ބަލިމީހަކަށް ދިން އެހީގެ ތަފުސީލް ހާމަކުރި މައްސަލާގައި އެންސްޕާއިން މާފަށް އެދިއްޖެ

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބަލި މީހަކަށް ފޯރުކޮށްދިން އެހީއާ ގުޅޭ ހުރިހާ ތަފުސީލެއް ހާމަކުރުމުން ފާޑުކިޔުން އަމާޒުވެ، އެންމެ ފަހުން އެ އިދާރާ އިން ރޭ މާފަށް އެދިއްޖެ އެވެ.

ކެންސަރުގެ ބައްޔަށް ފަރުވާ ހޯދާ އާއިލާގެ މެންބަރަކަށް ލިބޭ އެހީއާ މެދު ކަންބޮޑުވެ، ސޯޝަލް މީޑިއާގައި ޕޯސްޓެއް ކުރި މީހަކަށް ރައްދު ދިނުމުގެ ގޮތުން އެންސްޕާ އިން ވަނީ އެ ބަލިމީހާ އަށް މިދިޔަ އަހަރުން ފެށިގެން ދޫކުރި ފައިސާގެ އެހީގެ ހުރިހާ ތަފުސީލެއް އާންމުކޮށްފަ އެވެ.

ބަލިމީހާގެ އާއިލާ މެންބަރު ސޯޝަލް މީޑިއާގައި ދައްކާފައިވަނީ ދޮގު ވާހަކަތަކެއް ކަމަށް ބުނެ ނޫސްބަޔާން ނެރުމުން އެންސްޕާ އަށް އާންމުންގެ ގިނަ ފާޑުކިޔުންތަކެއް އަމާޒުވި އެވެ. އެ ފާޑުކިޔުންތަކާ އެކު އެންސްޕާ އިން މިހާރު ވަނީ އެ ނޫސް ބަޔާން ސޯޝަލް މީޑިއާއިން ޑިލީޓް ކޮށްފަ އެވެ.

އޭގެ ފަހުން އެންސްޕާ އިން ރޭ ނެރުނު ނޫސް ބަޔާނެއްގައި ބުނީ ބަލިމީހާ އަށް ދިން އެހީގެ މައުލޫމާތު އާންމު ކުރެވުމަކީ އެންމެ ރަނގަޅު ގޮތް ނޫން ކަމަށް ގަބޫލުކުރާ ކަމަށާއި އެކަމަށްޓަކައި އެ އެޖެންސީން މާފަށް އެދޭ ކަމަށެވެ.

އެންސްޕާ އިން ވަނީ ސޯޝަލް މީޑިއާގައި ކަންބޮޑުވުން ފާޅުކުރި މީހާއާ ބައްދަލުކޮށް، އެ އާއިލާ އަށް އެ އެޖެންސީން ދެމުން ގެންދާ އެހީއާ ގުޅޭ ތަފުސީލް ދީފަ އެވެ.