މުޒާހަރާތަކުގެ އަޑީގައި އެމެރިކާ އާއި އިޒްރޭލު: ޚާމަނާއީ

އީރާން ސަރުކާރާ ދެކޮޅަށް އެ ގައުމުގެ އެކި ސަރަހައްދުތަކުގައި މިހާރު ކުރަމުންދާ މުޒާހަރާތަކަކީ، އެމެރިކާ އާއި އިޒްރޭލު އަޑީގައި އޮވެގެން ބަޔަކު ލައްވައި ދުރާލައި ރާވައިގެން ހިންގާ ހަރަކާތްތަކެއް ކަމަށް، އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އިއްޔެ ތުހުމަތު ކުރައްވައިފި އެވެ.

އީރާންގެ އާންމުން މުޒާހަރާ ކުރަން ފެށީ، ސަރުކާރުގެ މިންގަނޑާ ޚިލާފަށް ބުރުގާ އަޅައިގެން އުޅެނިކޮށް މިދިޔަ ސެޕްޓެމްބަރު މަހުގެ 13 ވަނަ ދުވަހު ހައްޔަރުކުރި، މަހްސާ (ޒީނީ) އަމީނީ، 22، ފުލުހުންގެ ބެލުމުގެ ދަށަށް ގެންގޮސް ކުރި އަނިޔާތަކުގެ ސަބަބުން މަރުވުމާ ގުޅިގެންނެވެ. އޭނާ މަރުވީ، ފުލުހުންގެ އަނިޔާތަކުން އޭނާގެ ސިކުޑިއަށާއި އެތެރެ ހަށްޓަށް ލިބުނު ގެއްލުންތަކަށް ހޮސްޕިޓަލުގައި ފަރުވާ ދެމުން އަންނަނިކޮށް، ސެޕްޓެމްބަރު މަހުގެ 16 ވަނަ ދުވަހު އެވެ.

ޚާމަނާއީ ތުހުމަތު ކުރެއްވި ގޮތުގައި އީރާންގެ އެތެރޭގައި ހަމަނުޖެހުން އުފައްދައިގެން އެމެރިކާ އާއި އިޒްރޭލުން މަސައްކަތް ކުރަނީ، އީރާނުން ހޯދަމުން އަންނަ ކުރިއެރުންތައް ހުއްޓުވުމަށެވެ. އަދި މިހާރު އެ ގައުމުގައި ސަރުކާރާ ދެކޮޅަށް ކުރަމުންދާ މުޒާހަރާތަކަކީ، މިދިޔަ އަހަރުތަކުގެ ތެރޭގައި އެ ގައުމުގައި ކުރާ އެންމެ ބޮޑު މުޒާހަރާ ކަމަށް ވެސް ޚާމަނާއީ ވިދާޅުވި އެވެ.

"އަޅުގަނޑު ވަރަށް ސާފުކޮށް މި ދަންނަވަނީ، މިހާރު މި ހިންގާ ހަމަނުޖެހުންތަކާއި އަމަން ނަގައިލުމުގެ ޙަރަކާތްތަކަކީ، އެމެރިކާ އާއި ވަހްމީ ސަހްޔޫނީ އިސްތިއުމާރީ ވެރިކަމުގެ (އިޒްރޭލު) ފަރާތުން ރާވައިގެން ހިންގާ ކަންތައްގަނޑެއް. އަދި އެކަމުގައި އެމީހުންނާ ބައިވެރިވަނީ އެ ފަރާތްތަކުން މާލީ މަންފާ ލިބޭ މީހުންނާއި، ގައުމުން ބޭރުގައި ދިރިއުޅޭ އީރާނުގެ ޣައްދާރުން،" ވެރިރަށް ތެހެރާންގައި ހުންނަ އަސްކަރީ ޔުނިވަސިޓީން ދަރިވަރުވި ސިފައިންގެ ދަސްވެނިވުމުގެ ރަސްމިއްޔާތުގައި ޚާމަނާއީ އިއްޔެ ވިދާޅުވި އެވެ.

އޭނާ ވިދާޅުވީ ތަހުގީގަށް ހައްޔަރުކުރި އަންހެނަކު މަރުވި ހާދިސާއަކީ ވަރަށް ހިތާމަވެރިކޮށް ހިނގި ހާދިސާއެއް ކަމަށެވެ. ނަމަވެސް އެކަމާ ގުޅިގެން އުފެދިގެން އުޅެނީ އާދައިގެ ކަންތަކެއް ނޫން ކަމަށް ވެސް އޭނާ ވިދާޅުވި އެވެ.

"ހިތާމަވެރި ހާދިސާއެއް މެދުވެރި އަންހެނަކު މަރުވުމުން އަޅުގަނޑުމެންނަށް ވެސް ވަރަށް ބޮޑު ހިތާމައެއް ލިބުނު. އެކަމަކު އެ މަރުގެ ތަހުގީގު ވެސް ނުނިމެނީސް، އެކަމާ ދެކޮޅު ހަރަކާތްތައް ފެށިއްޖެ. ބަޔަކު މީހުން މަގުތަކަށް ނުކުމެއް މުޖްތަމައުގެ އަމާންކަން ނަގާލައިފި. ގުރުއާން އަންދާލައި، ބުރުގާ އަޅައިގެން ތިބި އަންހެނުން ބުރުގާތައް ބާލައިފި. އަދި މިސްކިތްތަކުގައި ހުޅުޖަހައި، ކާރުތަކުގައި ވެސް ހުޅުޖަހައިފި. އެއީ އާދައިގެ ކަމެއް ނޫން. މަރަކާ ގުޅިގެން އާންމު ގޮތެއްގައި މީހުންގެ ނުރުހުން ފާޅުކުރާ ގޮތެއް ނޫން."

މަހްސާ (ޒީނީ) އަމީނީގެ މަރުގެ މައްސަލައިގައި އާންމުން ކުރަމުން ދާ މުޒާހަރާތައް ހުއްޓުވުމަށް އީރާންގެ ސިފައިންނާއި ފުލުހުން ދަނީ ހާލަތާ ނުބައްދަލު ބާރުގެ ބޭނުންކުރަމުންނެވެ. ކަރުނަގޭހާއި މުގުރު ބޭނުންކުރުމުގެ އިތުރުން، މުޒާހަރާގެ ބައިވެރިންގެ ތެރެއަށް ފުލުހުން ބަޑިޖަހަމުންދެ އެވެ.

އީރާންގެ އިންސާނީ ހައްގުތަކާ ބެހޭ ޖަމިއްޔާ އިން ބުނި ގޮތުގައި، މުޒާހަރާތައް މައިތިރި ކުރުމަށް ފުލުހުން ހަމަލާ ދިނުމުގެ ސަބަބުން މިހާތަނަށް މަދުވެގެން 133 މީހަކު މަރުވެއްޖެ އެވެ. އޭގެ ތެރޭގައި ކުޑަކުދިންނާއި އަންހެނުން ވެސް ހިމެނެ އެވެ. އޭގެ އިތުރުން ފުލުހުން ވަނީ އެތައް ސަތޭކަ އަންހެނުން ހައްޔަރުކޮށް ޖިސްމާނީ އަދި ޖިންސީ އަނިޔާކޮށްފައި ކަމަށް، އެ ޖަމިއްޔާ އިން ބުނެ އެވެ.