ހެލްތު އެކްސްޕޯގައި ޓްރީޓޮޕްގެ ސްޓޯލަށް ބޮޑު ތަރުހީބެއް

ހެލްތު މިނިސްޓްރީން އިންތިޒާމްކޮށްގެން މިދިޔަ ހަފުތާ ބަންދުގައި ބޭއްވި ހެލްތު އެކްސްޕޯ 2024ގައި ޓްރީ ޓޮޕް ހޮސްޕިޓަލްގެ ސްޓޯލަށް ހޫނު ތަރުހީބެއް ލިބުނު ކަމަށް އެ ހޮސްޕިޓަލުން ބުނެފި އެވެ.

އެ ހޮސްޕިޓަލުން ބުނީ އެ އެކްސްޕޯގައި ފެމިލީ މެޑިސިން ޑޮކްޓަރުންނާއި، ދަތުގެ ހާއްސަ ޑޮކްޓަރުން އަދި ޑައިޓީޝަނުން، ދުޅަހެޔޮ ދިރިއުޅުމަކަށް އެޅިދާނެ ފިޔަވަޅުތަކާ ގުޅޭ މައުލޫމާތުތަކާއި ޓްރީ ޓޮޕް ހޮސްޕިޓަލުން ލިބެން ހުރި ފަރުވާގެ މައުލޫމާތުތައް އާންމުންނަށް ފޯރުކޮށްދީފައިވާ ކަމަށެވެ.

މި ހަރަކާތުގައި ޓްރީ ޓޮޕް ހޮސްޕިޓަލްގެ ސީއީއޯ ޑރ .ސްރީވަތުސަން ސްރީދާރ ޖީ. ވިދާޅުވީ، ހެލްތު އެކްސްޕޯގައި ބައިވެރިވުމަކީ ދިވެހި ރައްޔިތުންގެ ސިއްހަތާއި ދުޅަހެޔޮކަމަށް އެހީތެރިކަން ފޯރުކޮށްދިނުމަށް ކުރާ މަސައްކަތާ ގުޅިފައިވާ ކަމެއް ކަމަށެވެ. އަދި އެފަދަ ހަރަކާތްތަކުގެ ތެރެއިން މުޖުތަމައާ ގުޅުން ބަދަހިކޮށް، އެ ހޮސްޕިޓަލުގެ ހެލްތު ކޭމްޕްތަކުގެ ހިދުމަތާއި، ހިލޭ ހެލްތު ސްކްރީން އަދި ރާއްޖޭގެ އެކި ކަންކޮޅުތަކުގައި ބާއްވާ ކުޅިވަރު މުބާރާތްތަކުގައި މެޑިކަލް ސަޕޯޓް ދިނުމަށް ޓްރީ ޓޮޕް ހޮސްޕިޓަލުން އަބަދުވެސް ޝައުގުވެރިވާ ކަމަށް ސީއީއޯ ވިދާޅުވި އެވެ.

"އަޅުގަނޑުމެންގެ އުއްމީދަކީ، ދިވެހި ރައްޔިތުންގެ ދުޅަހެޔޮކަމަށް ސަރުކާރުން އަދި މުޖުތަމައު އިން ކުރިއަށް ގެންދާ މިފަދަ އިތުރު ހަރަކާތްތަކުގައި ބައިވެރިވުން،" އޭނާ ވިދާޅުވި އެވެ.

ހެލްތު އެކްސްޕޯ އަކީ ސިއްހީ ހިދުމަތްދޭ ފަރާތްތަކާއި، ވެލްނެސް ޖަމިއްޔާތަކާއި ސަޕްލަޔަރުންނާއި، އަދި ސިއްހީ މައުލޫމާތު ދޭ ފަރާތްތަކުގެ ހިދުމަތް ވަނީ އެއް ތަނަކުން ފޯރުކޮށްދީފަ އެވެ. އާންމުންނަށް ސިއްހީ ކަންކަމާބެހޭ ގޮތުން ހޭލުންތެރިކަން އިތުރުކުރުމުގެ މަގުސަދުގައި ބޭއްވި އެ ހެލްތް އެކްސްޕޯގައި ބައިވެރިވި ފަރާތްތަކަށް ސިއްހީ ތައުލީމާއި، ކެރިއާ ގައިޑެންސް، އަދި ދުޅަހެޔޮކަމާ ގުޅޭ ގިނަ މައުލޫމާތުތައް ވަނީ ދީފަ އެވެ.