އިރާގުގެ އަބޫ ޣުރައިބު ޖަލުގައި އަނިޔާކުރި މައްސަލައިގައި 42 މިލިއަން ޑޮލަރުގެ ބަދަލެއް

އިރާގުގެ އަބޫޣަރައިބު ޖަލުގައި އަނިޔާ ލިބުނު އިރާގުގެ ތިން މީހަކަށް ބަދަލުގެ ގޮތުގައި 42 މިލިއަން ޑޮލަރު ދިނުމަށް އެމެރިކާގެ ދިފާއީ ކޮންޓްރެކްޓަރަކަށް ފެޑެރަލް ޖޫރީއަކުން އަންގާރަ ދުވަހު އަމުރުކޮށްފި އެވެ.

ސެންޓަ ފޯ ކޮންސްޓިޓިއުޝަނަލް ރައިޓްސް އިން ބުނީ "ސީއޭސީއައި ޕްރިމިއާ ޓެކްނޮލޮޖީ އިންކް" މި އަނިޔާގެ ޒިންމާ ނަގަން ޖެހޭ ކަމަށް ކަނޑައަޅާފައިވަނީ ދައުވާކުރި ތިން މީހުންނަށް 2003 ވަނަ އަހަރާއި 2004 ވަނަ އަހަރު ޖަލުގައި ދިން އަނިޔާތަކާ ގުޅޭ ގޮތުން ކުރި ދިގު ތަހުގީގަކަށް ބަލައި ކަމަށެވެ.

އެ ސެންޓަރުން ނެރުނު ބަޔާނެއްގައި ބުނީ މިޑްލް ސްކޫލުގެ ޕްރިންސިޕަލެއް ކަމަށްވާ ސުހައިލް އަލް ޝިމާރީ އާއި މޭވާގެ ވިޔަފާރިކުރާ އައްސަދު ޒުބާއީ އާއި ނޫސްވެރިއެއް ކަމަށްވާ ސަލާހު އަލް އިޖައިލީ އަށް ބަދަލުގެ ގޮތުގައި 14 މިލިއަން ޑޮލަރު ދޭން އަމުކުރި ކަމަށެވެ.

މި ތިން މީހުން ދައުވާކުރީ އޭރު ޖަލު ބެލެހެއްޓި ޑިފެންސް ކޮންޓްރެކްޓަރު ސީއޭސީއައިއާ ދެކޮޅަށް 2008 ވަނަ އަހަރު އެވެ.

ބަޣުދާދުގެ ހުޅަނގުގައި އޮންނަ އަބޫ ޣަރައިބު ޖަލަކީ އިރާގުގައި އެމެރިކާ ސިފައިން މީހުން ބަންދުކޮށްގެން ގެންގުޅުނު އިރު ލާއިންސާނީ އަނިޔާތައް ދިން ކަމުގެ ހެކިތައް ހާމަވެ، އިރާގުގައި އެމެރިކާއިން ކުރި ކަންކަމަށް ތަސައްވުރު އިތުރަށް ނުރަނގަޅުވާން މެދުވެރިވި ތަނެކެވެ.

އެ ޖަލުގެ ގައިދީންނަށް އެންމެ ބޮޑަށް އަނިޔާ ދީފައިވަނީ ސީއޭސީއައިގެ މުވައްޒަފުން ޖަލުގައި މަސައްކަތް ކުރަމުން ދަނިކޮށް، 2003 ވަނަ އަހަރުގެ ފަހުކޮޅު އެވެ. އެ ކުންފުނީގެ މަދަނީ މުވައްޒަފުންގެ މައްޗަށް ތުހުމަތުކޮށްފައި ވަނީ ގައިދީންނާ ސުވާލުކުރުމަށް ތައްޔާރުކުރުމަށް ކަމަށް ބުނެ އެ މީހުންނަށް ގޯނާކުރުމަށް އެމެރިކާ ސިފައިންނަށް ހިތްވަރު ދިން ކަމަށެވެ.

ކުރީގެ އާމީ ރިޒާވް ސްޕެޝަލިސްޓް ލިންޑީ އިންގްލެންޑް ހިމެނޭ ގޮތަށް ދަށު ފަންތީގެ 11 ގާޑުންގެ މައްޗަށް ޖިނާއީ ދައުވާ ވެސް ވަނީ އުފުލައިފަ އެވެ. -- އޭއެފްޕީ