ގަލޮޅު ސަހަރާއިން ބައެއް ގަބުރުތައް ނަގަނީ

ގަލޮޅު ސަހަރާގައި ކުރާ މަސައްކަތަކާ ގުޅިގެން އެ ތަނުގައި ހުރި ބައެއް ގަބުރުތައް ނަގަން ނިންމައިފި އެވެ.

މާލޭ ސިޓީ ކައުންސިލުން އިއްޔެ ކުރި އިއުލާނެއްގައި ބުނީ، ގަލޮޅު ސަހަރާގައި ކުރަމުން އަންނަ މަސައްކަތްތަކާ ގުޅިގެން، އެ ސަހަރާގެ ހުޅަނގު އުތުރު ފަރާތާއި އިރު ދެކުނު ފަރާތުގައި ހުރި މިނި ކަށިތައް ނަގަން ބޭނުންވާތީ، އެ ތަންތަނުގައި ހުރި މަހާނަ ގާތައް ނަގަން ބޭނުންވާ ކަމަށެވެ.

އެ ސަރަހައްދުތަކުގައި ހުރި މަހާނަ ގާތައް ޖަހާފައިވާ މީހުން އެ ގާތައް ނަގައިގެން ގެންދަން ބޭނުންވާ ނަމަ ސިޓީ ކައުންސިލާ ގުޅިގެން މި މަހުގެ 15 ގެ ކުރިން އެ މަސައްކަތް ކުރުމަށް އެ އިއުލާނުގައި ވަނީ ބުނެފަ އެވެ.

އެ މުއްދަތުގައި ނުނަގާ މަހާނަ ގާތައް، ސިޓީ ކައުންސިލްގެ ފަރާތުން ނެގުމަށް ފަހު، ނައްތާލާނެ ކަމަށް އެ އިއުލާނުގައި ވެ އެވެ.

ގަލޮޅު ސަހަރާގައި މީހުން ވަޅުލަނީ ވަރަށް މަދުންނެވެ. އެކަމަކު، އެ ސަހަރާގެ ބިން ވެސް އޮތީ ފުރިފަ އެވެ.

މި މަހާނަ ގާތައް ނަގަނީ ސީދާ ކޮން މަސައްކަތެއް ކުރުމަށް ކަމަށް ސިޓީ ކައުންސިލުން އަދި ނުބުނެ އެވެ.

ސިޓީ ކައުންސިލުން އަންނަނީ މާފަންނު ސަހަރާގެ ހުރިހާ މަހާނަ ގާތަކާއި މިނި ކަށިތައް ނަގައި، އެ ބިން އެއްކޮށް ހުސްކުރުމުގެ މަސައްކަތް ވެސް ކުރަމުންނެވެ. މާފަންނު ސަހަރާ ހުސްކުރަނީ އެތަނުގައި ސަރުކާރުން ޕާކިން ބިލްޑިންއެއް އެޅުމަށެވެ.