ޓްރީ ޓޮޕުން ލ. ގަމުގައި ހެލްތު ކޭމްޕެއް ބާއްވަނީ

ޓްރީ ޓޮޕް ހޮސްޕިޓަލުން ހަފްތާ ބަންދުގައި ލ. ގަމުގައި ދެ ދުވަހުގެ ހެލްތު ކޭމްޕެއް ބާއްވަން ނިންމައިފި އެވެ.

މިއީ ލ. ގަމާއި ގުޅިފައިވާ އަދި ކައިރި ރަށްތަކުގައި ދިރިއުޅޭ މީހުންނަށް ސިއްހީ އެކި ހިދުމަތްތައް ފޯރުކޮށްދިނުމުގެ ގޮތުން އެ ހޮސްޕިޓަލުން އިންތިޒާމްކޮށްފައިވާ ކޭމްޕެކެވެ. މި ހެލްތް ކޭމްޕްގައި ހިތުގެ ބަލިތައް، ކިޑްނީ ބަލިތައް، ފުއްޕާމޭގެ ބަލިތައް، ކަށީގެ ބަލިތައް، ކަރުން މަތީގެ ބަލިތައް އަދި ހުޅުހުޅުގައި ރިއްސާ ބަލިތައް ދެނެގަތުމާއި ޑައިޓީޝަނެއްގެ އެހީގައި ދުޅަހެޔޮ ކެއިންބުއިމުގެ މައުލޫމާތު ލިބޭނެ އެވެ. ހެލްތު ސްކްރީން ކުރުމަށް ހާއްސަކޮށް ބާއްވާ މި ކޭމްޕުގައި އަވަހަށް ބަލިތައް ދެނެގަތުމާއި ދުޅަހެޔޮ ސިއްހަތެއް ދެމެހެއްޓުމަށް ކުރެވިދާނެ ކަންތައްތަކާއި ގުޅޭ ހޭލުންތެރިކުރުވުމުގެ ސެޝަނެއް ވެސް އޮންނާނެ އެވެ.

މި ކޭމްޕުގައި ޓްރީ ޓޮޕް ހޮސްޕިޓަލުގެ ތަޖުރިބާކާރު ޑޮކްޓަރުންގެ ޓީމެއް ބައިވެރިވެ އެވެ. އެ ޓީމުގައި ހިމެނެނީ:

