ސީރިއާގެ އަސަދު އާއިލާގެ ބައި ގަރުނުވީ ވެރިކަން ނިމުމަކަށް

ސީރިއާގައި މީގެ ބައި ގަރުނަށްވުރެ ކުރިން ވެރިކަން ކުރަން ފެށި ބައަަސް ޕާޓީގެ ވެރިކަން މިހާރު ވެއްޓިފައިވާ ކަމަށް، ސަރުކާރާ ދެކޮޅަށް ހަނގުރާމަކުރަމުން އަންނަ ހަނގުރާމަވެރިންގެ ކޯލިޝަނުން މިއަދު އިއުލާނުކޮށްފި އެވެ.

ބައްޝާރުގެ ވެރިކަމާ ދެކޮޅަށް ހަނގުރާމަކުރާތާ 13 އަހަރު ފަހުން ކުއްލިއަކަށް ހުރިހާ ކަމެއް ބަދަލުވީ މީގެ 10 ދުވަސް ކުރިން ހަނގުރާމަވެރިން ހޯދަން ފެށި ކުރިއެރުންތަކާ އެކުގަ އެވެ. މުހިންމު ސިޓީތައް ހިފަމުން ގޮސް މިއަދު ވެރިރަށް ދިމިޝްގަށް ވަން އިރު ސިފައިން ވަނީ މަގާމުތައް ދޫކޮށް ގޮސްފަ އެވެ. އަދި މީގެ 24 އަހަރު ކުރިން ރައީސްކަމަށް ވަޑައިގެން ހުރިހާ ބާރަކާ އެކު ހުންނެވި ބައްޝާރުލް އަސަދު ގައުމު ދޫކޮށް ވަނީ ވަޑައިގެންފަ އެވެ.

އެއާ އެކު އާންމުން ދަނީ މަގުތަކަށް ނުކުމެ އުފާ ފާޅުކުރަމުންނެވެ.

ސީރިއާ ސަރުކާރާ ދެކޮޅަށް ނުކުތް އިސްލާމިކް ހަޔާތު ތަހްރީރު އަލް ޝާމް (އެޗްޓީއެސް) ޖަމާއަތުން ދެ ހަފްތާ ތެރޭ އެތައް ސިޓީއެއް ހިފުމަށް ފަހު ދިމިޝްގަށް އެރީ ސިފައިންނާ ކުރިމަތިލުމެއް ނުހިނގައި ފަސޭހަކާ އެކުގަ އެވެ.

"ބައަސްގެ ވެރިކަމުގައި 50 އަހަރުގެ އަނިޔާވެރިކަމާއި، 13 އަހަރުގެ ޖަރީމާތަކާއި އަނިޔާވެރިކަމާއި [މަޖުބޫރުކޮށްގެން] ވަޒަނުން ބޭރުކުރުމުގެ އަމަލުތައް ... މި އަނދިރި ޒަމާން ނިމުމަކަށް ގެނެސް، ސީރިއާއަށް އާ ޒަމާނެއް ފެށުން މިއަދު އިއުލާނު ކުރަން،" ޓެލެގްރާމްގައި ހަނގުރާމަވެރިންގެ ފެކްޝަންތަކުން ބުނެފައިވެ އެވެ.

މި ކުއްލި ބަދަލާ އެކު، ބޮޑުވަޒީރު މުހައްމަދު އަލް ޖަލާލީ ވަނީ ސީރިއާގެ ރައްޔިތުން ހޮވާ ކޮންމެ ލީޑަޝިޕަކަށް އެއްބާރުލުން ދޭން ތައްޔާރަށް ހުންނެވި ކަމަށް އިއުލާނުކުރައްވައިފަ އެވެ.

ސީރިއަން އޮބްޒަވޭޓަރީ ފޯ ހިއުމަން ރައިޓްސްގެ ވެރިޔާ ރާމީ އަބްދުއްރަހްމާން އޭއެފްޕީއަށް ވިދާޅުވީ ވެރިކަން ވެއްޓުމާ އެކު ބައްޝާރު ސީރިއާ އިން ފުރާވަޑައިގަތީ ދިމިޝްގު އިންޓަނޭޝަނަލް އެއާޕޯޓުން ކަމަށެވެ. އެހެންވެ ސިފައިން ވަނީ ހަނގުރާމަވެރިން ދިމިޝްގަށް ވަން އިރު އެއާޕޯޓް ވެސް ދޫކޮށްލައިފަ އެވެ.

އެޗްޓީއެސް އިން ބުނީ އެ މީހުންގެ ހަނގުރާމަވެރިން ވެރިރަށުގެ ބޭރުގައި ހުންނަ، އަނިޔާވެރިކަން ބޮޑު "ސައީދަންޔާ" ޖަލު ވެސް ހުޅުވައި ގައިދީން މިނިވަންކޮށްފައިވާ ކަމަށެވެ. މިއީ ސިޔާސީ ކަންކަމުގައި މީހުން ހައްޔަރުކޮށް ބޮޑެތި އަނިޔާދޭ ކަމަށް މަޝްހޫރު ތަނެކެވެ.

ބައްޝާރު ވެރިކަމުގައި ހުންނަވާތާ 24 އަހަރު ވެފައި ވާއިރު މިއީ އޭނާގެ ވެރިކަމުގެ ނިމުމުގެ އިތުރުން ސީރިއާ ކޮންޓްރޯލްކުރަމުން ދިޔަ އަސަދު އާއިލާގެ ވެރިކަން ވެސް ނިމުމެވެ. ބައްޝާރު ވެރިކަމަށް ވަޑައިގަތީ މާޗް 14، 1971 އިން ފެށިގެން ވެރިކަމުގައި ހުންނެވި އޭނާ ބައްޕާފުޅު ހާފިޒުލް އަސަދު 2000 ވަނަ އަހަރު އަވަހާރަވުމުންނެވެ. މިހާރު އުމުރުން 59 އަހަރުގެ ބައްޝާރު ވެރިކަމަށް ގެނައުމަށް، ވެރިކަން ކުރާ މީހެއްގެ އެންމެ ހަގު އުމުރު ސީރިއާގެ ގާނޫނުއަސާސީން އޭރު ވަނީ 40 އިން 34 އަހަރަށް ދަށްކޮށްފަ އެވެ.

ބައްޝާރު އެކަނި އިންތިހާބުގައި ވާދަކުރައްވައި ޖުލައި 10، 2000 ގައި އިންތިހާބުކޮށްފައި ވަނިކޮށް އޭނާއާ ދެކޮޅަށް މުޒާހަރާތައް ފެށީ 2011 ވަނަ އަހަރު އެވެ. މުޒާހަރާތައް ރޫޅާލުމަށް ބާރުގެ ބޭނުންކުރުމާ އެކު އުފެދުނު ދާހިލީ ހަނގުރާމައިގެ ސަބަބުން މިހާތަނަށް 500،000 އަށް ވުރެ ގިނަ މީހުން ސީރިއާގައި ވަނީ މަރުވެފަ އެވެ.