އެސްއޯޕީތަކަށް އަމަލު ނުކުރާތީ ބުޅާތައް އޮޅުހިޔާ އަށް ގެންދާާކަށް އަދި ނުފެނޭ: މިނިސްޓްރީ

މާލެ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ހެދި "އޮޅުހިޔާ" އަށް ބޭނުންވާ ސްޓޭންޑާޑް އޮޕަރޭޓިން ޕްރޮސީޖާ (އެސްއޯޕީ) ތަކަށް އަމަލުނުކޮށް މި ވަގުތު އެ ތަނަށް ބުޅާތައް ގެންދިއުމަކީ ފެންނަ ކަމެއް ނޫން ކަަމަށް ދިރޭތަކެއްޗާ ބެހޭ މިނިސްޓްރީން މިއަދު ބުނެފި އެވެ.

މާލެ ސަރަަހައްދުގެ މަގުތަކަށް "ވީއްލިގެން" އުޅޭ ބުޅާތަކަށް ހާއްސަކޮށް ހުޅުމާލެ 2 ގައި ހެދި ފެސިލިޓީ އަށް އެ ބުޅާތައް ގެންދަން މާލެ ސިޓީ ކައުންސިލުން ތައްޔާރުވަމުން އައި ނަމަވެސް މިނިސްޓްރީން ނެރުނު ބަޔާނެއްގައި ވަނީ ކަންބޮޑުވުންތަކެއް ހިއްސާ ކޮށްފަ އެވެ.

އެނިމަލް ވެލްފެއާ މިނިސްޓްރީން ބުނީ، އޮޅުހިޔާ އަށް ބުޅާތައް ގެންދިއުމުގައި އަމަލުކުރާނެ ގޮތުގެ އެސްއޯޕީތަކާއި ޕްލޭންތަކާއި ލަފާތައް އެ މިނިސްޓްރީން މާލެ ސިޓީ ކައުންސިލާ ހިއްސާ ކޮށްފައިވީ ނަމަވެސް އެ ކަންކަމަށް މިހާތަނަށް އެއްވެސް ހިޔާލެއް ލިބިފައި ނެތް ކަމަށެވެ.

އެހެންވެ، އެ އެސްއޯޕީތަކަށް އަމަލު ނުކޮށް، އެ ފެސިލިޓީ އަށް ބުޅާތައް މި ވަގުތު ގެންދަން ފަށައިފި ނަމަ ބުޅާތަކުގެ ސިއްހަތަށާއި ދުޅަހެޔޮ ކަމަށް ނުރަނގަޅު އަސަރު ކުރުން އެކަށީގެންވާ ކަމަށް އެނިމަލް ވެލްފެއާ މިނިސްޓްރީން ބުންޏެވެ.

"އަދި އެސްއޯޕީގައި ބަޔާންކޮށްފައިވާ އިންތިޒާމުތައް ހަމަނުޖެހުނަސް އޮޅުހިޔާ އަށް ބުޅާތައް ގެންދިއުމުން ބުޅާތަކަށް އަޅާލުމަށް ބޭނުންވާ މިންގަނޑުތައް ކަށަވަރު ނުވުމުގެ ނުރައްކާ އެބައޮތެވެ،" ބަޔާނުގައި ވެ އެވެ.

ސަރުކާރުން ވަނީ އެ ހާލަތުގައި ދިމާވެދާނެ ކަންކަން އަދި މި ވަގުތު ފުރިހަމަ ނުވާ ކަންކަން ވެސް ފާހަގަކޮށްފަ އެވެ. އެއީ؛

1- އޮޅުހިޔާގައި މަސައްކަތް ކުރާނެ ފަންނީ އެއްވެސް މީހަކު މިހާރު ރަޖިސްޓަރީ ކޮށްފައި ނެތުން. ރާއްޖޭގައި ޖަނަވާރުންނަށް ފަރުވާ ދިނުމުގެ ހިދުމަތް ދޭ ފަރާތްތަކާއި ފަންނީ މަސައްކަތްތެރިން ރެގިއުލޭޓްކޮށް، ޖަނަވާރުންނަށް ފަރުވާ ދިނުމަށް ގެންގުޅޭ ޖެހޭ މިންގަނޑުތައް ހިފަހައްޓަނީ އެނިމަލް ވެލްފެއާ މިނިސްޓްރީން ކަމަށް އެ މިނިސްޓްރީން ފާހަގަކުރި.

2- އަލަށް ގެންދާ ބުޅާތައް ކަރަންޓީން ކުރާނެ ކޮށިތައް އޮޅުހިޔާގައި އަދި ނެތް.

