އުމްރާއަށް ދާން އެއްކުރި 4،000 ޑޮލަރު ހުރީ ރޯވިތަނުގައި، ސިފައިން ވަދެ ހޯދައިދީފި

އުމްރާއަށް ދާން މާލެ ސިޓީ ކައުންސިލްގެ ދިވެހި މުވައްޒަފަކު އެއްކުރި 4،000 އެއްހާ ޑޮލަރު މިއަދު ރޯވި އިމާރާތުގެ ތެރޭގައި ރައްކާކޮށްފައި ހުއްޓާ ސިފައިން ވަދެ އެ ހޯދައިދީފި އެވެ.

މާލޭގެ ޑެޕިއުޓީ މޭޔަރު އަހުމަދު ނަރީޝް މިކަން ކަށަވަރުކޮށްދެއްވި އެވެ. އެކަމަކު އޭނާ ވިދާޅުވީ ފައިސާގެ އަދަދު އެނގިވަޑައިނުގަންނަވާ ކަމަށެވެ.

އެކަމަކު އެނގިފައިވާ ގޮތުގައި މި މަހު އުމްރާއަށް ދިއުމަށް ތައްޔާރުވެ ފައިސާ ރައްކާކޮށްފައި ހުރީ، އުފަންވާ ކުދިން ރަޖިސްޓްރީކުރުމާއި އާބާދީއާ ބެހޭ މައުލޫމާތު ބަލަހައްޓާ، ވައިޓަލް ރެޖިސްޓްރޭޝަންގައި މަސައްކަތު މީހަކަށް އުޅޭ ފިރިހެނެކެވެ.

އެ މީހާ އެ ޑޮލަރުތައް ބަހައްޓާފައި ހުރީ އޮފީހުގެ ލޮކަރެއްގަ އެވެ. އެއީ ގާތްގަނޑަކަށް 4،000 ޑޮލަރު ކަމަށް ވަނީ އެނގިފަ އެވެ.

އެ ފައިސާތައް ހޯދަން ސިފައިން ވަން އިރު އަލިފާންގަނޑު ކޮންޓްރޯލް ނުވެ ދިޔައީ ފެތުރެމުންނެވެ. އޭރު ވެސް ސިފައިންނާއި ފުލުހުންނާއި ކައުންސިލްގެ ބައެއް މުވައްޒަފުން ވެސް ދިޔައީ އަލިފާންގަނޑު އެ ހިސާބަށް ފެތުރުމުގެ ކުރިން ލިޔެކިޔުންތަކާއި އޮފީހުގެ އެހެން ތަކެތި ވެސް ސަލާމަތްކުރެވޭތޯ މަސައްކަތްކުރަމުންނެވެ.

ހެނދުނު 6:30 ހާއިރު ފުރަތަމަ އަލިފާން ރޯވީ ހައުސިން މިނިސްޓްރީގެ ފުރަތަމަ ފަންގިފިލާގެ ސީލިންގުގައި ކަމަށް ވަނީ ބެލެވިފަ އެވެ. އޭގެ ފަހުން އަލިފާންގަނޑު ބޮޑުވަމުން ގޮސް، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އާއި ސިޓީ ކައުންސިލްގެ އޮފީހަށް ވެސް ބޮޑެތި ގެއްލުންތަކެއް ވަނީ ވެފަ އެވެ.

އަލިފާންގަނޑު ކޮންޓްރޯލްކުރެވުނީ ރޯވިތާ ގާތްގަނޑަކަށް ހަތަރު ގަޑިއިރު ފަހުންނެވެ.