ބޮޑު ބަދަލެއް: އެކްޓިވޭޓު ކޮށްފައި ހުންނަ ސިމް ވިއްކުން ހުއްޓާލަނީ!

ރަޖިސްޓްރީ ނުކުރާ ސިމްތައް ބޭނުންކޮށްގެން ސްކޭމް ކޯލް ކުރުމާއި އެކަމާ ގުޅުން ހުރި މައްސަލަތައް ގިނަވާތީ އެކަން ހައްލު ކުރުމުގެ ގޮތުން، ޕްރީ އެކްޓިވޭޓަޑް ސީމް ދޫކުރުން ހުއްޓާލުމުގެ މަސައްކަތް ކުރަމުން އަންނަ ކަމަށް ކޮމިއުނިކޭޝަން އޮތީރިޓީ އޮފް މޯލްޑިވްސް (ކެމް) އިން މިއަދު ބުނެފި އެވެ.

ޓެލެކޮމިއުނިކޭޝަން ހިދުމަތް ދޭ ކުންފުނިތަކުން އަމަލުކުރަން ޖެހޭ އުސޫލުތައް ލުއިކޮށް އޮތުމުގެ ސަބަބުން ރަޖިސްޓާ ނުކޮށް ހުންނަ ސިމްތައް ބޭނުން ކޮށްގެން ސްކޭމް ކޯލް ކުރުމުގެ މައްސަލަ އޮތީ ވަރަށް ބޮޑުވެފަ އެވެ.

އޮޅުވާލައިގެން ފައިސާ ހޯދަން ގުޅާ މީހުންގެ މައްސަލަ ތަހުގީގު ކުރުމުގައި ވެސް ދިމާވާ އެންމެ ބޮޑު އެއް ގޮންޖެހުމަކީ ސިމްތަކުގެ ރަޖިސްޓްރޭޝަންގެ މައްސަލަތަކާއި ލިމިޓެއް ނެތި ސިމް ވިއްކުން ކަމަށް ފުލުހުން ވަނީ ބުނެފަ އެވެ.

އެ މައްސަލާގައި "މިހާރު" އާ ވާހަކަ ދައްކަވަމުން ކޭމްގެ ސީއީއޯ އިލްޔާސް އަހުމަދު ވިދާޅުވީ ސިމް ވިއްކުމާއި ރަޖިސްޓްރީ ކުރުމުގެ އުސޫލުތައް އޮތަސް ސިމް ވިއްކުމުގެ ވިޔަފާރީގައި އުޅޭ ބައެއް އެޖެންޓުންނާއި ރީސޭލް ކުރާ ފަރާތްތަކުން އެ އުސޫލުތަކަށް އެންމެ ރަނގަޅަށް އަމަލުނުކުރާ ކަމަށެވެ.

މިހާރު އަމަލުކުރާ އުސޫލުގެ ދަށުން ސިމް ވިއްކާ ފަރާތުގެ މައުލޫމާތު ހިމެނޭ ރަޖިސްޓްރޭޝަން ފޯމް އެއް މަސް ތެރޭގައި ސާވިސް ޕްރޮވައިޑަރަށް ފޮނުވައި ރަޖިސްޓްރީކުރަން ޖެހޭނެ ކަމަށް އޭނާ ވިދާޅުވި އެވެ.

ނަމަވެސް އެތައް މަހެއް ވާއިރު ވެސް ރަޖިސްޓްރީ ނުކުރުމާއި އެއްގޮތަކަށް ވެސް ރަޖިސްޓްރީ ނުކުރާ މައްސަލަތައް ގިނަ ކަމަށް އޭނާ ވިދާޅުވި އެވެ.

"މި ވިއްކަނީ އެކްޓިވޭޓް ކޮށްފައި ހުންނަ ސިމްތަކެއް. ކަސްޓަމަރު އަތަށް ސިމް އަރާ ގޮތަށް ރަޖިސްޓްރީ ނުކުރިޔަސް ބޭނުން ކުރެވޭނެ،" އިލްޔާސް ވިދާޅުވި އެވެ.

އެ މައްސަލަ ހައްލުކުރުމަށް، އެކްޓިވޭޓް ކޮށްފައި ހުންނަ ސިމްތައް ދޫކުރުން ޑިސެމްބަރު 1 އިން ފެށިގެން ހުއްޓާލަން ނިންމާފައިވާ ކަމަށް އިލްޔާސް ވިދާޅުވި އެވެ. އޭގެ ފަހުން ދޫކުރާ ސިމްތައް އެކްޓިވޭޓް ވާނީ މައުލޫމާތު ކަށަވަރު ކުރުމަށް ފަހު ރަޖިސްޓާ ވުމުން ކަމަށް އޭނާ ވިދާޅުވި އެވެ.