3- ބުޅާތަކުގެ ސާޖަރީތައް ހަދަން ބޭނުންވާ އެކަށީގެންވާ ނިޒާމެއް ނެތް. އެ ނިޒާމު އެނިމަލް ވެލްފެއާ މިނިސްޓްރީން އެކުލަވާލައި ސިޓީ ކައުންސިލާ ހިއްސާ ކޮށްފައިވާ ކަމަށް އެ މިނިސްޓްރީން ބުނި. އޭގެ ތެރޭގައި ކަރަންޓީން ކުރުމާއި ފަރުވާ ދިނުމާއި ނިއުޓާ/ސްޕޭ ކުރުމަށް ތަންތަން ވަނީ ކަނޑައަޅާފައި. އެ ނިޒާމަށް އަމަލު ނުކުރާ ނަމަ އޮޅުހިޔާގެ ރަސްމީ މަސައްކަތްތައް ފެށުމުގެ ކުރިން، ބުޅާތައް ބައިތިއްބާ ސަރަހައްދު އެއްކޮށް ފިއުގިމޭޓްކޮށް، ރަނގަޅަށް ޑިސްއިންފެކްޓް ކުރަން ޖެހޭ. އެ ޕްރޮސެސް ކުރިއަށް ގެންދާއިރު، އެއްވެސް މީހަކު އެ ތަނުގައި ހުރެގެން ނުވާނެ. އަދި ޖަނަވާރުން ވެސް ބައިތިއްބައިގެން ނުވާނެ ކަމަށް މިނިސްޓްރީން ބުނޭ.

4- އޮޅުހިޔާގައި އުފެދޭ ނުރައްކާތެރި ބަޔޮލޮޖިކަލް ވޭސްޓް ނައްތާލާނެ ނިޒާމެއް އަދި ނެތް.

5- ބުޅާތަކަށް އެކަށީގެންވާ ކާނާ އާއި ފެން ފޯރުކޮށްދޭނެ ނިޒާމެއް ވެސް އަދި ނެތް. ކެޓް ލިޓާ ވެސް ނެތް.

6- ބުޅާތަކަށް އަޅާލާނެ މުވައްޒަފެއް ނެތް.

7- ބޭސް ހޯދާނެ ނިޒާމެއް ނެތް. އެހެންވެ މުވައްޒަފުން ހަމަޖެހުނަސް ބުޅާތަކަށް ބޭސް ދެވޭނެ ނިޒާމެއް އަދި ނެތް.

8- އޮޅުހިޔާގެ މަސައްކަތް ހަރުދަނާ ކުރުމަށްޓަކައި ސްޓްރަކްޗަރަލް ބަދަލުތައް ގެންނަން ސިޓީ ކައުންސިލަށް ހުށަހަޅާފައިވާނެ ކަމަށް މިނިސްޓްރީން ބުނި. އެކަމަކު އެ ކަންކަން އަދި ރަނގަޅެއް ނުކުރެވޭ ކަމަށް އެނިމަލް ވެލްފެއާ މިނިސްޓްރީން ބުނޭ.

އެ މިނިސްޓްރީން ބުނީ، އޮޅުހިޔާގެ ހިދުމަތް ފެށުމުގެ ކުރިން އެ ކަންކަން ރަނގަޅު ކުރަންޖެހޭ ކަމަށެވެ.

"މިނިސްޓްރީން ވަނީ އަޕްޑޭޓްތައް ހޯދުމަށާއި މި މައްސަލަތައް ހައްލު ކުރުމަށް މާލެ ސިޓީ ކައުންސިލްގައި އެދިފަ އެވެ. ނަމަވެސް މިހާތަނަށް މިކަން ކުރެވިފައެއް ނުވެ އެވެ. އެހެންކަމުން މަތީގައި ބަޔާންކުރެވުނު ކަންކަން ފުރިހަމަ ނުކޮށް އޮޅުހިޔާ އަށް ބުޅާތައް ނުގެންދިއުމަށް ސިޓީ ކައުންސިލަށް އިލްތިމާސް ކުރަމެވެ،" އެނިމަލް ވެލްފެއާ މިނިސްޓްރީން ބުންޏެވެ.

މިދިޔަ މަހުގެ ދެ ވަނަ ދުވަހު ބުޅާ ފެސިލިޓީ ހުޅުއްވައި ދެއްވީ ރައީސް ޑރ. މުހައްމަދު މުއިއްޒެވެ. އެ މަނިކުފާނުގެ އެދިވަޑައިގަތުމަކަށް މާލެ ސިޓީ ކައުންސިލަށް އެޗްޑީސީން ދޫކުރި 5،000 އަކަފޫޓުގެ ބިމެއްގައި ހެދި ތަނެއް ކަމަށް ސަރުކާރުން ވަނީ ބުނެފަ އެވެ.

ބުޅާތައް ކަރަންޓީނު ކުރެވޭ ސަރަހައްދަކާއި ކްލިނިކަކާއި ލެބޯޓްރީއެއް ވެސް އޮޅުހިޔާގައި ވަނީ ގާއިމްކޮށް އެވެ. ބުޅަލަށް ދޭންޖެހޭ ބޭސްތައް ހުންނަ ފާމަސީއަކާއި އެ އެއްޗިއްސަށް ދުވެ އުޅެވޭ ސަރަހައްދެއް ވެސް މިތަނުގައި ހަދާފައިވެ އެވެ.