މަރުގެ އަދަބުން ސަލާމަތްވާން ނުވަ ބިލިއަން ޑޮލަރު ހޯދަނީ

ދުނިޔޭގައި މިހާތަނަށް ހިންގި އެންމެ ބޮޑު ބޭންކް ފްރޯޑްގެ މޭސްތިރިޔަކަށް ހުރި، ވިއެޓްނާމްގެ ވިޔަފާރިވެރިޔާ ޓްރޫންގް މައި ލަންގެ މައްޗަށް އިއްވާފައިވާ މަރުގެ ހުކުމުގެ އިސްތިއުނާފުގައި މިއަދު ގޮތެއް ނިންމާނެ އެވެ.

ވިއެޓްނާމްގައި މިފަދަ ކުށެއްގައި މަރުގެ އަދަބެއް އަންހެނެއްގެ މައްޗަށް އިއްވާފައި ވަނީ މަދު ފަހަރެއްގައި ކަމަށް ވާއިރު އިސްތިއުނާފްގައި ޓްރޫންގް މައި ލަން އަށް ނާކާމިޔާބު ވެއްޖެ ނަމަ ފުރާނަ ސަލާމަތްކުރެވެން އޮތީ ނުވަ ބިލިއަން ޑޮލަރު ދައްކައިގެންނެވެ.

ޓްރޫންގް މައި ލަން، ވިއެޓްނާމްގެ ފަސްވަނަ އަށް އެންމެ ބޮޑު ބޭންކް ކަމަށްވާ ސައިގޮން ކޮމާޝަލް ބޭންކް ސިއްރިއްޔާތުގައި ކޮންޓްރޯލްކޮށް، ޝެލް ކުންފުނިތަކެއް މެދުވެރިކޮށް 10 އަހަރަށް ވުރެ ގިނަ ދުވަސް ވަންދެން ލޯނާއި ނަގުދު ފައިސާ އުސޫލުތަކުގެ ބޭރުން ނަގާފައިވާ ކަމަށް އޭޕްރީލް މަހު ކޯޓުން މަރުގެ ހުކުމް އިއްވި އިރު ބުނެފައިވެ އެވެ. އޭނާ މަކަރާއި ހިޔާނާތުން ހޯދި ފައިސާގެ ޖުމްލަ 44 ބިލިއަން ޑޮލަރަށް އަރާ ކަމަށް ބުނެފައިވެ އެވެ.

މި ފައިސާގެ ތެރެއިން 27 ބިލިއަން ޑޮލަރަށް ހިޔާނާތްތެރިވެފައިވާ ކަމަށާއި 12 ބިލިއަން ޑޮލަރަށް ހިޔާނާތްތެރިވި ކަމަށް ބެލެވޭ ކަމަށް ބެލެވޭއިރު މިއީ މަރުގެ ހުކުމް އިއްވުމުގައި އެންމެ ބޮޑަށް ރިއާޔަތްކުރި މާލީ ކުށް ކަމަށް ޕްރޮސެކިއުޓަރުން ބުނެ އެވެ.

ނަމަވެސް ވިއެޓްނާމްގެ ގާނޫނުގައި ބުނާ ގޮތުން، ހިނާޔަތްތެރިވި ފައިސާގެ 75 ޕަސެންޓް އަނބުރާ ދެއްކޭ ނަމަ މަރުގެ އަދަބު އުމުރު ދުވަހުގެ ޖަލު ހުކުމަކަށް ބަދަލުކުރެވޭނެ އެވެ.

ރިއަލް އެސްޓޭޓް ފާމް، ވަން ތިންހް ފަޓް ގްރޫޕްގެ ޗެއާމަންގެ މަގާމުގައި ހުރި ޓްރޫންގް މައި ލަންގެ މައްޗަށް މިދިޔަ އޭޕްރީލް މަހު ހުކުމް އިއްވަން ބޭއްވި ކޯޓުގެ އަޑުއެހުންތަކުގައި ބައެއް ފަހަރު އޭނާ ހަރުކަށިކަން ދައްކައި ބައެއް ކަންކަމާ ދެކޮޅުހެދި ނަމަވެސް ހުކުމް އިސްތިއުނާފު ކުރުމަށް މި ފަހުން ބޭއްވި އަޑުއެހުންތަކުގައި ފެނުނީ މާޔޫސްކޮށް އަދި ވަރަށް ޖަޒުބާތީކޮށެވެ.

