ޔާމީންގެ ޝަރީއަތުގައި އާ ހެކި އެއްފަރާތް ކުރަން އެންގި ނިންމުން ގާނޫނުއަސާސީއާ ހިލާފު: ދައުލަތް

ކުރީގެ ރައީސް އަބްދުﷲ ޔާމީންގެ ޝަރީއަތުގެ ތެރެއިން ފަހުން ލިބުނު ހެކިތަކުގެ ގޮތުގައި ދައުލަތުން ހުށަހެޅި ކަންކަން ބަލައިނުގަނެ، އެއްފަރާތް ކުރަން ހައި ކޯޓުން އެންގި އެންގުމަކީ ގާނޫނުއަސާސީއާ ހިލާފު ނިންމުމެއް ކަމަށް ޕްރޮސިކިއުޓާ ޖެނަރަލްގެ އޮފީހުން ބުނެފި އެވެ.

ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް، އެ ފައިސާ ލޯންޑާކުރި ކަމަށް ބުނެ ޔާމީންގެ މައްޗަށް ހިންގި ޝަރީއަތުގައި ހެކިންގެ ހެކިބަހާ ގުޅޭ ކަންތައްތަކާ ގުޅޭ ގޮތުން އާ ހެކި ދައުލަތުން ހުށަހެޅި އެވެ.

ޖިނާއީ އިޖުރާއަތުގެ ގާނޫނުގެ 135 ވަނަ މާއްދާގެ ދަށުން ހުށަހެޅި އެ ހެކިތައް އޭރު ކްރިމިނަލް ކޯޓުން ބަލައިގަތެވެ. ނަމަވެސް، މައްސަލާގެ އިސްތިއުނާފުގައި ހައި ކޯޓުން ކަނޑައަޅާފައިވަނީ ކްރިމިނަލް ކޯޓުން ފަހުން ހުށަހެޅި ހެކިތައް ބަލައިގަތީ ގޯސްކޮށް ކަމަށެވެ.

ހައި ކޯޓުން ވަނީ ޔާމީންގެ މައްޗަށް އިއްވާފައިވާ ހުކުމް ބާތިލްކޮށް، އާ ހެކިތައް އެއް ފަރާތްކުރުމަށް ފަހު އަލުން ޝަރީއަތް ހިންގަން އަމުރުކޮށްފަ އެވެ. އާ ހެކި އެއްފަރާތް ކުރަން ހައި ކޯޓުން ނިންމި ނިންމުން ދައުލަތުން ސުޕްރީމް ކޯޓުގައި އިސްތިއުނާފްކުރީ އެވެ.

އެ މައްސަލާގައި މިއަދު ފެށި ޝަރީއަތުގައި ދައުލަތުގެ ވަކީލް އަހުމަދު ޝަފީއު ވިދާޅުވީ ހައި ކޯޓުގެ ނިންމުން ގާނޫނުއަސާސީގެ 143 ވަނަ މާއްދާއާ ހިލާފު ކަމަށެވެ. އެ މާއްދާގައި ބުނަނީ މަތީ މަރުހަލާގެ ކޯޓުތަކުން ނިންމާ ނިންމުންތަކަށް އެއަށްވުރެ ދަށު މަރުހަލާގެ ކޯޓުތަކުން ތަބާވާންވާނެ ކަމަށެވެ.

ޝަފީއު ވިދާޅުވީ ސުޕްރީމް ކޯޓުގެ އަލީ ޒުބައިރު ވ. ޕީޖީ އޮފީސް މައްސަލާގައި ކަނޑައަޅާފައި އޮތް އުސޫލާ ހައި ކޯޓުގެ ނިންމުން ހިލާފު ކަމަށެވެ. އެ މައްސަލާގައި ކަނޑައަޅާފައިވަނީ އިޖުރާއަތްތައް ފުރިހަމަކޮށްފައި ނުވާ ހާލަތުގައި ނުވަތަ އައިބު ކަންތައްތަކާ އެކު އިޖުރާއަތް ފުރިހަމަކޮށްފައިވާ ހާލަތުގައި އެކަން ފުރިހަމަކޮށް އިސްލާހުކުރުމުގެ ފުރުސަތު އޮންނާނެ ކަމަށެވެ.

އާ ހެކި އެއްފަރާތް ކުރަން ހައި ކޯޓުން އެންގިއިރު، އެކަމުގައި ހިނގާފައިވަނީ އިޖުރާއީ މައްސަލައެއް ކަމަށާއި އެއީ އިސްލާހު ކުރެވެން އޮތް ކަމެއްކަން ޝަފީއު ފާހަގަކުރެއްވި އެވެ. އޭނާ ވިދާޅުވީ އާ ހެއްކާ ގުޅޭ އިޖުރާއީ ގޯސް އިސްލާހު ކުރާނީ އާ ހެއްކާ ގުޅޭ ގޮތުން ހުށަހެޅުމެއް އޮތް ނަމަ، އެކަމަށް ފުރުސަތުދީ، އެއާ މެދު ބަހުސްކޮށް ހެކި ބަލައިގަތުމާ މެދު ދަށު ކޯޓުގެ ޝަރީއަތުން ގޮތެއް ކަނޑައެޅުން ކަމަށެވެ. އެއީ މިހާރު ކްރިމިނަލް ކޯޓުގައި އޮތް ޝަރީއަތުގައި ތަންމިނަށް ހުޅުވިފައި އޮތް ފުރުސަތެއް ކަމަށް ޝަފީއު ވިދާޅުވި އެވެ.

