މެޑިކަލް ވޭސްޓް ނައްތާލާ ފެސިލިޓީއެއް ބާރަށުގައި ގާއިމްކޮށްފި

ހއ. ބާރަށު ސިއްހީ މަރުކަޒުގައި މެޑިކަލް ވޭސްޓް ނައްތާލަން ހާއްސަ ފެސިލިޓީއެއް ހަދައިފި އެވެ.

މިއީ ރަށެއްގެ ސިއްހީ މަރުކަޒުގައި މެޑިކަލް ވޭސްޓް ނައްތާލަން ފެސިލިޓީއެއް ހެދި ފުރަތަމަ ފަހަރެވެ.

ބާރަށުގައި މި ފެސިލިޓީ ހެދީ ގްލޯބަލް އެންވަޔަރަމަންޓް ފެސިލިޓީ (ޖީއީއެފް)ގެ މާލީ އެހީ އާއި ޔޫއެންޑީޕީގެ އާއި އެންވަޔަރަމަންޓް މިނިސްޓްރީން ކުރިއަށް ގެންދާ އެލިމިނޭޓިން ޕާސިސްޓަންޓް އޯގަނިކް ޕޮލިއުޓަންޓްސް ތުރޫ ސައުންޑް މެނޭޖްމަންޓް އޮފް ކެމިކަލްސް (ޕޮޕްސް) މަޝްރޫއުގެ ދަށުންނެވެ.

އެންވަޔަރްމަންޓް މިނިސްޓްރީގައި މިދިޔަ ބުރާސްފަތި ދުވަހު ބޭއްވި ރަސްމިއްޔާތެއްގައި ވަނީ ބާރަށުގެ މެޑިކަލް ވޭސްޓް މެނޭޖުކުރާ ފެސިލިޓީ ހެލްތު މިނިސްޓްރީއާ ހަވާލު ކުރުމުގެ އެއްބަސްވުމުގައި ސޮއިކޮށްފަ އެވެ.

އެ އެއްބަސްވުމުގައި އެންވަޔަރްމަންޓް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ތޯރިގް އިބްރާހިމެވެ. އަދި ހެލްތު މިނިސްޓްރީގެ ފަރާތުން ސޮއި ކުރެއްވީ މިނިސްޓަރު އަބްދުﷲ ނާޒިމް އިބްރާހިމެވެ. އެ ރަސްމިއްޔާތުގައި ބާރަށު ދާއިރާގެ މެމްބަރު އިބްރާހިމް ޝުޖާއު ވެސް ބައިވެރިވެވަޑައިގަތެވެ.

އެންވަޔަރްމަންޓް މިނިސްޓްރީން ބުނީ ބާރަށު ސިއްހީ މަރުކަޒުގައި ހެދި އެ ފެސިލިޓީގައި މެޑިކަލް ވޭސްޓް ކުނި ހަރުދަނާކޮށް މެނޭޖު ކުރެވޭނެ ޓެކްނޮލޮޖީ ގާއިމްކޮށްފައިވާ ކަމަށެވެ. އަދި އެ ބާވަތުގެ ކުނި ނައްތާލާނީ ޖައްވަށް ބޭރުވާ ވިހަ މާއްދާތައް މަދުވާނެ ގޮތަށް، ތިމާވެއްޓާ ރައްޓެހި ގޮތަކަށް ކަމަށް މިނިސްޓްރީން ބުންޏެވެ.

"މިކަމުގެ ސަބަބުން ވެއްޓަށާއި ބާރަށުގައި ދިރިއުޅޭ ރައްޔިތުންގެ ސިއްހަތަށް ކުރިމަތިވެދާނެ ނޭދެވޭ އަސަރުތަކުން ރައްޔިތުން ރައްކާތެރި ކުރެވޭނެ އެވެ. ބާރަށުގައި ގާއިމު ކުރެވުނު ފެސިލިޓީއަކީ ސިއްހީ މަރުކަޒެއްގައި ސިއްހީ ކުނި މެނޭޖް ކުރުމަށް ދިވެހިރާއްޖޭގައި ގާއިމްކުރެވުނު ފުރަތަމަ ފެސިލިޓީ އެވެ،" އެ މިނިސްޓްރީން ނެރުނު ބަޔާނުގައިވެ އެވެ.

ބުރާސްފަތި ދުވަހު ބޭއްވި ރަސްމިއްޔާތުގައި ވަނީ ނެޝަނަލް ހެލްތު ލެބޯރެޓަރީގެ މަސައްކަތް ހަރުދަނާ ކުރުމަށް ހެވީމެޓަލްސް ޓެސްޓު ކުރެވޭ އައިސީޕީ އެމްއެސް މެޝިނެއް ވެސް ހެލްތު މިނިސްޓްރީއާ ހަވާލުކޮށް، އެކަމުގެ އެއްބަސްވުމުގައި ސޮއިކޮށްފަ އެވެ.

އެންވަޔަރްމަންޓް މިނިސްޓްރީން ބުނީ އެ މެޝިންގެ އެހީގައި ފެނާއި ފަސްގަނޑުގައި ހުންނަ ސެޑިމެންޓްސް އަދި އިންސާނުންގެ ލޭގައި ހުންނަ ހެވީ މެޓަލްސް (މާކިއުރީ، ކެޑްމިއަމް، ލެޑް) ކަހަލަ މާއްދާތައް ހުންނަ މިންވަރު ދެނެގަނެވޭނެ ކަމަށެވެ.

އިންޖީނުލީ އެއްގަމު އުޅަނދުތަކުގައި ބޭނުންކުރާ ލެޑްއެސިޑް ބެޓެރި އާއި ބައެއް ކަހަލަ އިލެކްޓްރޯނިކްސް އާލަތްތަކުގައި ލެޑް ފަދަ ހެވީ މެޓަލްސް އެކުލެވެ އެވެ. އަދި ފުލޮރިޒެންޓް ބޮތްކާއި ބައެއް ބާވަތްތަކުގެ ކޮސްމެޓިކްސްގައި މާކިއުރީ އެކުލެވެ އެވެ. ނަމަވެސް ކިތަންމެ ކުޑަ މިންވަރަކަށް ހުންނަ ހެވީ މެޓަލްސް ވެސް އެ މެޝިންގެ އެހީގައި ދެނެގަނެވޭނެ އެވެ.

ޖައްވު ތަޣައްޔަރުވުމުގެ ސަބަބުން އާންމު ސިއްހަތަށް ކުރާ ނޭދެވޭ އަސަރުތައް ދެނެގަތުމަށް ދިރާސާކުރުމަށް ބޭނުންވާ މައުލޫމާތު ވެސް އެ މެޝިންގެ އެހީގައި ހޯދޭނެ އެވެ.

ޕޮޕްސް މަޝްރޫއުގެ ދަށުން އައްޑޫގައި ނުރައްކާތެރި ކެމިކަލް ހިމެނޭ ކުނި ބެހެއްޓުމަށް އިންޓެރިމް ހެޒާޑަސް ކެމިކަލް ވޭސްޓް ސްޓޯރޭޖް ފެސިލިޓީއެއް ވެސް ގެންދަނީ ހަދަމުންނެވެ. އަދި ރ. ވަންދޫގައި ހެޒާޑަސް ކެމިކަލް އެންޑް ވޭސްޓް މެނޭޖްމަންޓް ސިސްޓަމެއް ގާއިމްކުރުމުގެ މަސައްކަތް ވެސް ގެންދަނީ ކުރަމުންނެވެ.