- ހިތުގެ ބަލިތަކަށް ހާއްސަ ކޮންސަލްޓަންޓު ޑރ. އަމިތް އަގަރްވާލް

- ކަރުން މަތީގެ ބަލިތަކަށް ހާއްސަ ކޮންސަލްޓަންޓު ޑރ. ޗަންދްރަޝޭކަރު ރަވާލް

- ކަށީގެ ބަލިތަކަށް ހާއްސަ ކޮންސަލްޓަންޓު ޑރ. އަލީ މުޒްނީ

- ކަށީގެ ބަލިތަކަށް ހާއްސަ ކޮންސަލްޓަންޓު ޑރ. މުހައްމަދު ހަބީބް

- ފުއްޕާމޭގެ ބަލިތަކަށް ހާއްސަ ކޮންސަލްޓަންޓު ޑރ. ތެހްޒީބް ފާރުގީ

- ކިޑްނީ ބަލިތަކަށް ހާއްސަ ކޮންސަލްޓަންޓު ޑރ. ޖަޔާ ޕްރަކާޝް ނާދަން

- ރާއްޖެ ބައްޔަށް ހާއްސަ ކޮންސަލްޓަންޓު ޑރ. ޖިވާން ޕައުޑެލް

- ޑައިޓިޝަން ރީބާ މޭރީ ތޮމްޗަން

ލ. ގަމުގައި ބާއްވަން ހަމަޖެހިފައިވާ ހެލްތު ކޭމްޕާއި ގުޅޭ ގޮތުން ޓްރީ ޓޮޕް ހޮސްޕިޓަލުގެ ސީއީއޯ ޑރ. ސްރިވަޓްސަން ސްރިދާރް ޖީ ވިދާޅުވީ، މިފަދަ ހެލްތް ކޭމްޕްތައް ބޭއްވުމަކީއެ ހޮސްޕިޓަލުން ވަރަށް ބޮޑު އަހަމިއްޔަތުކަމެއް ދީގެން ކުރަމުންދާ މަސައްކަތެއް ކަމަށެވެ. އަދި އެ ހޮސްޕިޓަލުގެ މަގުސަދަކީ ރާއްޖޭގެ އެކި ހިސާބުތަކުގައި ދިރިއުޅޭ ރައްޔިތުންނަށް ޓްރީ ޓޮޕް ހޮސްޕިޓަލުން ފޯރުކޮށްދޭ ފެންވަރު ރަނގަޅު ސިއްހީ ހިދުމަތްތައް ލިބޭނެ މަގު ތަނަވަސްކޮށްދިނުން ކަމަށް ވެސް ވިދާޅުވި އެވެ.

ލ. ގަމު ކައުންސިލްގެ ރައީސް އަހުމަދު ޒަކީ ވިދާޅުވީ އެ ކޭމްޕުގައި ގަމު ރީޖަނަލް ހޮސްޕިޓަލުގެ މުވައްޒަފުންނަށް ޓްރީ ޓޮޕް ހޮސްޕިޓަލްގެ ތަޖުރިބާކާރު ޑޮކްޓަރުންނާ އެކު މަސައްކަތް ކުރުމުގެ ފުރުސަތު ލިބުމަކީ އެ ހޮސްޕިޓަލްގެ ޑޮކްޓަރުންނަށާއި ޓެކްނިކަލް މުވައްޒަފުންނަށް ވަރަށް ބޮޑު ތަޖުރިބާއެއް ލިބޭނެ ކަމަށެވެ. އަދި އެ ކޭމްޕުން އެ ރަށުގައި ހުންނަ ރީޖަނަލް ހޮސްޕިޓަލުގައި ފަރުވާ ދެވެން ނެތް ބައެއް ބަލިތަކަށް ޑައިގްނޮސް ކުރެވިފައިވާ ބަލިމީހުންނަށް އެ ބަލިތަކުގެ ހާއްސަ ޑޮކްޓަރުންނަށް ދެއްކުމުގެ ފުރުސަތު ވެސް ލިބޭނެ ކަމަށް ވިދާޅުވި އެވެ.

މި ކޭމްޕްގައި ބައިވެރިވުމަށް އެދޭ ފަރާތްތަކުން ގަމު ރީޖަނަލް ހޮސްޕިޓަލުގެ ނަމްބަރު 6800026 އަށް ގުޅައިގެން ނަން ނޯޓުކުރެވޭނެއެވެ. މި ކޭމްޕަކީ ލ. އަތޮޅުކައުންސިލްގެ އެހީތެރިކަމާއެކު ޓްރީޓޮޕް ހޮސްޕިޓަލާއި ގަމު ރީޖަނަލް ހޮސްޕިޓަލް ގުޅިގެން ބާއްވާ ހަރަކާތެކެވެ.

މިއީ ޓްރީ ޓޮޕް ހޮސްޕިޓަލުގެ ސީއެސްއާރު ޕްރޮގުރާމުގެ ދަށުން ކުރިއަށް ގެންދާ ކޭމްޕެކެވެ. ލ. ގަމުގައި ޓްރީ ޓޮޕް ހޮސްޕިޓަލްއިން ބާއްވާ ކޭމްޕަކީ އެ ހޮސްޕިޓަލުން މިއަހަރު ބާއްވާ އެފަދަ ތިން ވަނަ ހަރަކާތެވެ. އެ ހޮސްޕިޓަލުން މިއަހަރު ގއ. ވިލިނގިލި އަދި ގދ. ތިނަދޫގައި ހެލްތް ކޭމްޕް ބޭއްވި އެވެ. އެ ކޭމްޕުތަކުގައި 1000 އަށް ވުރެ ގިނަ މީހުންވަނީ ޑޮކްޓަރަށް ދައްކައި ސިއްހީ ހިދުމަތް ހޯދި އެވެ.