ޝަފީއު ވިދާޅުވީ ޝަރީއަތް ކުރިއަށް ދަނިކޮށް އާ ހެކި ހުށަހެޅުމަކީ ޣައިރު ގާނޫނީ ކަމެއް ކަމަށް ހައި ކޯޓުގެ ފަނޑިޔާރުން ފާހަގަކޮށްފައިނުވާ ކަމަށެވެ. އެހެންވެ ދައުލަތުން އެދިފައިވަނީ އާ ހެކި އެއް ފަރާތް ކުރަން ހައި ކޯޓުން ނިންމާފައި ނިންމުން ސުޕްރީމް ކޯޓުން ބާތިލްކޮށްދޭށެވެ. އަދި އާ ހެކިތަކާ ގުޅޭ ގޮތުން ދަށު ކޯޓުގައި ބަހުސްކޮށް އެކަމުގައި އެ ކޯޓުން ކަނޑައަޅައިދިނުމަށެވެ.

ދައުލަތުގެ ވަކީލް ދެއްކެވި ވާހަކަތަކަށް ރައްދު ދެއްވައި ޔާމީންގެ ވަކީލް ހަމްޒާ ލަތީފް ވިދާޅުވީ ނުބައި މަރުހަލާއެއްގައި ނުބައި އިޖުރާއަތަކުން ހެކި ހުށަހެޅުމުގެ ނަތީޖާއަކީ ހެކި ބަލައިނުގަތުން ކަމަށާއި އެ ނޫން ނަތީޖާއެއް އެކަމުގައި ނޯންނާނެ ކަމަށެވެ. މި މައްސަލާގައި ދައުލަތުން އަމަލުކޮށްފައި އޮތް ގޮތަކީ ހެކިން ދެއްކި ވާހަކަތަކަކަށް ރައްދު ދިނުމުގެ ގޮތުން އާ ހެކި ހުށަހެޅުން ކަމަށް ހަމްޒާ ވިދާޅުވި އެވެ. އެއީ ގާނޫނުއަސާސީގައި ބުނާ ހަމަހަމަކަމުގެ ހައްގު ގެއްލޭ ކަމެއް ކަމަށާއި އަދި އެއީ ރާއްޖޭގެ ގާނޫނީ ނިޒާމްގެ ތެރޭގައި އޮތް ފުރުސަތެއް ވެސް ނޫން ކަން އޭނާ ފާހަގަކުރެއްވި އެވެ

ހަމްޒާ ވިދާޅުވި ގޮތުގައި މައްސަލާގައި ޝަރީއަތުން ގޮތް ނިންމާފައިވަނީ ހެކިން ހެކިބަހަށް ރައްދު ދޭން ދައުލަތުން ހުށަހެޅި ހެކި ވެސް ވަޒަންކޮށް އެއަށް ރިއާޔަތްކޮށްގެން ކަމަށެވެ. އެހެންކަމުން މައްސަލާގައި އިއްވި ހުކުމާ އެ ހެކިތައް ބަލައިގަތުމާ ސީދާ ގުޅުން އެބަ އޮތް ކަމަށެވެ. ދައުލަތުން އަމަލުކޮށްފައި އޮތް ގޮތުން ދައުވާ ލިބޭ ފަރާތުގެ ހައްގުތަކަށް އަސަރުކޮށްފައިވާ ކަމަށާއި އެއީ ފަސޭހައިން އިސްލާހުކޮށްލެވޭނެ އިޖުރާއީ އައިބެއް ނޫން ކަމަށް ހަމްޒާ ވިދާޅުވި އެވެ.

ޔާމީންގެ ވަކީލް ވިދާޅުވީ ސުޕްރީމް ކޯޓުން ދައުލަތުން އެދޭ ގޮތަށް އަމުރު ނެރެދީފި ނަމަ، މިހާ ބޮޑު ގޯހެއް ހަދާފައި އޮތް ބަޔަކަށް އެ ދެވެނީ އާ ހިތްވަރެއް ކަމަށެވެ.

އާރަށުގެ މައްސަލައިގެ ޝަރީއަތް ކްރިމިނަލް ކޯޓުގައި އަލުން ވަނީ ފަށައިފަ އެވެ. ނަމަވެސް، ސުޕްރީމް ކޯޓުގައި އާ ހެކިތަކުގެ މައްސަަލަ ނުނިމި އޮއްވައި ކްރިމިނަލް ކޯޓުގައި މައްސަލަ ކުރިއަށް ގެންދިއުމަކީ ރަނގަޅު ކަމެއް ނޫން ކަމަށް ޔާމީންގެ ވަކީލުން ވަނީ ވިިދާޅުވުމުން، އެކަމަށް ރިއާޔަތްކޮށް ކްރިމިނަލް ކޯޓުން ވަނީ ސުޕްރީމް ކޯޓުން މައްސަލަ ނިމެންދެން ޝަރީއަތް މަޑުޖައްސާލަން ނިންމައިފަ އެވެ.

ޔާމީންގެ ފަރާތުން ވަނީ ދައުވާތައް ރިވިއުކޮށް ދޭން ޕްރޮސިކިއުޓާ ޖެނަރަލްގެ އޮފީހަށް ހުށަހަޅައިފަ އެވެ.

ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވެސް އެ މައްސަލާގައި އިއްވި ޖަލު ހުކުމް ހައި ކޯޓުން އޮތީ ބާތިލްކޮށްފަ އެވެ.