ޓޭޕުން ފާރެއްގައި ހަރުކުރި ދޮންކެޔޮވަކެއް 6.2 މިލިއަން ޑޮލަރަށް ވިކިއްޖެ

އިޓަލީގެ އާޓިސްޓެއް ކަމަށްވާ މައުރީޒިއޯ ކެޓެލަންގެ ކޮންސެޕްޝަނަލް އާޓެއްގެ ގޮތުގައި، ފާރުގައި ޓޭޕުން ހަރުކުރި ތާޒާ ދޮންކެޔޮވައް 6.2 މިލިއަން ޑޮލަރަށް ނިއު ޔޯކްގެ ނީލަމެއްގައި ވިކިއްޖެ އެވެ.

ނީލަން ކުރިއަށް ގެންދިޔަ ސޮތެބީސް އިން ނެރުނު ބަޔާނެއްގައި ބުނީ މި ކެޔޮވައް ގަތީ ކްރިޕްޓޯކަރަންސީ ވިޔަފާރިވެރިއަކު ކަމަށެވެ.

މިއާމީ ބީޗުގައި 2019 ވަނަ އަހަރު ކާބޯތަކެތީގެ އާޓަށް ހާއްސަކޮށްގެން ބޭއްވި އާޓް ބާސެލް ޝޯގައި "ކޮމީޑިއަން" ގެ ނަމުގައި ދައްކާލި މި ކެޔޮވަކަކީ އާޓްގެ ގޮތުގައި ބެލެވޭނެތޯ ބޮޑު ބަހުސެއް އުފެދުނެވެ.

އެކަމަކު ޗައިނާއަށް އުފަން ކްރިޕްޓޯގެ ބާނީ ޖަސްޓިން ސަން ވަނީ މީގެ ފަސް އަހަރު ކުރިން 120،000 ޑޮލަރުގައި ނީލަން ފެށި އެ މޭވާ އާއި ފާރުގައި އެ ތަތްކުރުމަށް އަޅާފައިވާ ރިހި ކުލައިގެ ޑަކްޓް ޓޭޕަށް ހަ މިލިއަން ޑޮލަރަށްވުރެ ގިނައިން ހުށަހަޅައިފަ އެވެ.

"މިއީ ހަމައެކަނި އާޓެއް ނޫން. މިއީ އާޓާއި މީމްސް އަދި ކްރިޕްޓޯކަރަންސީ ކޮމިއުނިޓީގެ ދުނިޔެ ގުޅުވާލަދޭ ސަގާފީ ކަމެއް،" ސޮތެބީގެ ބަޔާނުގައި ސަން އާ ހަވާލާދީ ބުނެފައިވެ އެވެ.

"އަހަރެން ގަބޫލުކުރާ ގޮތުގައި މިއީ، އިތުރު ވިސްނުމާއި ބަހުސްތައް އުފެދި ތާރީހުގައި ލިޔެވިގެންދާނެ އެއްޗެއް."

ކެޔޮވަކުގެ ބީލަން ފެށީ 1 - 1.5 މިލިއަން ޑޮލަރާ ދެމެދުން އަގު ފަށާ ގޮތަށެވެ. މި ގަތުމަށް ހަތް ފަރާތަކުން ޝައުގުވެރިކަން ފާޅުކޮށްފައި އޮތެވެ.

ދޮންކޭލުގެ "ޝެލްފް ލައިފް" ނުވަތަ ހަލާކުވެގެންދާ މުއްދަތަށް ބަަލައި، މި ނީލަމުގައި އަސްލު ގަނެފައި ވަނީ އެއީ ކެޓެލަން އަސްލު އުފެއްދުމެއް ކަމުގެ ސެޓްފިކެޓާއި ދޮންކެޔޮވައް ފީވުމުން އެ ބަދަލުކުރާނެ ގޮތުގެ އިރުޝާދުތަކެވެ.

މިދިޔަ ބުދަ ދުވަހު ކެޔޮވައް އަލުން މިގޮތަށް ހަރުކޮށްފައި މި ވަނީ ތިން ވަނަ ފަހަރަށެވެ. އެންމެ ފުރަތަމަ އެގޮތަށް ދައްކާލަން ބެހެއްޓި ފަހަރު ޕާފޯމަންސް އާޓިސްޓެއް ކަމަށްވާ ޑޭވިޑް ޑަޓޫނާ އެ ކެޔޮވައް ބަލަން ގޮސް "ބަނޑުހައިވެގެން" ކަމަށް ބުނެ އެ ކެޔޮވައް ކާލީ އެވެ.

ކްރިޕްޓޮމޯނީ އެކްސްޗޭންޖެއް ކަމަށްވާ "ޓްރޯން" އުފެއްދި ސަން ބުނީ އޭނާގެ ވިސްނުމަކީ އޭނާގެ "އިންވެސްޓްމަންޓް ވެސް ކާލުން" ކަމަށެވެ. އޭނާ ބުނީ އާޓިސްޓިކް މި މަސައްކަތުގެ ހާއްސަކަން ފާހަގަކޮށް، ތަފާތު ތަޖުރިބާއެއް ކޮށްލުމުގެ ގޮތުން އޭނާ އެ ކެޔޮވައް ކާލާނެ ކަމަށެވެ.

ކެޓެލަން އަކީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ވެރިކަމުގައި ހުންނެވި އިރު "އެމެރިކާ" ގެ ނަމުގައި 18 ކެރަޓް ރަނުގެ ފާހާނާތައްޓެއް ހަދައި ކުއްުޔަށް ދޭން ވެސް ހުށަހެޅި މީހެކެވެ.