އަނެއްކާވެސް އެމްބާޕޭ ފުރުސަތު ނަގާލުމުން ރެއާލް ބަލިވެއްޖެ

ކިލިޔަން އެމްބާޕޭ އަށް ލިބުނު ފުރުސަތު ނަގާލުމުން، އެތުލެޓިކް ބިލްބާއޯ އަތުން ރެއާލް މެޑްރިޑް 2-1 ން ބަލިވެއްޖެ އެވެ.

މެޗުން މޮޅުވެގެން، ބާސެލޯނާ އާ އެއް ޕޮއިންޓަށް ފަރަގު ކުޑަ ކުރަން ރެއާލް އަށް ފުރުސަތު އޮތެވެ. އެކަމަކު މެޗުން ބަލިވުމުން އެ ދެ ޓީމުގެ ދެމެދުގައި އޮތް ޕޮއިންޓްގެ ފަރަގު އަނެއްކާ ވަނީ ބޮޑު ވެފަ އެވެ.

ބާސާގެ ކުރީގެ ކޯޗު އެރްނަސްޓޭ ވަލްވާޑޭ ކޯޗުކޮށްދޭ ބިލްބާއޯއިން ވަނީ ހަތަރުވަނައިގައި ހަމަޖެހިލައިފަ އެވެ. އެކަމަކު އެ ޓީމު މެޗު ކުޅެފައި ވަނީ ފަސްވަނައިގައި އޮތް ވިޔަރެއާލް އަށް ވުރެ ދެ މެޗު އިތުރަށެވެ.

ބިލްބާއޯ އަށް މެޗުގައި ލީޑް ނަގައި ދިނީ އެލްހެންޑްރޯ ބެރެންގޭ އެވެ. އޭނާ ލަނޑު ޖެހީ މެޗުގެ 53 ވަނަ މިނެޓްގަ އެވެ. އޭގެ ފަހުން ނަތީޖާ ހަމަހަމަ ކުރަން ރެއާލް އަށް ޕެނަލްޓީއެއް ލިބުނެވެ.

އެކަމަކު އެމްބާޕޭ އަށް މިފަހަރު ވެސް ޕެނަލްޓީ ވައްދާލެވިފައެއް ނުވެ އެވެ. މިއީ ޕެނަލްޓީ ޖަހަން ލިބުނު ފުރުސަތުގައި އޭނާ އަށް ނާކާމިޔާބުވި ވިދިވިގެން ދެވަނަ ފަހަރެވެ. ޗެމްޕިއަންސް ލީގުގައި މިދިޔަ މަހު ލިވަޕޫލާ ދެކޮޅަށް ކުޅުނު މެޗުގައި ވެސް ރެއާލް އަށް ލިބުނު ޕެނަލްޓީ އެމްބާޕޭ އަށް ވައްދައެއް ނުލެވުނެވެ.

މި ހަފުތާގައި ސެލްޓަ ވީގޯއާ ދެކޮޅަށް ކުޅުނު މެޗުގައި ރެއާލްއަށް ލިބުނު ޕެނަލްޓީ ޖެހީ ޖޫޑެ ބެލިންހަމް އެވެ. އޭނާ ޕެނަލްޓީ ކާމިޔާބު ކުރި އެވެ. ރޭގެ މެޗުގައި އެ ޓީމުގެ ހަމައެކަނި ލަނޑު ޖެހީ ވެސް އޭނާ އެވެ.

މެޗުގެ 78 ވަނަ މިނެޓްގައި ރެއާލް އަށް، އޭނާ ނަތީޖާ ހަމަހަމަކޮށް ދިނެވެ. ނަމަވެސް އޭގެ ދެ މިނެޓް ފަހުން ބިލްބާއޯގެ ގޯކާ ގުރްޒޭޓާ ލަނޑު ޖަހައި އެ ޓީމު މޮޅުކޮށްދިނެވެ.