އެގްރޯނެޓްގެ ހިންގުން ހުއްޓާލައި ޓްރާންސިޝަން މަރުހަލާއަކަށް

ސަރުކާރުން ދަނޑުވެރިކަމުގެ ވިޔަފާރިކުރާ އެގްރޯ ނެޝަނަލް ކޯޕަރޭޝަން (އެގްރޯ ނެޓް) ގެ ހިންގުން އިއްޔެ އިން ފެށިގެން ވަގުތީ ގޮތުން ހުއްޓާލައިފި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 2020 ގައި އުފެއްދި ކުންފުނިން ބުނީ، މިދިޔަ މަހުގެ 30 ގެ ފަހުން، އެގްރޯ ނެޓުން ދަނޑުވެރިންނާ އެކު ހިންގަމުން ދިޔަ މުއާމަލާތްތައް ހުއްޓާލާފައިވާ ކަމަށެވެ. މިވަގުތު އެ ކުންފުނީގައި 182 މުވައްޒަފުން މަސައްކަތް ކުރެ އެވެ.

އެގްރޯ ނެޓް އުވާލައި، އެ ކުންފުނީގެ ދަށުން ކުރާ މަސައްކަތް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީ ޒޯން (އެމްއައިޑީއެފްސީޒެޑް) ގެ ދަށަށް ގެންދަން ނިންމީ، މިދިޔަ ސެޕްޓެމްބަރު މަހު އެވެ.

އެގްރޯ ނެޓްގެ ހިދުމަތްތައް ހުއްޓާލި ނަމަވެސް، އެއްވެސް މުވައްޒަފަކު އަދި ވަޒީފާ އިން ވަކިކޮށްފަ އެއް ނުވެ އެވެ. މުވައްޒަފުން އާންމު އުސޫލުގެ ތެރެއިން އަންނަނީ ވަޒީފާ އަށް ނުކުންނަމުންނެވެ.

އެގްރޯ ނެޓުން ބުނީ، އެ ކުންފުނި އުވާލައި، މަސައްކަތްތައް އެމްއައިޑީއެފްސީޒެޑްގެ ދަށަށް ބަދަލުކުރާތީ، މިހާރު ކުރިއަށް ގެންދަނީ ޓްރާންސިޝަންގެ މަސައްކަތްތައް ކަމަށެވެ.

ކުންފުނީގެ މަސައްކަތްތައް ހުއްޓާލުމާ އެކު، ދަނޑިވެރިން އަތުން ތަކެތި ގަތުމާއި ވިއްކުމުގެ މަސައްކަތްތައް ވެސް ވަނީ މިވަގުތަށް ހުއްޓާލައިފަ އެވެ.

އެގްރޯ ނެޓް އުފެއްދުމުގެ ބޭނުމަކަށް ވީ، ދަނޑުވެރިކަން ކުރިއަރުވައި، އެކި ބާވަތްތައް ހައްދައި ރާއްޖެ އަށް އެ ބާވަތްތައް އެތެރެކުރާ އަދަދު މަދުކުރުމެވެ.

ސަރުކާރު ހިއްސާވާ ތިރީހަކަށް ކުންފުނި ހިންގާ އިރު ފައިދާވަނީ 50 ޕަސެންޓު ކުންފުނިންނެވެ. އަދި ކުންފުނިތައް ހިންގުމަށް ސަރުކާރުގެ ބަޖެޓުން ބޮޑު އަދަދެއް ކޮންމެ އަހަރަކު ހޭދަކުރަން ޖެހެ އެވެ. ކުންފުނިތަކަށް ކުރާ ހޭދަ ކުޑަ ކުރުމުގެ ގޮތުން ބައެއް ކުންފުނިތައް އުވާލާއި، ބައެއް ކުންފުނިތައް އެއްކޮށްލުމުގެ ޕްލޭންތައް އެބަހުރި ކަމަށް ފިނޭންސް މިނިސްޓްރީން މީގެ ކުރިން ބުނެފައި ވެ އެވެ.