އިންޑިއާއިން ހައިޕަސޮނިކް މިސައިލެއް ޓެސްޓުކޮށް ތާރީހުގެ ތެރެއަށް

ޗައިނާއިން އެ ގައުމުގެ ވައިގެ އަސްކަރިއްޔާގެ ގާބިލްކަން ދައްކާލިތާ މާ ގިނަ ދުވަހެއް ނުވެ، ވާދަވެރި އިންޑިއާ އިން ފުރަތަމަ ފަހަރަށް ހައިޕަސޮނިކް މިސައިލެއް މިއަދު ކާމިޔާބުކަމާ އެކު ޓެސްޓުކޮށްފި އެވެ.

ހައިޕަސޮނިކްސް އަކީ މިސައިލް ޓެކްނޮލޮޖީގެ އާ މަރުހަލާއެކެވެ. ބެލިސްޓިކް މިސައިލްތަކަށް ވުރެ ތިރިން އުދުހޭ އަދި ދެނެގަންނަން އުނދަގޫ މި މިސައިލް އަވަހަށް އަމާޒަށް ވާސިލްވުމުގެ އިތުރުން، ވައިގެ ތެރޭގައި އޮއްވައި އޭގެ ޓާގެޓް ބަދަލުކުރުމަށް ވެސް ކޮމާންޑް ދެވޭނެ އެވެ.

ނިއުކްލިއާ ގާބިލްކަން ލިބިފައިވާ އިންޑިއާއިން ޓެސްޓުކުރި ބާވަތުގެ ހައިޕަސޮނިކް މިސައިލް ޓެސްޓްކޮށްފައިވާ ގައުމުތަކުގެ ތެރޭގައި ހިމެނެނީ އެމެރިކާ، ރަޝިޔާ، ޗައިނާ އަދި އުތުރު ކޮރެއާ އެވެ. އަދި އެހެން ބައެއް ގައުމުތަކުން ދަނީ މި ޓެކްނޮލޮޖީ ތަރައްގީކުރަމުންނެވެ.

"ދުރުރާސްތާ ހައިޕަސޮނިކް މިސައިލް ފްލައިޓްގެ ފުރަތަމަ ޓްރަޔަލްއާ އެކު މިއީ ބޮޑު ކާމިޔާބީއެއް،" ޑިފެންސް މިނިސްޓަރު ރަޖްނަތު ސިންގް ނެރުއްވި ބަޔާނެއްގައި ވިދާޅުވި އެވެ.

މި ޓެސްޓްކޮށްފައިވަނީ ވާދަވެރި އަދި އަވަށްޓެރި ޗައިނާއިން އެއާޝޯއެއްގައި ވައިގެ އަސްކަރީ ގާބިލްކަން ދައްކާލާފައި ވަނިކޮށެވެ. މި އެއާޝޯގައި، ޖޭ-35އޭ ސްޓެލްތު ފައިޓާ ޖެޓާއި އެޓޭކް ޑްރޯންތައް ވެސް ދައްކާލި އެވެ.

މި ޝޯގައި ބެލިސްޓިކް މިސައިލާއި ހައިޕަސޮނިކް ގްލައިޑް ވެހިކަލްތައް ހުއްޓުވުމަށް ފަރުމާކޮށްފައިވާ އެޗްކިއު-19 ގެ ސާފޭސް ޓު އެއާ މިސައިލް ސިސްޓަމް ދައްކާލި ކަމަށް ޗައިނާގެ ދައުލަތުގެ މީޑިއާއިން ބުނެފައިވެ އެވެ.

އިންޑިއާގެ މިސައިލް އުދުއްސާލީ އިރުމަތީ އައްސޭރިފަށުގައި އޮންނަ އަބްދުލް ކަލާމް އައިލެންޑުންނެވެ.

އިންޑިއާގެ ޑިފެންސް ރިސާޗް އެންޑް ޑިވެލޮޕްމަންޓް އޯގަނައިޒޭޝަން (ޑީއާރްޑީއޯ) އިން ވަނީ މިސައިލް ޓެސްޓުކުރި މަންޒަރުގެ ވީޑިއޯ އާންމުކޮށްފަ އެވެ.

"މިއީ ތާރީހީ ވަގުތުކޮޅެއް. މި މުހިންމު ކާމިޔާބީގެ ސަބަބުން، މިފަދަ ކުރިއަރާފައިވާ އަސްކަރީ ޓެކްނޮލޮޖީތަކުގެ ގާބިލްކަން ލިބިފައިވާ މަދު ގައުމުތަކުގެ ތެރޭގައި މި ގައުމު ހިމެނިއްޖެ،" ސިންގް ވިދާޅުވި އެވެ.

އިތުރު ތަފްސީލެއް މިކަމާ ބެހޭ ގޮތުން ދީފައެއް ނުވެ އެވެ.

އިންޑިއާ އަކީ، އެސް-400 މިސައިލް ސިސްޓަމާއި އަސްކަރީ އެކި ހާޑްވެއާ ރަޝިޔާއިން އެތެރެކުރާ ގައުމެކެވެ. މިކަމާ ގުޅިގެން އެމެރިކާއިން ދަތިކުރުމުގެ ފިޔަވަޅު އަޅާފާނެ ކަމުގެ ބިރު ދެއްކުން އޮތަސް އިންޑިއާ އިން ބިލިއަން ޑޮލަރުގެ މުއާލަމާތް ރަޝިޔާއާ އެކު ކުރެ އެވެ.