ތަބްލާ ކުޅެން މަޝްހޫރު ޒާކިރު ހުސެއިން މަރުވެއްޖެ

އިންޑިއާގެ މަޝްހޫރު ތަބްލާ މިއުޒިކް ކުޅުންތެރިޔާ ޒާކިރު ހުސެއިން އިއްޔެ މަރުވެއްޖެ އެވެ.

އިންޑިއަން ކްލެސިކް މިއުޒިކް އުފެއްދުމުގައި މަޝްހޫރު ޒާކިރު މަރުވީ ބައްޔަކަށް ފަރުވާކުރަމުން އަންނަނިކޮށް، އެމެރިކާގެ ސެން ފްރެންސިސްކޯގަ އެވެ. މަރުވި އިރު އުމުރަކީ 73 އަހަރެވެ.

ޒާކިރު އާއިލާއިން މިއަދު ނެރުނު ބަޔާނެއްގައި ބުނީ ޒާކިރު މަރުވީ ފުއްޕާމޭގެ ބައްޔެއް ކަމަށްވާ އިޑިއޮޕެތިކް ޕަލްމޮނަރީ ފައިބްރޯސީއަށް ފަރުވާކުރަމުން އަންނަނިކޮށް ކަމަށެވެ.

މިއުޒިކީ ދުނިޔޭގެ އެންމެ ޝަރަފުވެރި އެވޯޑު ކަމަށްވާ ގްރޭމީ އެވޯޑް ހަތަރު ފަހަރެއްގެ މަތިން ޒާކިރަށް ލިބިފައިވެ އެވެ. އަދި އޭނާއަށް ވަނީ އިންޑިއާގެ ސަރުކާރުން ދޭ ދެވަނައަށް އެންމެ މަތީ އިއްޒަތުގެ އިނާމު، ޕަދްމާ ވިބޫޝަން ވެސް ލިބިފަ އެވެ.

ޒާކިރު ވަނީ ތަބްލާ މިއުޒިކް ކުޅެގެން މުޅި ދުނިޔޭގެ މަގުބޫލުކަން ހޯދައިފަ އެވެ.

އިންޑިއާގެ މުމްބާއީއަށް އުފަން ޒާކިރު ތަބްލާ ކުޅެން ދަސްކުރީ އޭނާގެ ބައްޕަ އަދި ތަބްލާ ކުޅުމުގެ މާހިރެއް ކަމަށްވާ އުސްތާދު އައްލާ ރައްކާ ހާން ކައިރިންނެވެ. އޭނާ ފުރަތަމަ ފަހަރަށް ޝޯއެއް ދނީ އުމުރުން އެންމެ ހަތް އަހަރުގަ އެވެ.

ޒާކިރު މަރުވި އިރު، އޭނާގެ އަތްބަނކާއި ދެ ކުދިން ދުނިޔޭގައި އެބަތިއްބެވެ.