ޓްރީ ޓޮޕުން ޑިސެމްބަރު މަހުގެ ހިތާނީ ކޭމްޕުގެ ރަޖިސްޓްރޭޝަނަށް ހުޅުވާލައިފި

ޓްރީ ޓޮޕް ހޮސްޕިޓަލުން އަންނަ މަހުގެ ހިތާނީ ކޭމްޕުގައި ރަޖިސްޓްރީކުރުމުގެ ފުރުސަތު ހުޅުވާލައިފި އެވެ.

ހިތާނީ ކޭމްޕުގައި ޑިސެމްބަރު މަހުގެ 27 ވަނަ ދުވަހުގެ ނިޔަލަށް ރަޖިސްޓްރީ ކުރެވޭނެ އެވެ.

ޓްރީ ޓޮޕް ހޮސްޕިޓަލުގެ ޗީފް އެގްޒެކެޓިވް އޮފިސަރު ޑރ. ސްރިވަސްތަން ސްރީދާރް ޖޭ ވިދާޅުވީ، މި އަހަރުގެ ކުރީ ކޮޅު ހިތާނީ ކޭމްޕުތަކަށް ލިބުނު ތަރުހީބު މި އަހަރުގެ ޑިސެމްބަރު މަހު ވެސް ލިބޭނެ ކަމަށް އުއްމީދުކުރައްވާ ކަމަށެވެ. އަދި މި ކޭމްޕު ކުރިއަށް ގެންދާއިރު ކުދިންނަށާއި މައިންބަފައިންނަށް ހިތްހަމަޖެހޭ މާހައުލެއް ގާއިމުކުރުމަށް އިސްކަންދޭ ކަމަށާއި އެންމެ ފުރިހަމައަށް ހިދުމަތްތައް ދިނުމަށް ޑޮކްޓަރުންގެ ޓީމެއް އެކުލަވާލާފައިވާނެ ކަމަށް ވިދާޅުވި އެވެ.

އެ ޓީމުގައި ހިމެނިވަޑައިގަންނަވަނީ ޑރ. ހުސައިން ހަދީވް، ޑރ. އުކްތަމް އަބްދުއްލާޔެވް، ޑރ. މައުމޫން އާސިމް، ޑރ. އިބްރާހީމް މުއުމިން، ޑރ. މުހައްމަދު ޝަރީފް، ޑރ. އަބްދުﷲ އުބައިދު އަދި ކުޑަކަމުދާ ނިޒާމުގެ ހާއްސަ ޑޮކްޓަރު ޑރ. މެހްމެތު އޮޑަރެވެ.

ހިތާނީ ކޭމްޕުގެ ޕެކޭޖުގެ އަގަކީ 5,000ރ. އެވެ. މީގެ އިތުރުން، ކޮޓަރި އަޕްގްރޭޑް ކުރުމަށާއި ޕްރައިވެޓް ކޮޓަރިތަކަށް ހާއްސަ އަގުތަކެއް ވަނީ ކަނޑައަޅާފައިވެ އެވެ.

މިއީ އެ ހޮސްޕިޓަލުން މިއަހަރު ކުރިއަށް ގެންދާ ދެ ވަނަ ހިތާނީ ކޭމްޕެވެ.