އެމެކްސްއާ އެކު އޮތީ ކާޑު ޕާޓްރަނަރަކާ އެކު އޮންނަ ގުޅުމަކަށް ވުރެ ބަދަހި ގުޅުމެއް: ޝަރީފު

އެމެރިކަން އެކްސްޕްރެސް (އެމެކްސް) އަކީ އަކީ ބީއެމްއެލްގެ ކުރިއެރުމާއި ކާމިޔާބީގެ މުހިންމު ބައިވެރިއެއް ކަމަށް އެ ބެންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ރޭ ވިދާޅުވެއްޖެ އެވެ.

ބީއެމްއެލް އާއި އެޖު އެމެރިން އެކްސްޕްރެސްގެ އެކްސްކުލޫސިވް ޕާޓްނާޝިޕަށް 20 އަހަރު ފުރުން ފާހަގަކުރުމަށް ބޭއްވި ހަފުލާގައި ޝަރީފު ވިދާޅުވީ އެ ބޭންކާއި އެމެކްސްއާ ދެމެދު އޮންނަ ގުޅުމަކީ ކާޑު ޕާޓްނަރަކާ އެކު އޮންނަ ގުޅުމަކަށް ވުރެ ބަދަހި ގުޅުމެއް ކަމަށެވެ.

"އެ ގުޅުމަކީ ބޭންކެއްގެ ގޮތުގައި އަޅުގަނޑުމެންނަށް ލިބުނު ކުރިއެރުމާއި ކާމިޔާބީގައި ވަރަށް މުހިންމު ދައުރެއް އަދާކޮށްދިން ގުޅުމެއް. އެމެކްސް އަކީ ރާއްޖޭގެ މާލީ ދާއިރާގައި މަސައްކަތް ކުރަމުންދާ އެތައް ބައެއް ބިނާކުރުމަށް ވަރަށް ބޮޑު އެހީތެރިކަމެއް ދިން ފަރާތެއް،" މީގެ 20 އަހަރު ކުރިން ބީއެމްއެލް މެދުވެރިވެގެން ރާއްޖެ އަށް ތައާރަފުކުރި އެމެކްސް ކާޑުގެ ހިދުމަތަށް އިޝާރާތް ކުރައްވަމުން ޝަރީފް ވިދާޅުވި އެވެ.

އޭނާ ވަނީ ދުނިޔޭގެ ފެންވަރުގެ ޕޭމަންޓް ނިޒާމެއް ރާއްޖޭގައި ގާއިމް ކުރުމުގެ ބިންގަލަކީ ވެސް އެމެކްސްގެ ގޮތުގައި ސިފަކުރައްވައިފަ އެވެ.

ޝަރީފަކީ ރާއްޖެ އަށް މުޅިން އަލަށް ކްރެޑިޓް ކާޑު ތައާރަފް ކުރި ދުވަސްވަރު އެ ކަމުގައި އެންމެ އިސްކޮށް ހުންނެވި ބޭފުޅާ އެވެ. އެހެންވެ، އެ ދުވަސްވަރުގެ ގޮންޖެހުންތައް އޭނާ އަށް ވަރަށް ކައިރިން ފެނިވަޑައިގަތެވެ.

ރޭގެ ހަފުލާގައި ޝަރީފު ވިދާޅުވީ، އެ ގޮންޖެހުންތަކާ އެކު ވެސް ބީއެމްއެލްގެ އަމާޒަކަށްވީ ހުއްޓުމެއް ނެތި ކަސްޓަމަރުންނަށް ހިދުމަތް ފޯރުކޮށްދިނުން ކަމަށެވެ.

"އަޅުގަނޑުމެންނަށް އޭރު ދަސްވި ކަމަކީ މި ހިތްވަރުގަދަ މަސައްކަތުން އަޅުގަނޑުމެންގެ ކަސްޓަމަރުންނަށް ބޭންކިން ހިދުމަތް ޒަމާނީ ކޮށްދޭނެ ކަމާއި ވިޔަފާރިތަކާއި ދަތުރުވެރިންނަށް ވެސް ފަސޭހަކަމާއި ރައްކާތެރިކަމާއި އަދި ލުއިފަސޭހަކަން ލިއްބައިދޭނެކަން،"” ބީއެމްއެލްގެ ޑެޕިއުޓީ ސީއީއޯކަން ވެސް ކުރެއްވި އަދި އެ ބޭންކުގެ ފުރަތަމަ ދިވެހި ސީއީއޯ ޝަރީފު ވިދާޅުވި އެވެ.