ޓްރޫންގް މައި ލަން ވަނީ އޭނާ އަކީ ދައުލަތަށް އެހާ ބޮޑު ގެއްލުމެއް ދެވުނު މީހަކަށް ވީތީ ދެރަވާ ކަމަށާއި މިހާރުގެ ހަމައެކަނި ވިސްނުމަކީ އޭނާ ނެގި ފައިސާ އަނބުރާ ދެއްކުން ކަމަށް ބުނެފަ އެވެ.

ޓްރޫންގް މައި ލާންގެ ވަކީލުން ބުނަނީ ބޭނުންވާ ނުވަ ބިލިއަން ޑޮލަރު ހޯދުމުގެ މަސައްކަތް ވަރަށް ހަލުވިކަމާ އެކު ކުރިއަށްދާ ކަމަށެވެ. އެކަމަކު އޭނާގެ އެސެޓްތައް ވިއްކައި ނަގުދު ފައިސާއަށް ބަދަލުކުރުން އުނދަގޫ ކަމަކަށް ވަނީ ވެފަ އެވެ. ވިއްކަންޖެހޭ ބައެއް ތަންތަނަކީ ވިއެޓްނާމްގެ ވެރިރަށް ހޯ ޗީ މިން ސިޓީގެ ލަގްޒަރީ ޕްރޮޕަޓީތަކެވެ. އަނެއް ބައި ތަންތަނުގައި އެހެން ވިޔަފާރިތަކުގެ ހިއްސާ ހިމެނެ އެވެ.

ދައުލަތުން ވަނީ ހިޔާނާތާ ގުޅުން ހުރި ހާހަކަށްވުރެ ގިނަ އެސެޓްތައް ފާހަގަކޮށްފަ އެވެ. އެތަންތަން މިހާރު ވަނީ ފްރީޒްކޮށްފަ އެވެ.

ވަކީލުން ބުނެފައިވަނީ މުހިންމު ކަމަކީ ގެއްލުނު ފައިސާ ހޯދުން ކަމަށް ވާއިރު މަރުގެ އަދަބު ނުދީ ޖަލު ހުކުމަކަށް ބަދަލުކޮށްފި ނަމަ ފައިސާ ހޯދޭނެ ކަމަށެވެ. އެހެންވެ ލުއި ގޮތެއް ހަމަޖައްސައިދޭން ތަކުރާރުކޮށް ވަނީ އެދިފަ އެވެ.

މި މައްސަލައިގައި ހިމެނޭ އިތުރު 85 މީހެއްގެ މައްޗަށް ވެސް ވަނީ ކުށް ސާބިތުވެފަ އެވެ. ހަތަރު މީހަކު އުމުރަށް ޖަލަށް ލުމަށް ހުކުމް ކޮށްފައިވާއިރު، ބާކީ ތިބި މީހުންގެ މައްޗަށް ވަނީ 20 އަހަރާއި ތިން އަހަރާ ދެމެދުގެ ޖަލު ހުކުމެއް އިއްވައި އެ ހުކުމްތައް ތަންފީޒުކުރުން ވަނީ ފަސްކޮށްފަ އެވެ. ޓްރޫންގް މައި ލަންގެ ފިރިމީހާ އަށް ނުވަ އަހަރު އަދި ކޮއްކޮއަކަށް 17 އަހަރުގެ ޖަލު ހުކުމެއް ވަނީ އިއްވައިފަ އެވެ.

ޓްރޫންގް މައި ލަން ވިޔަފާރީގެ ތެރެއަށް ވަނީ އޭނާގެ މަންމައާ އެކު ސްޓޯލެއްގައި ކޮސްމެޓިކްސް ވިއްކުމުންނެވެ. އޭނާ 1986 ވަނަ އަހަރު، ކޮމިއުނިސްޓް ޕާޓީން އިގްތިސާދީ އިސްލާހުތަކެއް ގެނައުމާ އެކު ބިމާއި މުދާ ގަންނަން ފެއްޓި އެވެ. އަދި 1990 ގެ އަހަރުތަކާ ހަމައަށް އައިއިރު ހޮޓާ ރެސްޓޯރެންޓްތަކުގެ ބޮޑު ޕޯޓްފޯލިއޯއެއް މިލްކިއްޔާތުގައި އޮތެވެ.