ޑްރަގްގެ ގާނޫނު އިސްލާހުކޮށް، ގޭންގް ކުށްތައް ހުއްޓުވަން އާ ބިލެއް މަޖިލީހަށް ހުށަހަޅަނީ

މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމަށާއި ގޭންގު ކުށްތައް ހުއްޓުވުމާބެހޭ އާ ގާނޫނެއްގެ ބިލް ކުރިއަށް އޮތް ދެ ހަފުތާގެ ތެރޭގައި ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެ މަނިކުފާނު ސޯޝަލް މީޑިއާގައި ކުރެއްވި ޕޯސްޓުގައި ވިދާޅުވީ މަސްތުވާތަކެތީގެ ވަބާއިން ރާއްޖެ ސަލާމަތްކުރަން ދައުލަތުގެ އިދާރާތަކުން ކުރަމުން އަންނަ މަސައްކަތަށް އޮތް އެންމެ ބޮޑު އެއް ގޮންޖެހުމަކީ މިހާރު އަމަލުކުރާ މަސްތުވާތަކެއްޗާ ބެހޭ ގާނޫނުގައި ހުރި ބައެއް އުނި ކަންކަން ކަމަށެވެ.

އެހެންވެ، މަސްތުވާތަކެތީގެ މައްސަލަތައް ތަހުގީގުކޮށް ދައުވާ ކުރުމުގައި ހުރި ގޮންޖެހުންތައް ނައްތާލުމަށްޓަކައި މަސްތުވާތަކެއްޗާ ބެހޭ ގާނޫނު ރިވިއުކުރަމުން އަންނަ ކަމަށް އެ މަނިކުފާނު ވިދާޅުވި އެވެ. އަދި އެ އިސްލާހުތައް މި ހަފުތާގެ ތެރޭގައި މަޖިލީހަށް ފޮނުވާނެ ކަމަށް އެ މަނިކުފާނު ވިދާޅުވި އެވެ.

މީގެ އިތުރުން މަސްތުވާތަކެތީގެ މައްސަލަތަކާ ވަރަށް ބޮޑަށް ގުޅިފައިވާ ގޭންގް ކުށްތައް ހުއްޓުވުމަށްޓަކައި، މިހާރު އަމަލުކުރާ ގޭންގު ކުށްތައް މަނާކުރުމުގެ ގާނޫނުގައި ބަދަލުގައި، އާ ގާނޫނެއްގެ ބިލް ސަރުކާރުގެ ފަރާތުން ކުރިއަށް އޮތް ދެ ހަފުތާގެ ތެރޭގައި މަޖިލީހަށް ފޮނުވާނެ ކަމަށް އެމަނިކުފާނު ވިދާޅުވި އެވެ.

އެ މަނިކުފާނު ވަނީ އެފަދަ ބޮޑެތި މައްސަލަތަކަށް ދާއިމީ ހައްލެއް ގެނައުމަށް ކުރާ މަސައްކަތްތަކަށް ލިބެމުންދާ އެއްބާރުލުމަށް ޝުކުރު އަދާކުރައްވައިފަ އެވެ.

ގޭންގު ކުށްތައް ހުއްޓުވަން އާ ބިލެއް ހުށަހަޅަން ތައްޔާރުވިއިރު، ގޭންގު ލީޑަރުންނާއި މެންބަރުން ކަނޑައަޅައި އެ މީހުން ސަރުކާރުގެ ވަޒީފާތަކުން ވަކި ކުރުމާއި އިންތިހާބީ މަގާމުތަކަށް ކުރިމަތި ނުލެވޭ ގޮތަށް އަދި ހަރުކަށި އަދަބު ލިބޭ ގޮތަށް ހޯމް މިނިސްޓްރީން ވަނީ ބިލެއް ޑްރާފްޓްކޮށްފަ އެވެ.

އެޓާނީ ޖެނެރަލް އޮފީހަށް ފޮނުވާފައިވާ ބިލުގައި ވަނީ ގޭންގުތަކާއި ގޭންގުތަކުގެ ލީޑަރުންނާއި މެންބަރުންނަކީ ކޮބައިކަން ކަނޑައަޅައިފަ އެވެ. އަދި ވަކި އަދަދަކަށް ވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް ގާނޫނު އިސްލާހު ކުރުމަށް ވެސް ހޯމް މިނިސްޓްރީގެ ބިލްގައި ހިމަނާފައިވެ އެވެ.