ޓޮމްގެ ރާގު ބަދަލުވެ، އިޒްރޭލް ޕާސްޕޯޓް މައްސަލާގައި ޕީއެންސީގެ ވިސްނުމާ ދެކޮޅަށް ވޯޓު ދެއްވައިފި

އިޒްރޭލްގެ ޕާސްޕޯޓު ރާއްޖޭގައި މަނާ ކުރުމުގެ މަސައްކަތް އަވަސް ކުރަން ގޮވާލައި، އެމްޑީޕީން ރައްޔިތުންގެ މަޖިލީހަށް ހުށަހެޅި ގަރާރާ އެއްކޮޅަށް ޕީއެންސީގެ ނައިބު ރައީސް އަދި މަހިބަދޫ ދާއިރާގެ މެންބަރު އަހުމަދު ތޯރިގު މިއަދު ވޯޓު ދެއްވައިފި އެވެ.

ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ގަރާރަށް ބަހުސް ކުރުމަށް ފަހު މިއަދުގެ ޖަލްސާގައި ނެގި ވޯޓުގައި އެ ގަރާރު ބަލައިގަންނަން ނުފެންނަ ކަމަށް ޕީއެންސީގެ 63 މެންބަރުން ވޯޓު ދެއްވި އެވެ.

އެ ގަރާރަށް ތާއީދު ކުރެއްވީ އެމްޑީޕީގެ 12 މެންބަރުންނާއި އަމިއްލަ ގޮތުން އިންތިހާބުވެފައިވާ އައްޑޫ މީދޫ ދާއިރާގެ މެންބަރު އަބްދުއްރަހްމާންގެ އިތުރުން ޓޮމް އެވެ.

ހުރާ ދާއިރާގެ ޕީއެންސީގެ މެންބަރު ޑރ. އަނާރާ ނައިމް ވަނީ އެ މައްސަލާގައި ވަކި ގޮތަކަށް ވޯޓު ދޭން ނުފެންނަ ކަމަށް ވޯޓު ދެއްވައިފަ އެވެ. އަދި އެވަގުތު ތަޅުމުގައި ތިއްބެވި ޕީއެންސީގެ އިތުރު ފަސް މެންބަރަކު ވޯޓުގައި ބައިވެރިއެއް ނުވެ އެވެ.

ޕީއެންސީގެ ވިސްނުމާ ދެކޮޅަށް ޓޮމް މިއަދު ވޯޓު ދެއްވިއިރު، އޭނާ އިއްޔެ ވަނީ ޓޫރިޒަމް ދާއިރާއިން ލިބޭ ޑޮލަރުތައް ރާއްޖޭގެ ބޭންކްތަކުން މާރުކުރަން ޖެހުމުން ވިޔަފާރިވެރިންނަށް ދިފާއުގައި ވާހަކަ ދައްކަވައިފަ އެވެ. އަދި ސަރުކާރަށް ނިސްބަތްވާ ބައެއް ފަރާތްތަކުން ވިޔަފާރިވެރިންނަށް ފާޑު ކިޔަމުންދާތީ އެކަން ހުއްޓާލަން ވެސް އޭނާ އިއްޔެ ގޮވާލެއްވި އެވެ.

އިޒްރޭލްގެ ޕާސްޕޯޓްގެ މައްސަލާގައި ކުޑޫ ހުށަހެޅުއްވި ގަރާރުގައި ވިދާޅުވެފައި ވަނީ ފަލަސްތީނުގެ ރައްޔިތުންގެ ނަސްލު ނައްތާލުމުގެ އަމަލު ހިންގަމުން އަންނަތާ އަހަރެއް ވެފައިވާއިރު، ސަރުކާރުން އެކަން ކުށްވެރިކުރުން ފިޔަވައި އެއްވެސް ފިޔަވަޅެއް އަޅާފައި ނުވާ ކަމަށެވެ.

އިޒްރޭލް ޕާސްޕޯޓުގައި ރާއްޖެ އައުން މަނާކުރުމަށް އިމިގްރޭޝަން ގާނޫނަށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް އިސްލާހެއް ހުށަހަޅާފައި ވަނިކޮށް ސަރުކާރުން ވަނީ ކެބިނެޓް ބައްދަލުވުމެއް ބާއްވައި، ޕާސްޕޯޓު މަނާކުރަން ނިންމާފައިވާކަން އިއުލާންކޮށްފަ އެވެ. ކުޑޫގެ ގަރާރުގައި ވަނީ ސަރުކާރުގެ އެ ނިންމުމުގައި އަމަލީ ސިފައެއް ޖެއްސުމަށް އެއްވެސް ކަމެއް ކޮށްފައި ނުވާ ކަމަށެވެ.

އެ ބިލު މަޖިލީހުގެ 241 ކޮމިޓީގައި އޮންނަތާ ހަތަރު މަސް ވެފައިވާ ކަމަށް ކުޑޫ ވިދާޅުވި އެވެ. ނަމަވެސް މަޖިލީހުގެ އަޣުލަބިއްޔަތު ސަރުކާރު ހިންގާ ޕާޓީއަށް އޮތްއިރު ބޭނުންވާ އެހެން ކަންކަން މަޖިލީހުގެ ތެރެއިން ދައުރުން ބޭރުން ޖަލްސާ ބާއްވައިގެން ވެސް ނިންމަމުންދާ ކަމަށް ކުޑޫ ވިދާޅުވި އެވެ.