ޓެކްސީ މައްސަލަ ހައްލު ކުރުމުގެ މަސައްކަތުގައި ޑްރައިވަރުންނަށް ގެއްލުމެއް ނުވާނެ: އަމީން

މާލެ އާއި ހުޅުމާލެއާ ދެމެދު މިހާރަށް ވުރެ ރަނގަޅަށް ޓެކްސީގެ ހިދުމަތް ދިނުމަށް ސަރުކާރު ހިއްސާވާ ކުންފުންޏަކާ ހަވާލުކުރަން ޓްރާންސްޕޯޓް މިނިސްޓްރީން ނިންމި ނިންމުމުގެ ސަބަބުން ޑްރައިވަރުންނަށް ގެއްލުން ނުވާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އޭނާ ވިދާޅުވީ، ސަރުކާރުން ޓެކްސީ ލައިނެއް އުފައްދާކަން އަދި އިއުލާން ނުކުރާ ކަމަށެވެ. އެކަމަކު، ޓެކްސީގެ މައްސަލަ އުފަން ވެގެން އުޅެނީ އިއްޔެ ނުވަތަ މިއަދަކު ނޫން ކަމަށާއި އެ މައްސަލާގައި އާންމުންގެ ކަންބޮޑުވުން ވަރަށް ބޮޑު ކަމަށް އޭނާ ވިދާޅުވި އެވެ.

އޭގެ ތެރޭގައި ބޭނުންވާ ގަޑިތަކުގައި ޓެކްސީ ނުލިބުމާއި މާލޭގެ ވަކި ތަންތަނަށް ޓެކްސީ ދަތުރުތައް ނުލިބޭ މައްސަލަ އެބައޮތް ކަމަށް މިނިސްޓަރު ވިދާޅުވި އެވެ.

"ވަރަށް ގިނަ ބޭފުޅުންގެ ކޮންސާން އޮންނަ މައްސަލަތަކެއް، މިއީ އާންމު ފަރާތްތަކުން ޓެކްސީ ހޯދަން ބޭނުންވީމަ ނުލިބޭ މައްސަލަ. މިއީ ސެންސިޓިވް އެނަލައިޒިން ފެންނަ ކަންކަން. މާލެ އިން އެއް ސަރަހައްދުން އަނެއް ސަރަހައްދަށް ދާން [ޓެކްސީ] ނުލިބޭ ކަމަށް، އެކަމަކު [ސިނަމާލެ] ބްރިޖު ހުރަސް ކުރަން އެޕްގައި ޖެހީމާ ޓެކްސީ ލިބޭ ކަމަށް،" މިނިސްޓަރު ވިދާޅުވި އެވެ.

އެކަމަކު އެއްވެސް ހުރަހެއް ނެތި މިއަދާ ހަމައަށް ވެސް ޓެކްސީގެ ވިޔަފާރި ކުރެވޭ ކަމަށް އަމީން ވިދާޅުވި އެވެ.

މިނިސްޓަރު ވިދާޅުވިގޮތުގައި، ޓެކްސީތައް ނުލިބޭ މައްސަލަ ހައްލުކުރުމަށް ދެތިން ހަތަރު ގޮތަކަށް މަސައްކަތް ކުރެވިދާނެ އެވެ.

އޭނާ ވިދާޅުވީ، ޓެކްސީ ޑްރައިވަރުންގެ އެސޯސިއޭޝަންގެ މެމްބަރުން ވެސް އޭނާއާ ބައްދަލުކޮށްފައިވާ ކަަމަށާއި ޑްރައިވަރުންނަށް ގެއްލުން ވާނެ ގޮތަށް އެއްވެސް ކަމެއް ނުކުރާނެ ކަމުގެ ޔަގީންކަން ދެއްވި ކަމަށެވެ.

