އާ ބަދަލާ އެކު، އާބާދީގެ 70 ވަރަކަށް ޕަސެންޓަށް ސަބްސިޑީ ލިބޭނެ: އެންސްޕާ

އަލަށް ގެންނަ ބަދަލުގެ ސަބަބުން 70 ވަރަކަށް ޕަސެންޓު ގޭބިސީ އަށް ސަބްސިޑީ ފޯރުކޮށްދެވޭނެ ކަމަށް އެންސްޕާއިން ބުނެފި އެވެ.

އެ އެޖެންސީގެ ސީއީއޯ ހީނާ ވަލީދު މިދިޔަ ބުރާސްފަތި ދުވަހު "މިހާރު" އަށް ދެއްވި އިންޓަވިއުއެއްގައި ވިދާޅުވީ ފޯރުންތެރިކަން ހުރި މިންވަރަށް ބަލައި އަންނަ އަހަރުގެ އޭޕްރީލް މަހުން ފެށިގެން ސަބްސިޑީ ދޭން ފަށާނެ ކަމަށެވެ.

އާމްދަނީ އާއި ދިރިއުޅުމުގެ ހާލަތުގެ މައުލޫމާތު ހޯދަން އޭގެ ކުރިން ހުޅުވާލާނެ ކަމަށާއި ސަބްސިޑީ ދޭނީ އެ މައުލޫމާތުތަކަށް ބަލައި، ވަކި ވަރަކަށް މަތިން ސްކޯ ލިބޭ ގޭބިސީތަކަށް ކަމަށް ހީނާ ވިދާޅުވި އެވެ. އެ ބަދަލު ގެނައި ނަމަވެސް، އޭނާ ވިދާޅުވީ، އާބާދީގެ ބޮޑު ބަޔަކަށް ސަބްސިޑީގެ އެހީ ދެވޭނެ ކަމަށެވެ.

"ގާތްގަނޑަކަށް އާބާދީގެ، އަޅުގަނޑު ދަންނަވާނީ 60-70 ޕަސެންޓު ގޭބިސީތަކަށް ސަބްސިޑީގެ އެހީތެރިކަން ފޯރުކޮށްދެވޭނެ މި ނިޒާމުގެ ތެރެއިން،" ހީނާ ވިދާޅުވި އެވެ.

އެންމެންނަށް އެއް ހަމައެއްގައި މިހާރު ސަބްސިޑީ ދެމުން އަންނާތީ އެކަމުގެ އެންމެ ބޮޑު ފައިިދާއެއް ކުރަނީ އެންމެ މުއްސަނދި ގޭބީސީތަކަށެވެ. ހިސާބުތައް ދައްކާ ގޮތުން ސަބްސިޑީގެ 43 ޕަސެންޓު ބެހިފައިވަނީ އެންމެ މުއްސަނދި އާބާދީގެ 40 ޕަސެންޓަށެވެ.

އެންމެ ފަގީރު އާބާދީގެ 20 ޕަސެންޓު ބޭނުން ކުރަނީ ދައުލަތުން ދޭ ސަބްސިޑީގެ އެންމެ 17 ޕަސެންޓެވެ.

ފިނޭންސް މިނިސްޓްރީން ބުނީ، ސަބްސިޑީ އަށް ގެންނަ ރިފޯމުތަކާ އެކު، ރާއްޖޭގެ އާބާދީގެ އެންމެ ފަގީރު 20 ޕަސެންޓް ގޭބީސީތަކުގެ މަހެއްގެ ހަރަދަށް 1،770ރ. އިތުރުވާނެ ކަމަށް ލަފާ ކުރެވޭ ކަމަށެވެ. އެހެންވެ، އެ ގޭބިސީތަކަށް މަހަކު 2،450ރ. ޖަމާކޮށްދޭނެ ކަމަށް ވެސް މިނިސްޓްރީން ބުންޏެވެ.

ސަބްސިޑީ ޓާގެޓުކޮށް، އެންމެ ބޭނުން ޖެހިފައިވާ މީހުންނަށް އެ އެހީ ދޭން ދައުލަތުގެ އަންނަ އަހަރުގެ ބަޖެޓުގައި ވަނީ 900 މިލިއަން ރުފިޔާ ކަނޑައަޅައިފަ އެވެ.

އެ ނިޒާމު ބަދަލުކުރަން ވޯލްޑް ބޭންކާއި އައިއެމްއެފް ފަދަ މާލީ އިދާރާތަކުން ވެސް ލަފާ ދީފައި އޮންނަތާ އަހަރުތަކެއް ވެއްޖެ އެވެ. އެހެންވެ، މީގެ ކުރީގެ ސަރުކާރުތަކުން ވެސް އެ މަސައްކަތްކުރި އެވެ. ނަމަވެސް، ވަކި ހިސާބަކުން މަސައްކަތް ހުއްޓާލަނީ އެވެ.