އިންޑިއާގައި މިސްކިތެއް ހުރީ ކުރިން ފައްޅިއެއް ހުރި ބިމެއްގައިތޯ ބަލަން އުޅުމުން ބޮޑު ހަމަނުޖެހުމެއް

އިންޑިއާގައި ހުންނަ 17 ވަނަ ގަރުނުގެ މިސްކިތެއް ބިނާކޮށްފައި ހުރީ އޭގެ ކުރިން ހިންދޫންގެ ފައްޅިއެއް ހުރި ބިމެއްގައިތޯ ބަލަން ސާވޭކުރަން އުޅުމުން މުސްލިމުންނާއި ފުލުހުންނާ ދެމެދު ހަމަނުޖެހުން ހިނގައި މަދުވެގެން ދެ މީހަކު މަރުވެއްޖެ އެވެ.

"ދެ މީހަކު މަރުވެފައިވާކަން ވަނީ ކަށަވަރުވެފައި،" އުތުރުގެ ސްޓޭޓެއް ކަމަށްވާ އުއްތަރަ ޕްރަދޭޝްގެ ސަމްބަލްގެ ފުލުސް އޮފިސަރެއް ކަމަށްވާ ޕަވަން ކުމާރު އޭއެފްޕީ އަށް ވިދާޅުވި އެވެ.

އޭނާ ވިދާޅުވީ ހަމަނުޖެހުންތަކުގައި 16 ފުލުހަކަށް "ސީރިއަސް އަނިޔާތަކެއް" ވެފައިވާ ކަމަށެވެ.

ޕްރެސް ޓްރަސްޓް އޮފް އިންޑިއާ ނިއުސް އެޖެންސީން އޮފިޝަލުންނާ ހަވާލާދީ ބުނީ ތިން މީހަކު މަރުވެފައިވާ ކަމަށެވެ.

ހިންދޫ އެކްޓިވިސްޓް ގްރޫޕްތަކުން ބުނަމުންދަނީ މީގެ އެތައް ސަތޭކަ އަހަރެއް ކުރިން، މުސްލިމް މޫގާލް ރަސްކަމުގެ ދުވަސްވަރު ހިންދޫންގެ ފައްޅިތައް ނައްތާލައި އެ ތަންތަނުގައި މިސްކިތްތައް ބިނާކޮށްފައިވާ ކަމަށެވެ.

މަގުމަތީގައި ހަމަނުޖެހުންތައް ފެށުނީ ސަމްބަލްގެ ޝާހީ ޖާމާ މިސްކިތް ބިނާކޮށްފައިވަނީ ހިންދޫންގެ މިސްކިތެއް ހުރި ތަނެއްގައި ކަމަށް ބުނެ ހިންދޫ ފާދިރީއަކު ހުށަހެޅި ޕެޓިޝަނަކާ ގުޅިގެން ކޯޓު އަމުރެއްގެ ދަށުން އެ މިސްކިތް ސާވޭކުރާ މީހުންގެ ޓީމެއް އެތަނަށް ވަނުމުންނެވެ.

މުޒާހަރާގެ ބައިވެރިން ފުލުހުންނަށް ގަލުން ހަމަލާ ދީފައި ވާއިރު ފުުލުހުން ވަނީ އެއްވެ ތިބި މީހުން ދުރަށް ޖެއްސުމަށް ކަރުނަ ގޭސް ޖަހައިފަ އެވެ.

މި އަހަރުގެ ކުރީކޮޅު އިންޑިއާގެ ބޮޑުވަޒީރު ނަރެންދުރަ މޯދީ އުތުރުގެ ސިޓީއެއް ކަމަށްވާ އަޔޯދިޔާގައި، އެ ތަނުގައި ހުރި މިސްކިތް ތަޅާލުމަށް ފަހު ހެދި ހިންދޫންގެ ބޮޑު ފައްޅި ހުޅުވައިދީފައިވާތީ ހިންދޫ ވަތަނީ އެކްޓިވިސްޓުންނަށް ވަނީ މިސްކިތްތަކާ ދެކޮޅަށް ތެދުވުމުގައި ހިތްވަރު ލިބިފަ އެވެ.

އެ މިސްކިތް 1992 ވަނަ އަހަރު މޯދީގެ ޕާޓީގެ މެންބަރުން ނުކުމެ ތަޅާލުމުން މުޅި ގައުމުގައި ހިނގި ހަމަނުޖެހުންތަކުގައި 2،000 މީހަކު މަރުވި އިރު، އޭގެ ތެރޭގައި ގިނައީ މުސްލިމުންނެވެ.