އީރާނަށް ހަމަލާ ނުދޭނެ ކަމަކަށް އެމެރިކާއިން ނުބުނި

އެމެރިކާ ސިފައިންނަށް ހަަމަލާދޭ "އީރާންގެ މަދަދު ލިބޭ" ގްރޫޕްތަކާ ދެކޮޅަށް ދޭ ހަމަލާތައް އަދި ނިމުނީ ނޫން ކަމަށް ވައިޓް ހައުސްގެ ނެޝަނަލް ސެކިއުރިޓީ އެޑްވައިޒަރު ޖޭކް ސުލީވިއަން އިއްޔެ ވިދާޅުވެއްޖެ އެވެ. އެކަމަކު އީރާނަށް ހަމަލާ ދޭނެތޯ ކުރި ސުވާލަށް އޭނާ ޖަވާބެއް ނުދެއްވި އެވެ.

ރަތްކަނޑުގައި އުޅަނދުތަކަށް ހަމަލާދޭ ޔަމަންގެ ހޫތީންނަށް އެމެރިކާ އާއި އިނގިރޭސި ވިލާތް ގުޅިގެން ހަމަލާ ދެމުން ގެންދާއިރު އެމެރިކާއިން ވަނީ އެ ގައުމުން ޖޯޑަންގައި ހިންގާ އަސްކަރި މަރުކަޒަކަށް ޑްރޯން ހަމަލާއެއްދީ ސިފައިންގެ ތިން މީހަކު މަރާލުމާ އެކު އެކަމުގެ ބަދަލު ހިފުމަށް ސީރިއާ އާއި އިރާގުގެ ބޯޑަރު ސަރަހައްދަށް ހަމަލާތައްދީ އެތައް ބަޔަކު މަރާލައިފަ އެވެ.

އެމެރިކާއިން ބުނަނީ ސިފައިންނަށް ހަމަލާދިނީ އީރާނުން އެހީވާ ހަނގުރާމަވެރި ޖަމާއަތްތަކުން ކަމަށާއި ހަމަލާތައް އަމާޒުކުރީ އެ ޖަމާއަތްތަކުން ބޭނުންކުރާ ތަންތަނަށް ކަމަށެވެ.

"އެއީ އަދި ހަމަލާތަކުގެ ނިމުމެއް ނޫން. އެމެރިކާ ބޭނުންވަނީ އަަހަރެމެންގެ ސަލާމަތީ ބާރުތަކަށް ހަމަލާއެއް ދީފި ނަމަ އެކަމުގެ ރައްދު ދޭނެ ކަމުގެ ސާފު މެސެޖު ދޭން،" އެންބީސީއަށް ދެއްވި އިންޓަވިއުއެއްގައި ސުލީވިއަން ވިދާޅުވި އެވެ.

އޭބީސީ އަށް ދެއްވި އިންޓަވިއުއެއްގައި ވެސް މި މައްސަލައިގައި ވާހަކަ ދައްކަވަމުން ސުލީވިއަން ވިދާޅުވީ ދިން ހަމަލާތަކުގެ ނަތީޖާ ރަނގަޅު ކަމަށާއި އެގޮތަށް ދޭ ހަމަލާތަކުން ހަނގުރާމަވެރި ގްރޫޕްތަކުގެ ބާރު ދަށްކުރެވޭ ކަމަށެވެ.

އެމެރިކާއިން ވަނީ އިރާގާއި ސީރިއާގެ ހަތް ސަރަހައްދަކުން 85 ތަނަކަށް ހަމަލާ ދީފަ އެވެ. ދިފާއީ ވުޒާރާ ޕެންޓަގަން އިން ބުނީ ހަމަލާ ދިން ތަންތަނުގެ ތެރޭގައި ހަނގުރާމަވެރިން ތަމްރީން ހަދާ ތަންތަނާއި ހަތިޔާރު ރައްކާކޮށްފައި ހުންނަ ތަންތަން ވެސް ހިމެނޭ ކަމަށެވެ. އެކަމަކު އެއްވެސް ހަމަލާއެއް، ހަނގުރާމަވެރިންނަށް އެހީވާ ކަމަށް ބުނާ އީރާންގެ ސަރަހައްދު ތެރެއަށް ދީފައެއް ނުވެ އެވެ.

ހަމަލާތަކުގައި އާންމުންގެ އެތައް ބަޔަކު މަރުވި ކަމަށް އިރާގުން ބުނެފައި ވިޔަސް ސުލީވިއަން ވިދާޅުވީ އެކަން ކަށަވަރުނުވާ ކަމަށާއި އެކަމަކު ހަމަލާތައް އަމާޒުކުރި ތަންތަނަކީ ހަނގުރާމަވެރިން ބޭނުންކުރާ ތަންތަން ކަމުގެ ޔަގީންކަން އެބަ އޮތް ކަމަށެވެ. --އޭއެފްޕީ