އެމެރިކާގެ އެކަކު ވެސް އިރާގުގައި ހުރުމަކީ ގޯހެއް: ޚާމަނާއީ

އެމެރިކާގެ "އެންމެ ރައްޔިތަކު ވެސް" އިރާގުގައި ހުރުމަކީ ވަރަށް ބޮޑު ގޯހެއް ކަމަށާއި، އެންމެ މީހަކީވެސް ވަރަށް ބޮޑު އަދަދެއް ކަމަށް އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އިއްޔެ ވިދާޅުވެއްޖެ އެވެ.

ރަސްމީ ދަތުރުފުޅެއްގައި މިހާރު އީރާނަށް ވަޑައިގެން އުޅުއްވާ އިރާގުގެ ރައީސް އަބްދުއްލަތީފް ރަޝީދުއާ އެކު ވެރިރަށް ތެހްރާންގައި އިއްޔެ ބޭއްވި ރަސްމީ ބައްދަލުކުރެއްވުމުގައި ޚާމަނާއީ ވިދާޅުވީ އެމެރިކާއަކީ ރަހުމަތްތެރިއެއްގެ ގޮތުގައި ބަލަން ހެޔޮވާ ވަރުގެ ގައުމެއް ނޫން ކަމަށެވެ.

"އެމެރިކާ މީހުންނަކީ އެއްވެސް ބަޔަކާ ރަހްމަތްތެރި ބައެއް ނޫން، އަދި އެންމެ ކުޑަމިނުން ޔޫރަޕްގައި ތިބި އެމެރިކާގެ ބައިވެރިންނަށް ވެސް އެމެރިކާ ވަފާތެރިއެއް ނުވޭ،" ޚާމަނާއީ ވިދާޅުވި އެވެ.

އިރާގުގައި އެމެރިކާ މީހުން ތިބުމާ ދެކޮޅަށް ޚާމަނާއީ މި ވާހަކަ ދެއްކެވީ، އިރާގުގައި ތިބި އެމެރިކާ ސިފައިން އިތުރު މުއްދަތަކަށް އިރާގުގައި ބައިތިއްބަން ހަމަޖެހިފައިވާ ކަމަށް، އެމެރިކާގެ ދިފާއީ ވަޒީރު ލޮއިޑް އޮސްޓިން މިދިޔަ މަހުގެ ތެރޭގައި ވިދާޅުވެފައި ވަނިކޮށެވެ.

ޚާމަނާއީއާ ބައްދަލުކުރެއްވުމަށް ފަހު، އިރާގުގެ ރައީސްގެ ފަރާތުން ނެރުނު ރަސްމީ ބަޔާނެއްގައި، އިރާގާއި އީރާނާ ދެމެދު ގާތް ބަދަހި ގުޅުމެއް އޮތުމުގެ މުހިންމުކަން ފާހަގަކުރައްވާފައިވެ އެވެ. ނަމަވެސް އިރާގުގައި އެމެރިކާ ސިފައިން ތިބުމާ ދެކޮޅަށް ޚާމަނާއީ ދެއްކެވި ވާހަކަތަކާ ބެހޭ ގޮތުން އެއްވެސް ވާހަކައެއް ނެތެވެ.

އިރާގުގައި އެމެރިކާ ސިފައިން ތިބުމާ ދެކޮޅަށް އީރާނުން މީގެ ކުރިން ވެސް ވާހަކަ ދައްކާފައިވާ އިރު، އެމެރިކާގެ ދިފާއީ ވަޒީރު ލޮއިޑް އޮސްޓިން މިދިޔަ މަހުގެ ތެރޭގައި އިރާގުގެ ވެރިރަށް ބަޣުދާދަށް ވަޑައިގެންނެވި އެވެ. ދިފާއީ ވަޒީރު ލޮއިޑް އަކީ ރައީސް ބައިޑެން އެމެރިކާގެ ވެރިކަމާ ހަވާލުވެވަޑައިގެންނެވި ފަހުން، އިރާގަށް ވަޑައިގެންނެވި އެމެރިކާގެ އެންމެ މަތީ ފެންވަރުގެ ބޭފުޅާ އެވެ.

އެމެރިކާ ސިފައިން އިރާގަށް އަރައިގަނެ، އެ ގައުމުގެ އެތައް ހާސް ބަޔަކު މަރާލައި، ކުރީގެ ރައީސް ސައްދާމް ހުސައިންގެ ވެރިކަން ވައްޓައިލިތާ، 20 އަހަރު ފުރުނީ މިދިޔަ މަހުގެ ތެރޭގަ އެވެ. އެ މުނާސަބާ ފާހަގަކުރުމަށް ދިފާއީ ވަޒީރު ބަޣުދާދަށް ކުރެއްވި ޒިޔާރަތުގައި ވިދާޅުވެފައިވަނީ، އެމެރިކާ ސިފައިން މިހާރު އިރާގުގައި ތިބީ އިރާގު ސަރުކާރުގެ ދައުވަތަކަށް ކަމަށެވެ.

އަދި އެމެރިކާ ސިފައިން މިހާރު އިރާގުގައި ތިބީ ހަނގުރާމަވެރި ލަޝްކަރެއްގެ ގޮތުގައި ނޫން ކަމަށާއި، އޭގެ ބަދަލުގައި އެމެރިކާ ސިފައިންގެ ދައުރަކީ، އިރާގުގެ އަސްކަރިއްޔާ އަށް ބޭނުންވާ ލަފަޔާއި އިރުޝާދު ދިނުން ކަމަށް ވެސް އޭނާ ވިދާޅުވި އެވެ.

އެމެރިކާ ސިފައިން އިރާގުގައި ތިބެނީ އިރާގު ސަރުކާރުގެ އެދުމުގެ މަތިން ކަމަށް އެމެރިކާ އިން ބުނި ނަމަވެސް، އިރާގު ސަރުކާރަށް އެނގުމެއް ނެތި، އިރާގުގެ ތެރޭގައި އެމެރިކާ ސިފައިން އަސްކަރީ ހަރަކާތްތައް ހިންގަމުން ގެންދާތީ، އިރާގުގެ އެކި ފެންވަރުގެ ވެރިން އަންނަނީ ނުރުހުން ފާޅުކުރަމުންނެވެ.