ލަންކާގެ ރައީސް މަޖިލީހުގެ ފުރިހަމަ ބާރު ވެސް ހޯދައިފި

ސްރީ ލަންކާގެ ރައީސް ކަމަށް ސެޕްޓެމްބަރު މަހު އިންތިހާބުވި އަނޫރާ ކުމާރަ ޑިސެނަޔަކަގެ ޕާޓީ އަށް މަޖިލީހުގެ އިންތިހާބުގައި ބޮޑު ކާމިޔާބީއެއް ލިބިއްޖެ އެވެ.

ވެރިކަމާ ހަވާލުވެ ވަޑައިގަތުމަށް ފަހު، ގާނޫނު ހަދާ މަޖިލިސް އުވާލައްވައި އިއްޔެ ބޭއްވެވި އަވަސް އިންތިހާބުގެ ދެބައިކުޅަ އެއްބަޔަށްވުރެ ގިނަ ވޯޓު ގުނާފައިވާއިރު، އަނޫރާގެ ނޭޝަނަލް ޕީޕަލްސް ޕަވަ (އެންޕީޕީ) ކޯލިޝަން ޕާޓީން ވަނީ 63 ޕަސެންޓާ އެކު ވޯޓުގެ ބޮޑު ލީޑެއް ލިބިފަ އެވެ.

ނަތީޖާ އިން ދައްކާ ގޮތުގައި އުވާލި މަޖިލީހުގައި އެންމެ ތިން ގޮނޑި އޮތް އެންޕީޕީ ވަނީ 225 މެމްބަރުންގެ މަޖިލީހުގެ ގާތްގަނޑަކަށް ކޮންމެ ދާއިރާއަކުން ވެސް ފަސޭހަކަމާ އެކު ކުރި ހޯދައިފަ އެވެ.

އަނޫރާ ވެރިކަމަށް ވަޑައިގަތީ ލަންކާއަށް އިގްތިސާދީ ކާރިސާއެއް ކުރިމަތިވުމުން އުފެދުނު ހަމަނުޖެހުންތަކުގައި އޭރުގެ ރައީސް ގޯޓާބަޔަ ރާޖަޕަކްސަ މަގާމުން އިސްތިއުފާ ދެއްވިތާ ދެ އަހަރު ފަހުން ބޭއްވި އިންތިހާބުގަ އެވެ. އޭނާ ވަނީ ކޮރަޕްޝަނާ ދެކޮޅަށް މަސައްކަތްކޮށް، ވަގަށް ނަގާފައިވާ މުދާ އަނބުރާ ހޯދާނެ ކަމަށް ވައުދުވެ ވަޑައިގެންފަ އެވެ.

އުމުރުން 55 އަހަރުގެ އަނޫރާ ކުރިން ވެސް ވަނީ އޭނާގެ ވައުދުތައް ފުއްދުމަށް ރައްޔިތުން އޭނާއަށް މަޖިލީހުގައި ބޮޑު އަޣުލަބިއްޔަތެއް ދޭނެ ކަމުގެ ޔަގީންކަން އެބަ އޮތް ކަމަށް ވިދާޅުވެފަ އެވެ.

"އަޅުގަނޑުމެން ގަބޫލުކުރާ ގޮތުގައި މިއީ ސްރީ ލަންކާއަށް ބޮޑު ބަދަލެއް ގެނައުމުގައި ވަރަށް މުހިންމު އިންތިހާބެއް،" ކޮލަމްބޯގައި ވޯޓުލެއްވުމަށް ފަހު ނޫސްވެރިންނާ ވާހަކަ ދައްކަވަމުން ޑިސަނަޔަކަ ވިދާޅުވި އެވެ.

ސްރީ ލަންކާގައި ސެޕްޓެމްބަރު މަހު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ ތެރެއިން ގާތްގަނޑަކަށް 80 ޕަސެންޓް މީހުން ވޯޓުލާފައި ވިޔަސް މި އިންތިހާބުގައި މި ނިސްބަތް 70 ޕަސެންޓަށްވުގެ ދަށް ކަމަށް އަންދާޒާކުރެވެ އެވެ.

ފުލުހުން ބުނީ ފާއިތުވި އަހަރުތަކުގެ ގިނަ އިންތިހާބުތަކާ ހިލާފަށް، ވޯޓު ލުމުގެ ނުވަ ގަޑިއިރު ތެރޭ އެއްވެސް ހަމަނުޖެހުމެއް ނުހިނގާ ކަމަށެވެ. ނަމަވެސް ޑިއުޓީގައި އުޅެނިކޮށް ބަލިވެގެން ފުލުހުންގެ ކޮންސްޓަބަލެއްގެ އިތުރުން އިލެކްޝަންގެ ތިން އޮފިޝަލަކު މަރުވެފައިވާ ކަމަށް ބުންޏެވެ.