ނޯޔާގެ ފުރަތަމަ ރަތްކާޑާ އެކު ބަޔާން ކަޓައިފި

ބަޔާން މިއުނިކުގެ ގޯލްކީޕަރު މެނުއަލް ނޯޔާ އޭނާގެ ކެރިއަރުގައި ފުރަތަމަ ފަހަރަށް ރަތްކާޑު ހޯދި މެޗުން ބެޔާ ލެވަކޫސަން އަތުން 1-0 އިން ބަލިވެ ޖަރުމަން ޖަޕުގެ ގަދަ 16 ބުރުން ބަޔާން ކަޓައިފި އެވެ.

ބަޔާނުން ވަނީ ޖަރުމަން ކަޕް ރެކޯޑް 20 ފަހަރު ކާމިޔާބުކޮށްފަ އެވެ. އެކަމަކު 2020 ގެ ފަހުން ކުއާޓާ ފައިނަލް ފަހަނައަޅައި ދެވިފައެއް ނުވެ އެވެ.

މި މުބާރާތުން ކެޓުމާ އެކު ބަޔާނުގެ ކޯޗު ވިންސެންޓް ކޮމްޕެނީ މިވަނީ ފުރަތަމަ އިމްތިހާނުން ފެއިލްވެފަ އެވެ. އެ ޓީމަށް ދެން އޮތީ ޖަރުމަން ލީގާއި، ޗެމްޕިއަންސް ލީގެވެ.

މި މެޗުގައި ބަޔާނުގެ ކެޕްޓަން ނޯޔާ އަށް ރަތްކާޑު ދެއްކީ 18 ވަނަ މިނެޓުގައި އޭނާ އޭރިއާ ދޫކޮށް ކުރިއަށް އެރި ވަގުތު ކުރި ފައުލަކާ ގުޅިގެންނެވެ. ނޯޔާގެ ކެރިއަރުގައި ކުޅުނު 866 މެޗުގެ ތެރޭގައި ފުރަތަމަ ފަހަރަށް ރަތްކާޑެއް ހޯދުމުން ބަދަލުގައި ބަޔާނުން އެރުވީ ޑެނިއަލް ޕެރެޓްޒް އެވެ.

އަނިޔާގެ ސަބަބުން ފޯވާޑް ހެރީ ކޭން ނެތި ކުޅުނު ބަޔާނުން އެކަކު މަދުވިޔަސް ލެވަކޫސަންގެ މައްޗަށް ކޮންޓްރޯލް ހޯދި އެވެ. އެކަމަކު 69 ވަނަ މިނެޓުގައި އެލެކްސް ގްރިމާލްޑޯ ނެގި ހުރަހަކުން ނަތަން ޓެލާ ގޯލު ޖަހައި ލެވަކޫސަން މޮޅުކޮށްދިނެވެ.

މެޗަށް ފަހު ނޯޔާ ބުނީ މެޗުގެ ނަތީޖާ ކަނޑައެޅުނީ އޭނާ ހޯދި ރަތްކާޑުގެ ސަބަބުން ކަމަށާއި އެކަމާ މައާފަށް އެދޭ ކަމަށެވެ.