލިބޭ ކަަމަށާއި ޑްރައިވަރުން ތިބީ ދޫ ދޭ ގޮތަކަށް ނޫން ކަމަށް އެ ޖަމިއްޔާ އިން ބުންޏެވެ.

"އަޅުގަނޑުމެންނަށް ނިންމީ ސީދާ ހަރަކާތަށް ނުކުތުމަށް، އެކަމަށް ތާރީހެއް ކަނޑައަޅައި ސީދާ ހަރަކާތުން މި ޖަވާބުތައް ހޯދުމަށް،" ޑްރައިވާސް އެސޯސިއޭޝަންގެ ފަރާތުން ބުންޏެވެ.

އެ ޖަމިއްޔާގެ ނައިބު ރައީސް ހަބީބް ވިދާޅުވީ، މިހާތަނަށް މަސައްކަތް ކުރަމުން އައީ ވަރަށް ސުލްހަވެރިކަމާ އެކު ކަމަށާއި މަގުމައްޗަށް ނުކުންނަން ތައްޔާރު ވާން ޖެހުނީ ކަންބޮޑުވުންތަކަށް ހައްލެއް ނުލިބުމުން ކަމަށެވެ.

އެއްވުން ބާއްވާނެ ދުވަހާއި ގަޑި ވަރަށް އަވަހަށް އިއުލާން ކުރާނެ ކަމަށް ބުންޏެވެ.

ޓެކްސީ ކުރުމުގެ ތެރެއަށް ސަރުކާރުން ވަންނަކަން ރަސްމީކޮށް އިއުލާން ނުކުރިޔަސް ޓްރާންސްޕޯޓް މިނިސްޓްރީން އެކުލަވައިލި "މާލެ ފެހި" ޕްރޮގްރާމްގައި ސަރުކާރުން ޓެކްސީގެ ވިޔަފާރީގެ ތެރެއަށް ވަނުމަށް "ޓެކްސީ ލައިނެއް" ހެދުމަށް ހިމެނުމާ އެކު، މިދިޔަ ޖުލައި މަހު ޑްރައިވަރުންގެ ޖަމިއްޔާ އިން ވަނީ އެ ކަންބޮޑުވުންތައް ރައްޔިތުންގެ މަޖިލިހުގެ ސަމާލުކަމަށް ގެނެސްފަ އެވެ.

އެ މައްސަލައާ ގުޅިގެން މަޖިލިހުގެ ކަމާ ގުޅޭ ކޮމިޓީގައި މިނިސްޓަރު މުހައްމަދު އަމީން ވިދާޅުވީ، އެކަމުގެ ތެރެއަށް ސަރުކާރުން ވަދެ، އުސޫލުތަކާއި ގާނޫނުތަކެއް ހަދައިގެން ކޮންޓްރޯލް ނަގަން ޖެހޭ ކަމަށެވެ. އެކަން ނުކޮށްފި ނަމަ ވެހިކަލްތަކުން މާލެ "ބަންޑުންވާ" ހިސާބަށް ދާނެ ކަމަށާއި މިހާރު ވެސް ރައްކާތެރިކަން ގެއްލިފައިވާ ކަމަށް މިނިސްޓަރު ވިދާޅުވި އެވެ.

އެކަމަކު އަމީން ވިދާޅުވެފައި ވަނީ މިހާރަށް ވުރެ ރަނގަޅަށް ޓެކްސީގެ ހިދުމަތް ދިނުމަށް ސަރުކާރު ހިއްސާވާ ކުންފުންޏަކާ ހަވާލުކުރިޔަސް ޓެކްސީ ޑްރައިވަރުންނަށް ގެއްލުން ނުވާނެ ކަމަށެވެ.