ބައްޝާރުގެ ބައްޕާފުޅުގެ ޒިޔާރަތުގައި ހުޅުޖަހައިފި

ސީރިއާގެ ވެރިކަމުން ދުރުކުރި ބައްޝާރުގެ ބައްޕާފުޅު، ކުރީގެ ރައީސް ހާފިޒުލް އަސަދުގެ ޒިޔާރަތުގައި ހުޅުޖަހައިފި އެވެ.

އޭއެފްޕީން ހޯދާފައިވާ ފުޓޭޖްތަކުން ފެންނަ ގޮތުގައި ހާފިޒްގެ އުފަން ގަރްދާރާގައި ހުންނަ މި ޒިޔާރަތުގައި ހުޅުޖެހި އިރު އެތަނުގައި ތިބީ އަސްކަރީ ހެދުމުގައި ތިބި ހަނގުރާމަވެރިންގެ ބައެކެވެ.

ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން އޭއެފްޕީއަށް ކިޔައިދިން ގޮތުގައި ހަނގުރާމަވެރިން އަލިފާން ރޯކޮށްލާފައިވަނީ އަސަދުގެ އަލަވީ ކޮމިއުނިޓީގެ ބާރުގަދަ ލަޓާކިއާ ހުންނަ ޒިޔާރަތުގަ އެވެ.

އޭއެފްޕީގެ ފުޓޭޖްތަކުން ފެންނަ ގޮތުގައި ޒިޔާރަތުގެ ބައެއް ތަންތަނުގެ އަލިފާން ރޯވެ ހަލާކުވެފައިވާއިރު، ހާފިޒުގެ މަހާނަގައި ވެސް ވަކިން ހުޅުޖަހާފައިވެ އެވެ.

ފަރުބަދައެއްގެ މަތީގައި ހަދާފައިވާ މި ބޮޑު އުސް ބިނާއަކީ ވަރަށް ތަފާތު އާކިޓެކްޗަރަލް ޑިޒައިނަކާ އެކު، އޭގެ ބޭރުގައި ހިލައިން ޒީނަތްތެރިކޮށްފައިވާ ތަނެކެވެ.

ހާފިޒްގެ އިތުރުން، ސީރިއާގެ ވެރިކަން ހަވާލުކުރުމަށް ތައްޔާރުކުރަމުން ގެންދަނިކޮށް 1994 ވަނަ އަހަރު މަގުމަތީގެ އެކްސިޑެންޓެއްގައި އަވަހާރަވި، ބައްޝާރުގެ ކޮއްކޮ ބާސިލް އާއި އާއިލާގެ އެހެން ބައެއް މެމްބަރުންގެ މަހާނަތައް ވެސް އެތަނުގައި ހުރެ އެވެ.

މީގެ 24 އަހަރު ކުރިން ބައްޝާރު ވެރިކަމަށް ވަޑައިގަތީ 2000 ވަނަ އަހަރު ބައްޕާފުޅު ހާފިޒުލް އަސަދު އަވަހާރަވުމުންނެވެ. ހާފިޒު ވަނީ 1971 އިން ފެށިގެން 2000 ވަނަ އަހަރާ ހަމަޔަށް ވެރިކަން ކުރައްވައިފަ އެވެ. ހާފިޒް އަވަހާރަވި އިރު ސީރިއާގެ ގާނޫނުތަކުގައި އޮންނަ ގޮތުން ރައީސްކަން ކުރާ މީހެއްގެ އުމުރުން 40 ފުރިފައި ހުރުން ލާޒިމެވެ. އެކަމަކު އޭރު ބައްޝާރުގެ އުމުރު ހަމަނުވާތީ، އެ އުމުރު 34 އަހަރަށް ދަށްކުރި އެވެ. އަދި އިންތިހާބުގައި ވާދަކުރެއްވީ ވެސް ބައްޝާރު އެކަންޏެވެ.