މުވާސަލާތީ ހިދުމަތް ފޯރުކޮށްދޭ ފަރާތްތަކުގެ އަތުން އިތުރު ފީއެއް ނަގަނީ

މުވާސަލާތީ ހިދުމަތް ފޯރުކޮށްދޭ ފަރާތްތަކުގެ އަތުން އަންނަ އަހަރުން ފެށިގެން އިތުރު ފީއެއް ނަގަން ނިންމައިފި އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓްގައިވާ ގޮތުން ފިސްކަލް އަދި ދަރަނި މެނޭޖްކުރަން އާމްދަނީ އިތުރުކުރަން މުހިންމު ފިޔަވަޅުތަކެއް އަޅަން ވަނީ ނިންމައިފަ އެވެ. އޭގެ ތެރެއިން އެއް ކަމަކީ ރާއްޖޭގެ ރޭޑިއޯ ފްރިކުއެންސީ ސްޕެކްޓްރަމް ހަރުދަނާކަމާ އެކު ބެލެހެއްޓުމަށް ފްރިކުއެންސީ ސްޕެކްޓްރަމް ޗާޖެއް ނެގުމެވެ.

އެ ފީ ނަގާނީ އަންނަ އަހަރުގެ ތެރޭގަ އެވެ. އެކަން ކުރާނީ އެކަމާ ގުޅޭ ގާނޫނާއި ގަވާއިދުތަކަށް ބަދަލު ގެނެސްގެންނެވެ. ނަމަވެސް އެ ފީ ނަގައިގެން ދައުލަތަށް ލިބޭނެ ކަމަށް ލަފާކުރާ އާމްދަނީއެއް ބަޖެޓްގައި ހިމަނައިފައެއް ނުވެ އެވެ.

އަންނަ އަހަރު އާމްދަނީގެ ގޮތުގައި 40 ބިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ. އޭގެ ތެރެއިން 29 ބިލިއަން ހޯދަން ހަމަޖެހިފައިވަނީ ޓެކްސްގެ ގޮތުގަ އެވެ.

އަންނަ އަހަރު އާމްދަނީ އިތުރު ކުރުމަށް ޓީޖީއެސްޓީ އާއި ގްރީން ޓެކްސް އާއި އެއާޕޯޓު ޓެކްސް އާއި ފީގެ ރޭޓުތައް މަތިކުރުމަށާއި ސިނގިރޭޓުންނާއި ބިޑިން ނަގާ އިމްޕޯޓު ޑިއުޓީ ރޭޓުތައް މަތިކުރުމަށް ވަނީ ނިންމައިފަ އެވެ. އެކަމާ ގުޅޭ ގާނޫނުތަކަށް އިސްލާހު ގެނައުމުގެ ބިލް މިހާރު ވަނީ ތަސްދީގު ކުރައްވައިފަ އެވެ.

މުވާސަލާތީ ހިދުމަތްތަކުން އިތުރު ފީއެއް ނަގަން ނިންމާފައިވާއިރު ބިން ހިއްކުމުގެ މަޝްރޫއުތަކުން ވެސް ފީއެއް ނަގަން ވަނީ ނިންމައިފަ އެވެ.