ދުޅަހެޔޮ އާދަތަކަށް މީހުން ހޭލުންތެރިކުރުވަން މާދަމާ ބޮޑު އެކްސްޕޯއެއް ފަށަނީ

ދުޅަހެޔޮ އާދަތަކަށް މީހުން ހޭލުންތެރިކުރުވަން ބޮޑު ހެލްތު އެކްސްޕޯއެއް މާދަމާ ބާއްވަން ތައްޔާރުވެއްޖެ އެވެ.

ހެލްތު މިނިސްޓްރީން ބުނީ ދެ ދުވަހަށް ކުރިއަށްގެންދާ އެކްސްޕޯ އޮންނާނީ ހުޅުމާލެ ސެންޓްރަލް ޕާކުގައި ކަމަށެވެ. އެއީ މާދަމާ ރޭގަނޑު 8-11 އަށް އަދި އަންނަ ހުކުރު ދުވަހުގެ ހަވީރު 4-6 އަދި ރޭގަނޑު 8-11 އަށެވެ.

އެކްސްޕޯގައި މާލެ ސަރަހައްދުގެ ހޮސްޕިޓަލްތަކާއި ކްލިނިކްތަކާއި ޖަމިއްޔާތަކާ އެކު 50 ސްޓޯލް ހުންނާނެ އެވެ.

މިނިސްޓްރީން ބުނި ގޮތުގައި ސްޓޯލްތަކުގައި ސިއްހީ ދާއިރާއިން ތައުލީމް ހާސިލްކުރަން ބޭނުންވާ މީހުންނަށް ހުރި ފުރުސަތުތަކާއި ޑޮކްޓަރަށް ދެއްކުމާއި ހެލްތު ސްކްރީނިން ހެދުން އަދި އެކި ބައްޔާ ގުޅޭ މައުލޫމާތާއި އިރުޝާދުތައް ދޭނެ އެވެ.

އޭގެ އިތުރުން ކުޑަކުދިންގެ ހެލްތު ޗެކަޕާއި ރަނގަޅު ކާނާ އާއި ހެދިބޮޑުވުމާ ގުޅޭ މައުލޫމާތު އަދި ވެކްސިންގެ މައުލޫމާތު ދޭނެ ކަމަށެވެ.

ބިދޭސީންގެ ހެލްތު ސްކްރީނިން އާއި ނަފްސާނީ ދުޅަހެޔޮކަމާ ގުޅޭ މައުލޫމާތު އަދި ސިއްހަތަށް ރަނގަޅު ކެއުންތައް ލިބޭނެ ސްޓޯލްތައް ހުންނާނެ ކަމަށް ވެސް މިނިސްޓްރީން ބުންޏެވެ.