ޗައިނާއާ އެކު ހިންގާ ދަނޑުވެރިކަމުގެ މަޝްރޫއު އުތުރުތިލަފަޅުގެ ބަދަލުގައި ފުށިދިއްގަރު ފަޅަށް ބަދަލުކޮށްފި

ރާއްޖެއިން ބޭރުން އެތެރެކުރާ ކާނާގެ ބާވަތްތައް މަދުކޮށް، ރާއްޖޭގެ ފުޑް ސެކިއުރިޓީ ޔަގީން ކުރަން އުތުރުތިލަފަޅުގައި ފަށަން ނިންމި މަޝްރޫއު ފުށިދިއްގަރުފަޅަށް ބަދަލުކޮށްފި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާއާ އެކު ވީ އެއްބަސްވުމެއް ދަށުން އެމްއެންޑީއެފްގެ ޑޮކްޔާޑެއް އެޅުމުގެ މަސައްކަތް ކުރިއަށް ގެންދާ އުތުރުތިލަފަޅު އިތުރަށް ހިއްކައިގެން މާލޭގެ ރައްޔިތުންނަށް ގޯތި ދޫކުރަން އެ ސަރުކާރުން ނިންމާފައިވެ އެވެ. ނަމަވެސް ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން އެ ނިންމުން ބަދަލުކުރައްވައި، ޗައިނާއާ އެކު ދަނޑުވެރިކަމުގެ މަޝްރޫއެއް އެ ތަނުގައި ހިންގަން ވަނީ ނިންމަވައިފަ އެވެ.

އެކަމަކު، ސަރުކާރުގެ އެ ނިންމުން ބަދަލުކޮށް ޗައިނާއާ އެކު ހިންގާ ދަނޑުވެރިކަމުގެ މަޝްރޫއު ފަށިދިއްގަރުފަޅަށް ބަދަލުކޮށްފައިވާ ކަމަށް އެސްޓީއޯ އިން "މިހާރު" އަށް ޔަގީން ކޮށްދިނެވެ. ނަމަވސް އެގޮތަށް ނިންމި ސަބަބެއް ހާމައެއް ނުކުރެ އެވެ.

ރައީސް މުއިއްޒު މިދިޔަ އޮކްޓޫބަރު މަހު އިންޑިއާ އަށް ކުރެއްވި ރަސްމީ ދަތުރުފުޅުގައި އުތުރުތިލަފަޅުގެ ޑޮކްޔާޑް މަޝްރޫއު އިތުރަށް ކުރިއަށް ގެންދިއުމާ ގުޅޭ ގޮތުން މަޝްވަރާ ކުރެއްވި އެވެ. އަދި އިންޑިއާއާ އެކު ވެސް ދަނޑުވެރިކަމުގެ މަޝްރޫއެއް ހިންގުމުގެ މަޝްވަރާ ވެސް ކުރެއްވި އެވެ.

އުތުރުތިލަފަޅުގައި ޗައިނާގެ ކުންފުންޏަކުން ގާއިމްވެ ތިބެ އެތަނުގައި މަޝްރޫއުއެއް ހިންގުމަކީ އިންޑިއާގެ ކަންބޮޑުވުން އޮތް ކަމެކެވެ.

ދެމެހެއްޓެނިވި ގޮތެއްގައި ދަނޑުވެރިކަން ކުރަން ރާއްޖޭގައި އެގްރިކަލްޗާ އިކޮނޮމިކް ޒޯން (އޭއީޒެޑް) އެއް ގާއިމްކުރުމަށް، އެސްޓީއޯގެ ދަށުން ހިންގާ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމްއައިޑީ) އާއި ޗައިނާ ހާބަ އިންޖިނިއަރިން ކޮމްޕެނީ ލިމިޓެޑާ އެކު ވަނީ އެއްބަސްވުމެއް ހަދައިފަ އެވެ.

އެ މަޝްރޫއު ބަދަލުކުރި ފުށިދިއްގަރުފަޅަކީ ރައީސް މުއިއްޒުގެ ރިޔާސީ ވައުދުގެ ދަށުން ރައްޔިތުންނަށް ބޯހިޔާވަހިކަން ފޯރުކޮށްދޭން ރަސްމާލެގެ ނަމުގައި އާ ސިޓީއެއް ތަރައްގީކުރަން ހިއްކާ ފަޅެކެވެ.

ދަނޑުވެރިކަމުގެ މަޝްރޫއާ ގުޅޭ ގޮތުން އެ މަނިކުފާނު ވިދާޅުވެފައިވަނީ އުތުރުތިލަފަޅުން ހިއްކާނީ 200 ހެކްޓަރުގެ ބޮޑު ބިމެއް ކަމަށާއި އެ ތަނާއި ރާއްޖޭގެ ދަނޑުވެރިކަން ކުރާ އެހެން ބައެއް ރަށްރަށް ވެސް ހިމަނައިގެން މަޝްރޫއު ކުރިއަށް ގެންދާނެ ކަމަށެވެ. އޭރުން ދިވެހިންނަށް ބޭނުންވާ ވަރަށް ރާއްޖޭގައި އުފެއްދޭ ހުރިހާ ހުރިހާ ބާވަތެއްގެ ކާބޯތަކެތި ހެއްދޭނެ ކަމަށް ވިދާޅުވި އެވެ.

ރައީސް ނިންމަވާފައި އޮތީ މިދިޔަ ސަރުކާރުގައި މާލޭ ރައްޔިތުންނަށް ގޯތި ދޫކޮށްފައިވާ ގިރާވަރުފަޅާއި އުތުރުތިލަފަޅާ ދެމެދު ބްރިޖެއް އަޅައި ގުޅާލުމަށެވެ. އެ މަޝްރޫއާ ގުޅޭ ގޮތުން ޗައިނާގެ އޭޝިއާ އިންފްރާންސްޓްރްކްޗާ އިންވެސްޓްމެންޓް ބޭންކް (އޭއައިއައިބީ) އާ އެކު މަޝްވަރާކޮށް، މިހާރު ވަނީ ޕްރޮޕޯސަލް ހުށަހަޅަން ފުރުސަތު ދީފައި ކަމަށް ރައީސް ވިދާޅުވެފައިވެ އެވެ. އެ މަނިކުފާނު ވިދާޅުވެފައިވާ ގޮތުގައި، އުއްމީދަކީ 2026 ގައި އަމަލީ މަސައްކަތް ފަށައި، ގިނަވެގެން ތިން އަހަރު ތެރޭ މަޝްރޫއު ނިންމާލުމެވެ.

އުތުރުތިލަފަޅުން ހިއްކާ 200 ހެކްޓަރުގެ ބިމުގައި ދެން ހިންގާނީ ކޮން މަޝްރޫއުއެއް ކަމެއް ސަރުކާރުން އަދި ހާމައެއް ނުކުރެ އެވެ. ދަނޑުވެރިކަމުގެ މަޝްރޫއުއަށް ފުށިދިއްގަރު ފަޅުން ދޫކުރަންޖެހޭ ބޮޑު ބިމާ އެކު، ރަސްމާލެ މަޝްރޫއުގެ ޕްލޭނަށް ބޮޑު ބަދަލެއް އަންނާނެ ކަމަށް ބެލެވޭއިރު، އެ ތަން ހިއްކުމުގެ މަސައްކަތް އަދި ނުނިމެ އެވެ. ރަސްމާލޭގައި ބައެއް މަޝްރޫއުތައް ހިންގަން ޗައިނާގެ ކުންފުނިތަކުން ޝައުގުވެރިކަން ފާޅުކޮށްފައިވެ އެވެ.