ކާނިވާ ސްޓޭޖު ތަޅާލައި އާ ސްޓޭޖެއް އަޅަނީ

ހެންވޭރުގައި ހުންނަ އަލިމަސް ކާނިވަލުގެ ސްޓޭޖު ތަޅާލައި، އެތަނުގައި އާ ސްޓޭޖެއް އަޅައިދޭނެ ބަޔަކު ހޯދަން މާލޭ ސިޓީ ކައުންސިލުން އިއްޔެ އިއުލާންކޮށްފި އެވެ.

ސިޓީ ކައުންސިލްގެ އިއުލާނުގައި ބުނީ ސްޓޭޖް ތަޅާލުމަށް ފަހު، އެތަނުގައި އާ ސްޓޭޖެއް އަޅައިދިނުމުގެ މަސައްކަތް އަމިއްލަ ތަކެތީގައި ކޮށްދޭނެ ފަރާތެއް ހޯދަން ބޭނުންވާ ކަމަށެވެ. އެހެންވެ، އެ މަސައްކަތްކުރުމަށް ޝައުގުވެރިވާ ފަރާތްތަކުން ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށް ވެސް އެ އިއުލާނުގައި ބުންޏެވެ.

އެ މަސައްކަތްކުރުމަށް ޝައުގުވެރިވާ ފަރާތްތަކުން މި މަހު 16 ގެ ކުރިން ބީލަން ހުށަހަޅަން ޖެހެ އެވެ. ބީލަން ހުޅުވުން ވެސް އޮންނާނީ ހަމަ އެ ދުވަހު، ސިޓީ ކައުންސިލްގެ އިދާރާގަ އެވެ.

ބީލަމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަނި ކަމަށް ސިޓީ ކައުންސިލްގެ އިއުލާނުގައި ބުންޏެވެ.

މި މަސައްކަތާ ހަވާލުވާ ފަރާތުން ކާނިވާގައި މިހާރު ހުރި ސްޓޭޖު ތަޅާލައި ކުނިތައް އުކާލަން ޖެހޭނެ އެވެ. އާ ސްޓޭޖުގެ ކޮންސެޕްޓް ޑިވެލޮޕްކޮށް، އިންޖީނިއަރިންނާއި ޑްރޯވިންގްސް ތައްޔާރުކޮށް ހުއްދަތައް ހޯދަން ވެސް ޖެހޭނީ އެ ފަރާތުންނެވެ. އާ ސްޓޭޖުގެ ސްޓްރަކްޗާ ހަދައި ފިނިޝިންގެ ހުރިހާ މަސައްކަތެއް ވެސް ކުރަން ޖެހޭނެ އެވެ. އަދި އެ ސްޓޭޖުގެ އިލެކްޓްރިކް އަދި ޕްލަމްބިންގެ ހުރިހާ މަސައްކަތެއް ވެސް ކޮށްދޭން ޖެހޭނެ އެވެ.

ކާނިވާ ސަރަހައްދު ޒަމާނީ ފެންވަރަށް ތަރައްގީކުރުމަށް މާލެ ސިޓީ ކައުންސިލުން ނިންމީ މިދިޔަ ޖުލައި މަހު އެވެ. މޭޔަރު އާދަމް އާޒިމް އޭރު ވަނީ ކާނިވާ ސަރަހައްދު ވަރަށް ބޮޑަށް ބާވެ، އެ ސަރަހައްދު ބޭނުންކުރާ މީހުންނަށް އަނިޔާއެއް ވެދާނެ ކަމުގެ ކަންބޮޑުވުން ފާޅުކުރައްވައިފަ އެވެ.

އަލިމަސް ކާނިވަލަކީ މަޖީދިއްޔާ ސްކޫލަށް 75 އަހަރު ފުރުމުގެ މުނާސަބަތުގައި 2004 ވަނަ އަހަރު ސަރުކާރުން ހުޅުވި ތަނެކެވެ. އެ ކާނިވަލުގައި ހުންނަ ސްޓޭޖު މިހާރު ބޭނުންކުރަނީ ސިޔާސީ ހަރަކާތްތަކަށާއި މިއުޒިކް ޝޯތަކަށެވެ.