މަދަނީ އަދުލުގެ ނިޒާމު ހުއްޓި، މައްސަލަތައް ފުނިޖެހޭތީ ގާނޫނަށް އިސްލާހު ހުށަހަޅަނީ

މަދަނީ އިޖުރާއަތުގެ ގާނޫނު އޮތްގޮތުން މަދަނީ އަދުލުގެ ނިޒާމުގެ ހުއްޓި، މައްސަލަތައް ކޯޓުތަކުގައި ފުނިޖެހެމުންދާތީ އެ ގާނޫނަށް އަވަހަށް އިސްލާހު ގެންނަން ރައްޔިތުންގެ މަޖިލީހަށް ހުށަހެޅުމަށްޓަކައި ޖުޑީޝަލް ސާވިސް ކޮމިޝަން (ޖޭއެސްސީ) އިން ބިލެއް ތައްޔާރުކޮށް، ބަންޑާރަ ނައިބުގެ އޮފީހަށް ފޮނުވައިފި އެވެ.

ޖޭއެސްސީން ބުނި ގޮތުގައި މަދަނީ އިޖުރާއަތުގެ ގާނޫނު ޑިސެމްބަރު، 2021 ގައި ތަސްދީގުކޮށް، އޭގެ ހަ މަސް ފަހުން 2022 ވަނަ އަހަރު އެ ގާނޫނަށް އަމަލުކުރަން ފެށުމާ އެކު ކޯޓުތަކުގައި މަދަނީ މައްސަލަތައް ތޮއްޖެހިފައިވާ ކަމަށެވެ. އަދި މައްސަލަތައް ލަސްވެ އަދި މައްސަލަތަކުގެ ހުކުމްތައް ތަންފީޒުނުވެ އަދި އެ ނިޒާމަށް ދުވަހަކު ވެސް ކުރިމަތި ނުވާވަރުގެ ދަތިތައް ކުރިމަތިވެފައިވާ ކަމަށް އެ ބަޔާނުގައިވެ އެވެ.

އެ ބަޔާނުގައިވާ ގޮތުން އޭގެ ސަބަބުން ބޭންކުތަކާއި ވިޔަފާރިތަކާއި އަދި އާއްމު ރައްޔިތުންނަށް ވެސް ވަނީ އަސަރުކޮށްފަ އެވެ. އަދި އެ މައްސަލަތަކަށް ހައްލެއް ހޯދެން އޮތީ ވަގުތުން އެ ގާނޫނަށް އިސްލާހުތަކެއް ގެނެސްގެން ކަމަށް ޖޭއެސްސީން ބުންޏެވެ.

އެހެންވެ، ޖޭއެސްސީގެ އިސްނެގުމުގެ މަތިން، މަދަނީ އިޖުރާއަތުގެ ގާނޫނަށް ގެންނަން ފެންނަ އިސްލާހުތައް ބަންޑާރަ ނައިބުގެ އޮފީހަށް ފޮނުވާފައިވާ ކަމަށް އެ ކޮމިޝަނުން ބުންޏެވެ.

މަދަނީ އިޖްރައާތުގެ ގާނޫނުގެ ސަބަބުން އެންމެ ބޮޑު ހުރަހެއް ކުރިމަތިވީ ހުކުމްތައް ތަންފީޒު ކުރުމަށެވެ. ކުރިން ފައިސާ ނުދައްކާ މީހުންނާ މެދު ހަރުކަށި ފިޔަވަޅުތަކެއް އަޅައިގެން ފައިސާ ހޯދުނަސް، މިހާރު ގާނޫނު އޮންނަ ގޮތުން ދަރަނިވެރިޔާގެ މުދާ ހިފެހެއްޓުން ފިޔަވައި އިތުރު ފިޔަވަޅެއް ނޭޅެ އެވެ. އަދި މުދަލެއް ނެތް ނަމަ އެޅޭނެ ފިޔަވަޅެއް ވެސް ނޯވެ އެވެ. އެ ކަންބޮޑުވުންތައް ގާނޫނީ ދާއިރާގެ ބޭފުޅުން ވެސް ގެންދެވީ ކުރިން ފާހަގަ ކުރަމުންނެވެ.