އޭނާ ވަނީ އެމެކްސްގެ ޓީމުން ބީއެމްއެލްގެ ޓީމަށް ދެމުން އަންނަ އެއްބާރުލުން ވެސް ފާހަގަކުރައްވައިފަ އެވެ. އަދި ފައިސާ ދެއްކުމާއި ބޭންކިންގެ ދުނިޔެ އަށް އަންނަ ބަދަލުތަކާ އެކު އާ އީޖާދުތަކުގެ ކުރީ ސަފުގައި އެމެކްސްއާ އެކު އެ ބޭންކު ދެމިއޮންނާނެ ކަމަށް ވިދާޅުވި އެވެ. ޝަރީފް ވިދާޅުވީ އެމެކްސްއާ އެކު ރާއްޖޭގެ އާ ޖީލުތަކުން ބޭނުންވާ މާލީ ހައްލުތައް ފޯރުކޮށްދިނުމަށް ބީއެމްއެލް އިން މަސައްކަތް ކުރާނެ އެވެ.

އެމެރިކަން އެކްސްޕްރެސްއާ އެކު ބީއެމްއެލް އިން 20 އަހަރުގެ ޕާޓްނާޝިޕުގެ މުހިންމު ކާމިޔާބީތަކާއި ލަނޑުދަތިތައް ހާސިލް ވެފައިވާ ކަމަށް އެ ބޭންކުން ފާހަގަކުރި އެވެ. އޭގެ ތެރެއިން އެއް ކަމަކީ ރާއްޖޭގައި ފުރަތަމަ ކްރެޑިޓް ކާޑުތައް ތައާރަފުކޮށް، ވަކިވަކި ފަރުދުންނާއި ވިޔަފާރިތަކަށް ދުނިޔޭގެ ފެންވަރުގެ މާލީ ހައްލުތަކާ ހިސާބަށް ވާސިލް ވުމުގެ ބާރު ދިނުމެވެ. ބީއެމްއެލްގެ ހިދުމަތް ކުރު މުއްދަތެއްގެ ތެރޭގައި ފުޅާކޮށް ކުދި ފިހާރަތަކުން ފެށިގެން ރިސޯޓުތަކުގައި ވެސް އެ ހިދުމަތް ލިބޭނެ މަގު ވަނީ ފަހި ކޮށްދީފަ އެވެ.

އެ ބެންކުން އެމްކްސްއާ އެކު "އެކްސްޕީރިއަންސް މޯލްޑިވްސް" ޑެސްޓިނޭޝަން މާކެޓިން ކެމްޕޭނެއް ފަށައި ދުނިޔޭގެ އެކި ހިސާބުތަކުން ޓޫރިސްޓުން ގެނައުމަށް ވެސް މަސައްކަތް ކުރި އެވެ.

ބީއެމްއެލްއިން ބުނިގޮތުގައި، އެ ބޭންކުން އެންމެ ފަހުރުވެރިވާ އެއް ކަމަކީ މި އަހަރުގެ ކުރީ ކޮޅު ތައާރަފްކުރި ރާއްޖޭގެ ފުރަތަމަ ޝަރީއާ ހުއްދަ ކުރާ ކްރެޑިޓް ކާޑު އެމެރިކަން އެކްސްޕްރެސްއާ އެކު ތައާރަފުކުރުމެވެ.

ތިން ލައްކައަށް ވުރެ ގިނަ ވުރެ ގިނަ ކަސްޓަމަރުންނާއި 8،000 އަށް ވުރެ ގިނަމާޗެންޓުންނާ އެކު، ބީއެމްއެލް އަކީ ރާއްޖޭގައި އެންމެ ފުޅާދާއިރާއެއްގައި ކާޑު ދޫކުރުމާއި ކާޑުގެ ހިދުމަތް ބަލައިގަންނަ ބޭންކެވެ. ބީއެމްއެލްއަކީ ރާއްޖޭގައި އެމެރިކަން އެކްސްޕްރެސް ހިދުމަތް ދިނުމާއި ހިދުމަތް ބަލައިގަންނަ ހަމައެކަނި ބޭންކު ވެސް މެ އެވެ.