މަޓީން އެދިގެން މާލިއްޔަތު ކޮމިޓީ ސިއްރު

ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހެޅި ބޭރު ފައިސާއާ ބެހޭ ބިލާ ގުޅޭ ގޮތުން މަޖިލީހުގެ މާލިއްޔަތު ކޮމިޓީން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާ ބައްދަލު ކުރުމަށް މިއަދު ބޭއްވި ބައްދަލުވުން އެ ޖަމިއްޔާ އިން އެދިގެން ސިއްރުކޮށްފި އެވެ.

ފޮރެކްސް ބިލް ދިރާސާކުރުމުގެ މަސައްކަތް މިއަދުގެ ހަވީރު ހައެއް ޖެހުމުގެ ކުރިން އެ ކޮމިޓީން ނިންމައި މަޖިލީހުގެ ތަޅުމަށް ފޮނުވަން ވަނީ ކަނޑައަޅައިފަ އެވެ.

އަންނަ އާދިއްތަ ދުވަހުން ފެށިގެން ރައްޔިތުންގެ މަޖިލީހުގެ މެމްބަރުން ޗުއްޓީ އަށް ވަޑައިގަތުމުގެ ކުރިން ފޮރެކްސް ބިލް ފާސްކޮށް ދެއްވާނެ ކަމަށް އުންމީދު ކުރައްވާ ކަމަށް ރައީސް ޑރ. މުހައްމަދު މުއިއްޒު ވަނީ މިދިޔަ ހޯމަ ދުވަހު ވިދާޅުވެފަ އެވެ. މަޖިލީހުން ބިލް ފާސްކުރުމާ އެކު، އެ ބިލް ތަސްދީގު ކުރައްވާނެ ކަމަށް ވެސް އެ މަނިކުފާނު ވިދާޅުވެފައި ވެ އެވެ.

ބޭރު ފައިސާއާ ބެހޭ އާ ގަވައިދާ ގުޅިގެން މާލިއްޔަތު ކޮމިޓީން މަޓީއާ ބައްދަލުކުރާ އިރު، އެ ޖަމިއްޔާ އިން ވަނީ ބައެއް ކަންކަމާ ގުޅިގެން ކަންބޮޑުވުން ފާޅުކޮށްފަ އެވެ. މަޓީން ބުނެފައިވަނީ ރާއްޖޭގެ ބޭންކްތަކުން ޑޮލަރު މާރުކުރަން ލާޒިމްކޮށް ހެދި ގަވާއިދު އޮތް ގަތޮތުން ވިޔަފާރިތަކަށް ބޮޑު ގެއްލުމަކާ ކުރިމަތިވެދާނެ ކަމަށާއި ޓޫރިޒަމް ދާއިރާގެ ވިޔަފާރިތަކަށް ހާއްސަ ކޮށްގެން މިފަދަ ފިޔަވަޅެއް އެޅުމަކީ ވަރަށް ބޮޑު ބޭއިންސާފެއް ކަމަށެވެ.

ޓޫރިޒަމް ދާއިރާގައި އެންމެ ފުޅާ ދާއިރާއެއްގައި ވިޔަފާރި ކުރަމުން އަންނަ ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) އާއި ޔުނިވާސަލްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) ވެސް ވަނީ އެގަވައިދު ސަސްޕެންޑް ކޮށްދޭން އެމްއެމްއޭ އަށް އެދިފަ އެވެ.

އެ ގަވާއިދަށް ގާނޫނީ ބާރު ދިނުމުގެ ގޮތުން އެކުލަވައިލި، ބޭރު ފައިސާއާ ބެހޭ ބިލް މަޖިލީހަށް ފޮނުވާފައިވަނީ ޓޫރިޒަމް ދާއިރާ އަށް ވަންނަ ޑޮލަރު ރާއްޖޭގެ ބޭންކުތައް މެދުވެރިކޮށް، މާރުކުރުމުގައި އެ ފަރާތްތަކަށް ދެ އިހުތިޔާރެއް ލިބޭ ގޮތަށެވެ.

އެ ބިލްގައިވާ ގޮތުން ބޭރު ފައިސާގެ އާމްދަނީ ބޭންކު އެކައުންޓަކަށް ޖަމާކުރަންޖެހޭ ފަރާތްތަކުގެ ތެރޭގައި ހިމެނެނީ ޓޫރިޒަމް ދާއިރާގެ ވިޔަފާރިތަކުގެ އިތުރުން މަދުވެގެން 15 މިލިއަން ޑޮލަރު އާމްދަނީ ލިބޭ ފަރާތްތަކަށެވެ.

ބޭރު ފައިސާ އިން ލިބޭ އާމްދަނީން ބައެއް މާރުކުރުމުގައި "ކެޓެގަރީ އޭ" ގައި ހިމެނޭ ރިސޯޓްތަކަށް ލިބޭ އިހުތިޔާރަކީ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރުން ނުވަތަ ކޮންމެ މަހެއްގެ ޖުމްލަ އާމްދަނީގެ 20 ޕަސެންޓް ޑޮލަރު މާރު ކުރުން ކަމަށް ބިލްގައި ވެ އެވެ.

"ކެޓެގަރީ ބީ" ގެ ދަށުން ގެސްޓް ހައުސްތަކުން، ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 ޕަސެންޓު މާރުކުރަން ޖެހޭނެ ކަމަށް ބިލްގައި ކަނޑައަޅާފައި ވެ އެވެ.