ފަސް އަހަރު ފަހުން ދަރުމަވަންތަ ހޮސްޕިޓަލް ރަސްމީކޮށް ހުޅުވަނީ

މަސައްކަތް ނިންމައި ބޭނުންކުރަން ފެށިތާ ފަސް އަހަރު ފަހުން ދަރުމަވަންތަ ހޮސްޕިޓަލް މި މަހު ރަސްމީކޮށް ހުޅުވަން ސަރުކާރުން ނިންމައިފި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި އިމާރާތްކުރި 25 ބުރީގެ ހޮސްޕިޓަލް ހުޅުއްވައި ދެއްވާނީ ރައީސް ޑރ. މުހައްމަދު މުއިއްޒު ކޮޕް ސަމިޓަށް އަޒަރުބައިޖާނަށް ކުރައްވާ ދަތުރުފުޅަށް ފަހު ކަމަށް އެނގިފައި ވެ އެވެ.

އެ ހޮސްޕިޓަލް ރަސްމީކޮށް ހުޅުވަން އެމްޑީޕީގެ ސަރުކާރުގައި ވެސް ތާރީހުތަކެއް ދިނެވެ.

އެކަމަކު، އިދިކޮޅު ޕާޓީއެއްގެ ގޮތުގައި އެމްޑީޕީ އޮތް ދުވަސްވަރު، ދަރުމަވަންތަ ހޮސްޕިޓަލަކީ "ކޮރަޕްޝަންގެ ބިނާއެއް" ގެ ގޮތުގައި އެ ޕާޓީގެ އިސްވެރިން ސިފަކުރައްވާފައިވާތީއާ އެކު، 2019 ވަނަ އަހަރުގެ ކުރީކޮޅުން ފެށިގެން ހޮސްޕިޓަލް ބޭނުންކުރަން ފެށީ ރަސްމީކޮށް ނުހުޅުވަ އެވެ.

އައިޖީއެމްއެޗުގައި މީގެ ކުރިން ހިންގި ގިނަ ޑިޕާޓްމަންޓުތަކެއް ވަނީ ދަރުމަވަންތައިގެ އެކި ފްލޯތަކަށް ބަދަލުކޮށްފަ އެވެ. އޭގެ އިތުރުން، އެންމެ ޒަމާނީ ފެންވަރުގެ ހައިބްރިޑް ތިއޭޓަރުގެ ބައެއް ސާމާނުތައް ބަދަލުކުރުމަށްފަހު އެ ތިއޭޓަރު ވެސް ބޭނުންކުރަން މިދިޔަ މަހު ވަނީ ފަށައިފަ އެވެ.

ދަރުމަވަންތަ ހޮސްޕިޓަލްގެ އިމާރާތްކުރަން ފެށީ ޔާމީންގެ ވެރިކަމުގައި، އެ މަނިކުފާނުގެ އިސްނެންގެވުމުގެ މަތިން ކަމަށް ވިޔަސް އެ ތަން ބޭނުންކުރަން ފެށޭވަރުވީ އެމްޑީޕީގެ ވެރިކަމުގެ ކުރީކޮޅު އެވެ.

ދަރުމަވަންތަ ރަސްމީކޮށް ހުޅުވުމާ ގުޅޭގޮތުން ސަރުކާރުގެ ބަހެއް ނުލިބެ އެވެ. އެކަމަކު، އެ ތަން އެއްކޮށް ބޭނުންކުރަން ފަށައި، މި މަހުގެ 17 ގައި އެ ތަން ހުޅުވުމަށް އަންނަނީ ތައްޔާރުވަމުންނެވެ.

މާލެ ސަރަހައްދުގެ ހޮސްޕިޓަލް ގްރޫޕުން މިދިޔަ މަހު ބޭއްވި ޕްރެސް ކޮންފަރެންސްގައި ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ ދަރުމަވަންތަ ހޮސްޕިޓަލް ހުޅުވިތާ އަހަރުތަކެއް ވެގެން ދިއަސް އެ ތަން އަދި ވެސް ފުރިހަމައަށް ބޭނުން ނުކުރާ ކަމަށެވެ.

އޭނާ ވިދާޅުވީ މުވައްޒަފުންނާއި ބައެއް ތަކެތީގެ ދަތިކަމާ ހެދި ހޮސްޕިޓަލުގެ 17 ވަނަ ފްލޯ އިން 19 ވަނަ ފްލޯއާ ހަމައަށް ބޭނުން ނުކުރާ ކަމަށެވެ.

"ސަރުކާރުގެ ހައި ޕްރިއޮރިޓީއެއް ދަރުމަވަންތަ ހޮސްޕިޓަލް ފުލް ފަންކްޝަނަލްޓީ އަށް މި އަހަރު ގެނައުން. އެ ގޮތުން އިރާދަކުރެއްވިއްޔާ އަޅުގަނޑުމެން މި ފަށަނީ 17،18 އަދި 19 ފްލޯއާ އެކީގައި،" ހަލީމް ވިދާޅުވި އެވެ.

ހޮސްޕިޓަލްގެ 17 ވަނަ ފްލޯގައި 16 އެނދުގެ އެންއައިސީޔޫ އާއި ހަ އެނދުގެ ޑެލިވަރީ ސުއިޓް އަދި 18 އާއި 19 ވަނަ ފްލޯގައި ވެސް 14 އެނދު ބަހައްޓާނެ އެވެ.