"އަލަށް މި ތައާރަފް ކުރަނީ އޮންލައިންކޮށް ސިސްޓަމަކަށް ވަގުތުން ރަޖިސްޓްރޭޝަނަށް ބޭނުންވާ މައުލޫމާތުތައް އަޅާ ގޮތަށް. ސިމެއް ނެގިޔަސް މައުލޫމާތު ފުރިހަމަ ނުކުރަންޏާ އެއީ ޕްލާސްޓިކް ޗިޕެއް. ބޭނުން ކުރެވޭނީ މައުލޫމާތު ފުރިހަމަ ކުރީމާ. އެކްޓިވޭޓް ވާނީ ރަޖިސްޓާ ވީމާ،" އިލްޔާސް ވިދާޅުވި އެވެ.

ސިމް ގަނެވޭ އަދަދު ލިމިޓް ކުރަނީ

އިލްޔާސް ވިދާޅުވީ ކޮންމެ ކަސްޓަމަަރަކަށް ވިއްކާ ސިމްގެ އަދަދު ލިމިޓް ކުރުމާ ގުޅޭ މަސައްކަތްތަކެއް ވެސް އެ އޮތޯރިޓީން ކުރަމުން އަންނަ ކަމަށެވެ.

އެކަމަށްޓަކައި ދިރާގާއި އުރީދޫ އާ މަޝްވަރާ ކުރަމުން އަންނަ ކަމަށާއި ނަމަވެސް ކޮންމެ ކަސްޓަމަރަކަށް ވިއްކާނެ ސިމްގެ ވަކި އަދަދެއް އަދި ނިންމާފައި ނުވާ ކަމަށް އޭނާ ވިދާޅުވި އެވެ.

އިލްޔާސް ވިދާޅުވީ ސިމް ގަންނަން ބޭނުންވާ ފަރާތްތައް މިހާރު އައިޑީކާޑު، ޕާސްޕޯޓް ނުވަތަ ބިދޭސީއެއް ނަމަ ވޯކް ޕާމިޓް ހުށަހަޅައިގެން ސިމް ގަނެވޭނެ ކަމަށާއި ނަމަވެސް އެ މައުލޫމާތުތަކުގެ ސައްހަކަން ކަށަވަރު ކުރުމަށް ގޮންޖެހުން ތަކެއް ހުރި ކަމަށެވެ.

އެހެންވެ މައުލޫމާތުތަކުގެ ސައްހަކަން ކަށަވަރު ކުރުމަށް ކަމާބެހޭ ފަރާތްތަކާ ގުޅިގެން އެއް ނިޒާމެއްގެ ތެރެއިން މަސައްކަތް ކުރުމުގެ އިންތިޒާމްތައް ހަމަޖައްސަމުން އަންނަ ކަމަށް ވެސް އޭނާ ވިދާޅުވި އެވެ.

ކުރިޔަށް އޮތް ހަ މަސް ތެރޭގައި، ސިމް ލިމިޓް ކުރުމާއި މައުލޫމާތު ކަށަވަރު ކުރުން ފަދަ ބަދަލުތައް ގެންނާނެ ކަމަށް ވެސް އިލްޔާސް ވިދާޅުވި އެވެ.

"މިކަން ނިމޭ އިރު ސިސްޓަމްގައި ހުރި ޝަކުވާ ނުވަތަ މައުލޫމާތު ފުރިހަމަ ނޫން ސިމްތައް ބަލާފައި ފުރިހަމަ ކުރަން ފުރުސަތު ދޭނަން. އެއަށް ފަހު މައުލޫމާތު ފުރިހަމަ ނުކުރާ ސިމްތަކުގެ ހިދުމަތް ކަނޑާލާނަން. ނަމަވެސް އަނބުރާ މައުލޫމާތު ފުރިހަމަ ކުރުމުން އެ ސިމް ލިބުމުގެ ފުރުސަތު އޮންނާނެ،" އޭނާ ވިދާޅުވި އެވެ.

ސްކޭމް ކޯލް ކުރާ މައްސަލާގައި "މިހާރު" އާ ވާހަކަ ދެއްކި މައުލޫމާތު އެނގޭ ބައެއް ފަރާތްތަކުން ބުނި ގޮތުގައި އެންމެ މީހެއްގެ ނަމުގައި އެތައް ހާސް ސިމް ނަގާފައި ހުރި މައްސަލަތައް ވެސް އެބަހުއްޓެވެ. އަދި ސްކޭމް ކޯލް ކުރާ ފަރާތްތަކުގެ ސިމް ގިނަ ފަހަރަށް ހުންނަނީ ރަޖިސްޓާ ނުކޮށް ކަމަށާއި ރަޖިސްޓާ ކޮށްފައި ހުންނަ ސިމްތައް ރާއްޖޭގައި ނޫޅޭ ބިދޭސީއެއްގެ ނަމުގައި ވެސް ހުރެދާނެ ކަމަށް ތަޖުރިބާކާރުން ބުނެ އެވެ.