"ޓެކްސީ ޑްރައިވަރުންގެ އެސޯސިއޭޝަނަށް އެ ދުވަހު ވެސް ދިން ޔަގީން ކަމަކީ އެ މީހުންގެ ހިދުމަތާއި އެ މީހުންނަށް ގެއްލުން ވާނެ އެއްވެސް ގޮތަކަށް ސަރުކާރުން ކަމެއް ނުކުރާނެއޭ. އެކަަމަކު ޓްވިސްޓް ކޮށްގެން މިނިސްޓަރު ދެއްވި ޔަގީންކަން އަނބުރާލީއޭ ކިޔައިގެން [ޑްރައިވަރުން ވާހަކަ ދެއްކީ]. މިނިސްޓަރު ދިން ޔަގީންކަން އަނބުރައެއް ނުލަން. މިއަދު ވެސް މި ދަންނަވަނީ އެ ވިޔަފާރީގައި ތިބި މީހުންނަށް އެއްވެސް ދެރަ ކަމެއް ނުކުރާނަމޭ،" އަމީން ވިދާޅުވި އެވެ.

މިނިސްޓަރު ވިދާޅުވީ، ޓެކްސީ ކުރަނީ އާމްދަނީއެއް ހޯދަން ކަމަށާއި ޑްރައިވަރުންގެ އާމްދަނީ އަށް ގެއްލުން ނުވާނެ ގޮތަށް އެ ނިޒާމު ބައްޓަން ނުކުރެވޭނެ ކަމަށެވެ.

އޭނާ ވިދާޅުވިގޮތުގައި، ޓެކްސީގެ އަގުތައް ކަނޑައަޅާފައިވާއިރު އެ އަގުތަކަށް ބަދަލު ގެނައުމަކީ ކުރެވޭނެ ކަމެއް ނޫނެވެ. އެ ތަނަވަސްކަން އާންމުންގެ ނެތް ކަމަށާއި އަގުތަކަށް ބަދަލުނުކޮށް ޓެކްސީ ސްޓޭންޑާޑް މަތިކުރަންޖެހޭ ކަމަށް ވިދާޅުވި އެވެ. އަދި މާލޭ ސަރަހައްދުގެ އާބާދީއާ އަޅާބަލާއިރު އެ ކެޕޭސިޓީ ނެތް ކަަމަށާއި އެހެންވެ، އެކަމަށް ބޭނުންވާ ވަސީލަތްތައް ހޯދައިދީގެން ހިދުމަތުގެ ފްލީޓަށް ބަދަލު ގެންނަން ޖެހޭ ކަމަށް ވިދާޅުވި އެވެ.

"މިހާރު ޓެކްސީ ކުރާ ބޭފުޅުންނަށް އެއްވެސް ލޮޅުމެއް ނާންނާނެ،" ވަރަށް ޔަގީންކަމާ އެކު އަމީން ވިދާޅުވި އެވެ.

މިނިސްޓަރު ވަނީ މިކަން ސިޔާސީކުރާ މައްސަލާގައި ވަރަށް ބޮޑަށް ނުރުހުން ފާޅުކުރައްވައިފަ އެވެ.

އެކަން ރަސްމީކޮށް އިއުލާން ނުކުރިޔަސް ޓްރާންސްޕޯޓް މިނިސްޓްރީން އެކުލަވައިލި "މާލެ ފެހި" ޕްރޮގްރާމްގައި ސަރުކާރުން ޓެކްސީގެ ވިޔަފާރީގެ ތެރެއަށް ވަނުމަށް "ޓެކްސީ ލައިނެއް" ހެދުމަށް ހިމެނުމާ އެކު، މިދިޔަ ޖުލައި މަހު ޑްރައިވަރުންގެ ޖަމިއްޔާ އިން ވަނީ އެ ކަންބޮޑުވުންތައް ރައްޔިތުންގެ މަޖިލިހުގެ ސަމާލުކަމަށް ގެނެސްފަ އެވެ.

އެ މައްސަލައާ ގުޅިގެން މަޖިލިހުގެ ކަމާ ގުޅޭ ކޮމިޓީގައި މިނިސްޓަރު އަމީން ވިދާޅުވީ، އެކަމުގެ ތެރެއަށް ސަރުކާރުން ވަދެ، އުސޫލުތަކާއި ގާނޫނުތަކެއް ހަދައިގެން ކޮންޓްރޯލް ނަގަން ޖެހޭ ކަމަށެވެ. އެކަން ނުކޮށްފި ނަމަ ވެހިކަލްތަކުން މާލެ "ބަންޑުންވާ" ހިސާބަށް ދާނެ ކަމަށާއި މިހާރު ވެސް ރައްކާތެރިކަން ގެއްލިފައިވާ ކަމަށް މިނިސްޓަރު ވިދާޅުވި އެވެ.