ބެޔާނުގައި ކަންސެލޯގެ ފުރަތަމަ މެޗުގައި ތަފާތު ދައްކައިފި

މެއިންޒް (ފެބްރުއަރީ 2) - ޕޯޗުގަލްގެ ފުލްބެކް ޔާއޯ ކަންސެލޯ ޖަރުމަންގެ ބެޔާން މިއުނިކަށް ބަދަލުވެ ކުޅުނު ފުރަތަމަ މެޗުގައި އޭނާގެ މޮޅު ކުޅުމާ އެކު ބެޔާނުން 4-0 އިން މެއިންޒް ބަލިކޮށް ޖަރުމަން ކަޕްގެ ކުއާޓާ ފައިނަލަށް ދަތުރުކޮށްފި އެވެ.

މެޗުގެ 17 ވަނަ މިނިޓުގައި ބެޔާނަށް ލީޑު ނަގައިދިނީ އެރިކް މެކްސިމް ޗޮޕޫ މޮޓިން އެވެ. އޭނާ މި ލަނޑު ޖަހައިދިނީ ކަންސެލޯ ނަގައިދިން ހުރަހަކުންނެވެ.

ފުރަތަމަ ހާފު ނިމުމުގެ ކުރިން ޖަމާލް މުސިއާލާ އާއި ލީރޮއީ ސާނޭ ވެސް ވަނީ ބެޔާނަށް އިތުރު ދެ ގޯލު ޖަހައިދީ، ފުރިހަމަ ލީޑެއް ހޯދައިދީފަ އެވެ. މެޗުގެ ފުރިހަމަ ވަގުތު ހަމަވާން ހަތް މިނިޓަށް ވެފައި ވަނިކޮށް ހަތަރު ވަނަ ލަނޑު ޖަހައިދިނީ އަލްފޮންސޯ ޑޭވިސް އެވެ.

ދެ ވަނަ ހާފުގައި މެއިންޒްގެ ކޯޗު ބޯ ސްވެންސަން އަށް ރެފްރީ ވަނީ ސީދާ ރަތް ކާޑެއް ދައްކައި ބެންޗުން ފޮނުވާލައިފަ އެވެ. އަދި ބެޔާނުން ހަތަރު ވަނަ ލަނޑު ޖެހިތާ ތިން މިނިޓު ފަހުން އެ ޓީމުގެ ޑިފެންޑަރު އެލެކްޒެންޑާ ހެކް އަށް ވަނީ ދެވަނަ ރީނދޫ ކާޑަކާ އެކު ރަތް ކާޑެއް ދައްކައިފަ އެވެ.

މިއީ އެންމެ ފަހުން ބެޔާން ކުޅުނު ހަތަރު މެޗުން އެޓީމު ހޯދި ފުރަތަމަ މޮޅެވެ. ވޯލްް ކަޕަށް ފަހު ބެޔާން ކުޅުނު ފުރަތަމަ ތިން މެޗު ނިމުނީ އެއްވަރު ވެގެންނެވެ.

ކަންސެލޯ އަކީ މެންޗެސްޓާ ސިޓީ އަށް ފާއިތުވި ދެ ސީޒަން ގައި ޕްރިމިއާ ލީގު ކާމިޔާބު ކޯށްދިނުމުގައި މުހިއްމު ދައުރެއް އަދާކުރި ކުޅުންތެރިއެކެވެ. ނަމަވެސް މި ސީޒަން ގައި އޭނާ އަށް ކުޅެން ލިބޭ ފުރުސަތު މަދުވުމުގެ ސަބަބުން އޭނާ ހުރީ ޓީމު ދޫކޮށްލަން ބޭނުން ވެފަ އެވެ.

މި ސީޒަންގެ ނިޔަލަށް ކަންސެލޯ ބެޔާނަށް ބަދަލުވީ ލޯނު އުސޫލުންނެވެ. އަދި ބެޔާނުން ބޭނުން ނަމަ ސީޒަން ނިމުމުން 77 މިލިއަން ޑޮލަރަށް އޭނާގެ ކޮންޓްރެކްޓް ދާއިމީ ކުރުމުގެ ފުރުސަތު ވެސް އެބަ އޮތެވެ.

ނިމިދިޔަ ޓްރާންސްފާ ބާޒާރުގައި ބެޔާނުން ހަ މަސްދުވަހުގެ ކޮންޓްރެކްޓެއްގައި ގެނައި ނެދަލެންޑްސްގެ ޑެލީ ބްލިންޑް ވަނީ ދެ ވަނަ ހާފުގައި ކުޅެން ނުކުމެފަ އެވެ.