ލަންކާގެ އާ ރައީސް ވެސް ޑިފެންސާއި ފިނޭންސް ދުލެއް ނުކުރި

ސްރީ ލަންކާގައި މިދިޔަ ހަފުތާގައި ބޭއްވި އާންމު އިންތިހާބުގައި އާ ރައީސް އަނޫރާ ކުމާރަ ޑިސަނަޔަކަ އަށް ލިބިވަޑައިގަތް ބޮޑު ކާމިޔާބީއާ އެކު ވެސް އާ ކެބިނެޓުގައި ޑިފެންސް އަދި ފައިނޭންސްގެ ޕޯޓްފޯލިއާ ރައީސްގެ ބާރުގެ ދަށުގައި ބާއްވަން ނިންމަވައިފި އެވެ.

ސެޕްޓެމްބަރު މަހު ބޭއްވި ރިޔާސީ އިންތިހާބު ކާމިޔާބު ކުރެއްވި ވާތުފިޔައިގެ ލީޑަރު ވަނީ ކެބިނެޓުގައި ތިއްބެވި އިންތިގާލީ ބޭފުޅުން ކަމަށްވާ ބޮޑުވަޒީރު ހަރީނީ އަމަރަސޫރިޔާ އާއި ފޮރިން މިނިސްޓަރު ވިޖިތާ ހެރަަތަށް ހަމަ މަގާމުތައް ދެއްވައިފަ އެވެ.

ގާނޫނީ ގޮތުން ބަލާއިރު ތާރީހަށް ވުރެ ގާތްގަނޑަކަށް 10 މަސް ކުރިން ބޭއްވި، އަވަސް އިންތިހާބުގައި، ރައީސް ޑިސެނަޔަކަގެ ނެޝަނަލް ޕީޕަލްސް ޕަވާ (އެންޕީޕީ) އަށް 225 ގޮނޑީގެ ތެރެއިން 159 ގޮނޑި ވަނީ ލިބިފަ އެވެ. އެހެންވެ މިއީ އޭނާގެ އިސްލާހީ އެޖެންޑާއަށް ރައްޔިތުންގެ ތާއީދު އޮތް ކަމުގެ ހެއްކެއްގެ ގޮތުގައި ވަނީ ބެލެވިފަ އެވެ.

އުވާލި މަޖިލީހުގައި އަޣުލަބިއްޔަތު އޮތީ ކުރިން ވެރިކަން ކުރެއްވި ސިޔާސީ ނުފޫޒު ގަދަ ދެބެއިން ކަމަށްވާ މަހިންދަ އާއި ގޯޓާބަޔަ ރާޖަޕަކްސަގެ ޕާޓީއަށެވެ.

ދެބައިކުޅަ އެއްބަޔަށްވުރެ ބޮޑު އަޣުލަބިއްޔަތަކީ 1978 ވަނަ އަހަރުގެ ގާނޫނު އަސާސީގެ ދަށުން ލަންކާގައި މިހާތަނަށް ޕާޓީއަކަށް ލިބުނު އެންމެ ބޮޑު އަޣުލަބިއްޔަތެވެ.

ކެބިނެޓްގެ 22 މެމްބަރުންނާ ވާހަކަ ދައްކަވަމުން ޑިސަނަޔަކަ ވިދާޅުވީ މި ބޮޑު ބާރުގެ ސަބަބުން ކޮރަޕްޝަނާ ދިމާލަށް ގޮސްގެން ނުވާނެ ކަމަށެވެ.

"އިގްތިސާދީ ގޮތުންނާއި ސިޔާސީ ގޮތުން ނިކަމެތިވެފައި ތިބޭތާ އެތައް ދުވަހެއްވީ ރައްޔިތުންނަށްޓަކައި އަހަރެމެން މި ބާރުގެ ބޭނުންކުރަން ޖެހޭނީ ޒިންމާދާރުކަމާ އެކީގައި،" ރައީސް ވިދާޅުވި އެވެ.

އާ ކެބިނެޓުން 2025 ވަނަ އަހަރަށް ލަފާކުރާ ބަޖެޓު އެކުލަވާލުމުގެ މަސައްކަތް ފަށާއިރު ބެލެވިފައި ވަނީ ކުރީގެ ސަރުކާރުން ހޯދާފައިވާ އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ ބެއިލްއައުޓާ އެއްގޮތަށް އެކަން ކުރާނެ ކަމަށެވެ.

މި ބެއިލްއައުޓް ޕެކޭޖްގެ ދަށުން އިތުރު 330 މިލިއަން ޑޮލަރުގެ އިންސްޓޯލްމަންޓެއް ދޫކުރުމާ ގުޅޭ ގޮތުން އައިއެމްއެފްގެ ޓީމެއް އާ ސަރުކާރާ އެކު މިހާރު އަންނަނީ މަޝްވަރާކުރަމުންނެވެ.

ސްރީ ލަންކާއިން 2022 ވަނަ އަހަރުގެ އޭޕްރީލް މަހު އައިއެމްއެފްގެ ރެސްކިއު ޕެކޭޖް ހޯދަންޖެހުނީ 46 ބިލިއަން ޑޮލަރުގެ ބޭރުގެ ދަރަނި ދެއްކޭ ވަރަށް ބޭރު ފައިސާ ނެތި އެހެން ގޮތެއް ނެތުމުންނެވެ.

ޑިސަނަޔަކަ ކެމްޕެއިން ކުރައްވާފައި ވަނީ ކުރީގެ ރައީސް ރަނިލް ވިކްރަމަސިންހަ ހޯއްދެވި 2.9 ބިލިއަން ޑޮލަރުގެ ބެއިލްއައުޓާ މެދު އަލުން މަޝްވަރާ ކުރައްވާނެ ކަމުގެ ވައުދާ އެކުގަ އެވެ. ނަމަވެސް ވެރިކަމާ ހަވާލުވެވަޑައިގަތުމަށް ފަހު ނިންމެވީ ލޯނު ދީފައިވާ ބައިނަލްއަގްވާމީ އެކި ފަރާތްތަކާ މިހާރު ވެފައިވާ އެއްބަސްވުން ދެމެހެއްޓުމަށެވެ. އަދި އެކަމަށް ޕްރައިވެޓް ސެކްޓަރުގެ ވަރަށް ބޮޑު ތާއީދެއް ވަނީ ލިބިފަ އެވެ.