ޚާމަނާއީ ވާހަކަ ދައްކަވައިފި؛ އެމެރިކާއަށް ލިބުނު މޮޅެއް ނެތް!

އިޒްރޭލާއި އީރާނާ ދެމެދު ކުރި ހަނގުރާމައަށް ފަހު އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ ފުރަތަމަ ފަހަރަށް ވާހަކަ ދައްކަވައިފި އެވެ.

އީރާންގެ ދައުލަތުގެ މީޑިއާ މެދުވެރިކޮށް ދެއްވި ބަޔާނުގައި ޚާމަނާއީ ވިދާޅުވީ އިޒްރޭލާއި އީރާނާ ދެމެދު ބަދަލުކުރި ހަމަލާތަކުގެ ތެރެއަށް އެމެރިކާ ވަދެ އީރާނަށް ހަމަލާ ދިނީ ޒަޔަނިސްޓް ދައުލަތް އެކީ ނެތި ހިނގައިދާނެ ކަމުގެ ބިރަށް ކަމަށާއި އެމެރިކާއަށް މި ހަނގުރާމައިން ލިބުނު އެއްވެސް މޮޅެއް ނެތް ކަމަށެވެ.

"މި ހަނގުރާމައިން އެމެރިކާއަށް ލިބުނު އެއްވެސް މޮޅެއް ނެތް،" ހަނގުރާމަ ކާމިޔާބުކުރީ އީރާނުން ކަމަށް އިއުލާނުކުރައްވަމުން ޚާމަނާއީ ވިދާޅުވި އެވެ.

އޭނާ ވިދާޅުވީ މި ހަނގުރާމަ އަކީ އެމެރިކާގެ މޫނުމަތީގައި ޖެހުނު ވަރުގަދަ އެތިފަހަރެއް ކަމަށެވެ.

އެމެރިކާއިން އީރާނަށް ބޮން އަޅައިގެން ލިބުނު ކަމަށް ބުނާ ގެއްލުންތަކުގެ ވާހަކަ އެމެރިކާގެ ރައީސް ޑޮނަލްޑް ޓްރަމްޕު ދައްކަވާއިރު އެއީ މިނަށްވުރެ ބޮޑުކޮށްލައިގެން ދައްކަވާ ވާހަކަތަކެއް ކަމަށް ވެސް ޚާމަނާއީ ވިދާޅުވި އެވެ.

"އެމެރިކާގެ ރައީސް ގެންދަވަނީ ހަމަލާތަކުގެ ނަތީޖާ ކަމަށް ވިދާޅުވެ އާދަޔާ ހިލާފް ގޮތްގޮތަށް ވާހަކަ ދައްކަވަމުން. މިކަމުން އެނގެނީ މިނަށްވުރެ މިކަން ބޮޑުކޮށްލައިގެން އުޅޭކަން،" އިޒްރޭލާއި އީރާނުން 12 ދުވަހަށް ފަހު ހަމަލާތައް ހުއްޓާލިތާ ދެ ވަނަ ދުވަހު ދެއްވި ބަޔާނުގައި ޚާމަނާއީ ވިދާޅުވި އެވެ.

ހަނގުރާމައިން އެމެރިކާއަށް ލިބުނު މޮޅެއް ނެތް ކަމަށް ވިދާޅުވެ ޚާމަނާއީ ވަނީ ނިއުކްލިއާ ފެސިލިޓީތަކަށް ވެސް ފާހަގަކުރެވޭ ވަރުގެ ބޮޑު ގެއްލުމެއް ނުވާ ކަމަށް ވިދާޅުވެފަ އެވެ.

"އީރާނުން ކާމިޔާބީ ހޯދައިފި. އީރާންގެ ރައްދު ހަމަލާ އަކީ އެމެރިކާގެ މޫނުމަތީގައި ޖެހުނު ވަރުގަދަ އެތިފަހަރެއް،" ގަތަރުގައި އެމެރިކާއިން ގާއިމުކޮށްފައިވާ، މެދުއިރުމަތީގައި ހުންނަ އެ ގައުމުގެ އެންމެ ބޮޑު އަސްކަރީ މަރުކަޒަށް އީރާނުން ދިން ހަމަލާއަށް އިޝާރާތްކުރައްވަމުން ޚާމަނާއީ ވިދާޅުވި އެވެ.

އީރާންގެ ހަމަލާތަކުގެ ސަބަބުން ޔަހޫދީ ދައުލަތް "ގާތްގަނޑަކަށް ފުނޑުފުނޑު ވެފައި" ވާ ކަމަށް ވިދާޅުވެ ޚާމަނާއީ ވަނީ މުޅި އީރާނަށް މަރުހަބާ ވިދާޅުވެފަ އެވެ.

އީރާންގެ ނިއުކްލިއާ މަރުކަޒުތަކަށް އިޒްރޭލާއި އެމެރިކާއިން ދިން ހަމަލަތަކާ އެކު ފެށުނު ހަނގުރާމައިގެ ކާމިޔާބީ ޚާމަނާއީ އިއުލާނުކުރެއްވި އިރު އިޒްރޭލުން ވެސް ވަނީ ކާމިޔާބުވީ އެ މީހުންނަށް ކަމަށް ބުނެފަ އެވެ. އީރާންގެ ނިއުކްލިއާ މަޝްރޫއު އެތައް އަހަރެއް ފަހަތަށް ޖައްސާލެވިފައިވާ ކަމަށާއި އީރާނަށް ދުވަހަކު ވެސް ނިއުކްލިއާ ހަތިޔާރު ނުހޯދޭނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ބުނެފަ އެވެ.