ގަވައިދާ ހިލާފަށް އުޅުނު 5،000 ބިދޭސީން ޑީޕޯޓު ކޮށްފިން: މިނިސްޓަރު

ރައީސް ޑރ. މުހައްމަދު މުއިއްޒު މަގާމާ ހަވާލުވެވަޑައިގެންނެވި ދުވަހުން ފެށިގެން އެކި މައްސަލަތަކުގައި މިހާތަނަށް 5،000 އެއްހާ ބިދޭސީން ޑީޕޯޓު ކޮށްފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

މި ސަރުކާރަށް އަންނަ އާދިއްތަ ދުވަހު އަހަރެއް ފުރޭތީ ޕީއެސްއެމް މެދުވެރިކޮށް ގެނެސްދިން "ހަފްތާ 52" ޕްރޮގްރާމުގައި މިނިސްޓަރު އިހުސާން ވިދާޅުވީ ރައީސްގެ އިރުޝާދާ އެއްގޮތަށް އަމަލު ކުރުމުން މިދިޔަ އެއް އަހަރު ތެރޭ ވަރަށް ކާމިޔާބު މަސައްކަތްތަކެއް ކުރެވިފައިވާ ކަމަށެވެ. މިނިސްޓަރު ފާހަގަ ކުރެއްވި އެއް ކަމަކީ ބިދޭސީންގެ މައްސަލަ ހައްލު ކުރުމަށް މިދިޔަ އަހަރުގެ ނޮވެމްބަރު 17 އިން ފެށިގެން ކުރި މަސައްކަތެވެ.

"ގަވައިދާ ހިލާފަށް ވިޔަފާރި، ކުދި ވިޔަފާރިތައް ކުރަމުން އައި، ކުށްތަކަށް އަރައިގަންނަމުން އައި ބިދޭސީން، އަޅުގަނޑުމެން ވާނީ ހިފާ ހައްޔަރުކޮށް 48 ގަޑިއިރު ތެރޭ ރާއްޖެއިން ބޭރު ކުރެވޭނެ ނިޒާމެއް ގާއިމް ކޮށްފައި،" އިހުސާން ވިދާޅުވި އެވެ.

ރާއްޖޭގައި ގަވައިދާ ހިލާފަށް އުޅެމުން ދިޔަ ބިދޭސީންގެ ތެރެއިން 5،000 އެއްހާ ބިދޭސީން މިދިޔަ އެއް އަހަރު ތެރޭ ޑީޕޯޓު ކޮށްފައިވާ ކަމަށް މިނިސްޓަރު ވިދާޅުވި އެވެ.

ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް މުޅި ރާއްޖޭގައި 138 ރަށުގައި މައުލޫމާތު އެއްކުރުމުގެ މަސައްކަތް ކުރިއަށް ގެންދާ ކަމަށް އިހުސާން ވިދާޅުވި އެވެ. މިހާތަނަށް 10،000 އަށް ވުރެ ގިނަ ބިދޭސީންގެ މައުލޫމާތު އެއްކޮށްފައިވާ ކަމަށާއި ރާއްޖޭގައި ދިރިއުޅޭ ހުރިހާ ބިދޭސީންގެ މައުލޫމާތު އަންނަ އަހަރުގެ އޭޕްރީލްގެ ނިޔަލަށް ނަގައި ނިންމޭނެ ކަމަށް ވެސް މިނިސްޓަރު ވިދާޅުވި އެވެ.

ފުރުވާލާފައިވާ ބިދޭސީންގެ ތެރޭގައި ގަވާއިދާ ހިލާފަށް، ސައްހަ ވިސާއެއް ނެތި ރާއްޖޭގައި އުޅެމުންދާ ބިދޭސީންނާއި އެކިއެކި ކުށްތަކަށް އަރައިގެންފައިވާ ބިދޭސީން ހިމެނެ އެވެ. އޭގެ ތެރޭގައި ވައްކަމާއި މަސްތުވާތަކެތީގެ މައްސަލަ އާއި ހަށި ވިއްކުމުގެ ވިޔާފާރީގައި ޝާމިލުވާ ބިދޭސީން އެ އޮޕަރޭޝަނުގައި ޑީޕޯޓް ކޮށްފައިވެ އެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް، ރައީސް މުއިއްޒުގެ އިރުޝާދުގެ ދަށުން ކުރަމުން އަންނަ މަސައްކަތުގެ ތެރެއިން، ބިދޭސީން ދިރިއުޅޭ ތަންތަންނާއި މަސައްކަތްކުރާ ތަންތަން ވެސް އިމިގްރޭޝަނުން އަނަނީ ބަލައި ފާސް ކުރަމުންނެވެ.