އޭދަފުއްޓާއި މާލެ ފަހަތުން ތިމަރަފުށި ވެސް ދެވަނަ ބުރަށް

ގުރޫޕް ބީގެ ފަހު މެޗުގައި ބ. ތުޅާދޫ 4-2 ން ބަލިކޮށް، ގޯލްޑް ކަޕްގެ ދެވަނަ ބުރުން ތ. ތިމަރަފުށި ވެސް ޖާގަ ހޯދައިފި އެވެ.

ކޮންމެ ގުރޫޕަކުން ވެސް ގަދަ ތިން ޓީމު ދެވަނަ ބުރަށް ދަތުރު ކުރާނެ އެވެ. މިހާތަނަށް އެ ތިން ޓީމު ހަމަވި ހަމައެކަނި ގުރޫޕަކީ އޭދަފުއްޓާއި މާލެ ވެސް ހިމެނޭ އެ ގުރޫޕެވެ.

މާލެ އާއި އޭދަފުށިން ވަނީ ދެވަނަ ބުރުގެ ޖާގަ ކުރިން ޔަގީން ކޮށްފަ އެވެ. މިއަދު ހަވީރުގެ މެޗުން، ކޮންމެ ޓީމެއް މޮޅުވި ނަމަވެސް އެ ޓީމަކަށް ދެވަނަ ބުރުގެ ޖާގަ ލިބުނީހެވެ.

ތުޅާދޫ ބަލިވުމުން އެ ޓީމުން ގުރޫޕް ސްޓޭޖް ނިންމާލީ އެންމެ ޕޮއިންޓެއް ވެސް ނުލިބި އެވެ. ތ. އަތޮޅުގެ ފުޓްބޯޅައިގެ ހިތް ތިމަރަފުށިން ވަނީ ފުރަތަމަ ހާފުގައި ލީޑް ނަގައިފަ އެވެ.

މެޗުގެ 33 ވަނަ މިނެޓްގައި އެ ޓީމުގެ ލަނޑު ޖެހީ އަބްދުﷲ ޒިޔާން އެވެ. އެ ޓީމު އަނެއް ތިން ލަނޑު ޖެހީ ދެވަނަ ހާފުގަ އެވެ. އެ ލަނޑުތައް ޖެހީ އިބްރާހިމް ސިނާހް، އާދަމް ނާސިހް އަދި އަހްމަދު އަފްލާޒެވެ.

ތުޅާދޫގެ ދެ ލަނޑުތައް ޖެހީ އަހްމަދު ރަޝީދާއި އަނޫފް އަހްމަދެވެ.

މުބާރާތުގެ ދެވަނަ ބުރު ކުރިއަށްދާނީ ގުރޫޕް ސްޓޭޖެއްގެ ސިފައިގަ އެވެ.