ބުޅާ ފެސިލިޓީއަށް ބޭނުންވާ ސާމާނު ހޯދަން ރެޕިޑް އިންޖިނިއަރިންއާ ހަވާލުކޮށްފި

މާލޭ ސިޓީ ކައުންސިލާއި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން ހުޅުމާލެ ފަރުކޮޅުފުށީގައި އިމާރާތްކުރާ ބުޅާ ފެސިލިޓީއަށް ބޭނުންވާ ސާމާނު ހޯދަން ހަވާލުކޮށްފި އެވެ.

މިދިޔަ މާޗް މަހު ބިންގާ އެޅި އެ ފެސިލިޓީގައި މިހާރު ކުރަމުންދަނީ ފިނިޝިންގެ މަސައްކަތެވެ.

ސިޓީ ކައުންސިލުން ބުނީ އެތަނަށް ބޭނުންވާ އިކުއިޕްމެންޓާއި މެޓީރިއަލްސް ހޯދަން 210,036.61ރ. އަށް ހަވާލުކުރީ ރެޕިޑް އިންޖިނިއަރިންގް ސޮލިއުޝަން ޕްރައިވެޓް ލިމިޓެޑްއާ ކަމަށެވެ.

ބުޅާ ފެސިލިޓީއަކީ މާލެ ސަރަހައްދުގެ ޕާކްތަކާއި މަގުމައްޗާއި އާންމުން އެހެން ތަންތަނަށް އެއްވެ އުޅޭ ބުޅާތައް ގިނަވެފައިވުމުގެ އިތުރުން އެ ބުޅާތަކަށް ލިބެމުންދާ އަނިޔާތަކާއި ބަލިތަކުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި ސާފު މާހައުލެއް ހޯދައިދިނުމަށް ހުޅުވާ ފެސިލިޓީއެކެވެ.

އެ ފެސިލިޓީ ހެދުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިން ވަނީ ސިޓީ ކައުންސިލަށް ހުޅުމާލޭގެ ދެވަނަ ފިޔަވަހިން 5،000 އަކަފޫޓުގެ ބިމެއް ދީފަ އެވެ. މިނިސްޓްރީން ބުނި ގޮތުގައި އެ ފެސިލިޓީ މެދުވެރިކޮށް، ބުޅާތަކަށް ބޭނުންވާނެ ފުރިހަމަ އަޅާލުން ލިބޭނެ އެވެ.

އޭގެ ތެރޭގައި؛

- ބުޅާތައް ކަރަންޓީން ކުރެވޭ ސަރަހައްދެއް ހުންނާނެ

- ކްލިނިކަކާއި ލެބޯޓްރީއެއް ހުންނާނެ

- ފާމަސީއެއް ހުންނާނެ

- ހިޔާވަހިކަމާއި އެކަށީގެންވާ ސިއްހީ ފަރުވާ ލިބޭނެ

- އެ އެއްޗެހި ދުވެ އުޅޭ ސަރަހައްދެއް އޮންނާނެ