ޖެޓްތަކަށް ދޭ ހިދުމަތުގެ މަންފާ ދިވެހިންނަށް ލިބޭ ގޮތަށް ހަދަނީ

ޖެޓް ހޭންޑްލިން ވިޔަފާރީގެ އާމްދަނީ ދިވެހިންނަށް ލިބޭ ގޮތް ހެދުމަށް ފިޔަވަޅުތަކެއް އަޅަން ނިންމާފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން އިއްޔެ ވިދާޅުވެއްޖެ އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އަމީން ވިދާޅުވީ ޖެޓް ހޭންޑްލިންއަކީ ސަރުކާރު ހަވާލުވިއިރު ވެސް ހިނގަމުން އައި ވިޔަފާރިއަކަށް ވިޔަސް އެކަން ކުރަމުން އައީ ދިވެހިންނަށް މާ ބޮޑު މަންފާއެއް ލިބޭ ގޮތަށް ނޫން ކަމަށެވެ.

ދިވެއްސެއްގެ ނަންމަތީގައި ކުންފުންޏެއް ހަދައިގެން އޭގެ މަންފާ ހޯދަމުންދިޔައީ ބޭރުގެ ބައެއް ކަމަށާއި ދިވެހި މީހާއަށް ލިބެނީ ކުޑަ އުޖޫރައެއް ކަމަށް މިނިސްޓަރު ވިދާޅުވި އެވެ.

"ރާއްޖޭގެ ޓޫރިޒަމް އޮތް ގޮތުން ވަރަށް ގިނައިން ޕްރައިވެޓް ޖެޓް ރާއްޖެ އާދެ. އެއީ އޮންނަ ވިޔަފާރިއެއް. އެކަމަކު ރާއްޖޭގެ ޖެޓް ހޭންޑްލިންގައި މި އޮންނަ ނެޓްވޯކް ކޮންޓްރޯލް ކުރުމުގެ ސްޓްރެންތު ނެތީމަ ކަންނޭނގެ ކައިރި ބައެއް ގައުމުތަކުގެ ކުންފުނިތަކުންނާއި މީހުން، ބައެެއް ދިވެހިން ކުރިމަތީގައި ބަހައްޓާފައި ވަރަށް ކުޑަ އުޖޫރައެއް ލިބޭ ގޮތަށް، ހުރިހާ މަންފާއެއް ބޭރު މީހުންނަށް ލިބޭ ނިޒާމެއް ފެތުރިފައި އޮތީ،" އަމީން ވިދާޅުވި އެވެ.

މިނިސްޓަރު ވިދާޅުވި ގޮތުގައި ޖެޓް ހޭންޑްލިންގެ އިތުރުން ބޮޑެތި އެއާލައިންތަކުން ލިބޭ ޖީއެސްއޭ އާއި ޕީއެސްއޭ ވެސް ލިބެމުންދިޔައީ ބޭރުގެ ބަޔަކަށެވެ.

އެކަމަކު ރައީސް ޑރ. މުހައްމަދު މުއިއްޒުގެ ވިސްނުންފުޅު ހުރީ ދިވެހި ކުންފުނިތަކަށް އޭގެ މަންފާ ލިބޭ ގޮތަށް ބަދަލުކުރުމަށް ކަމަށް ކަމަށް އަމީން ވިދާޅުވި އެވެ.

އޭނާ ވިދާޅުވި ގޮތުގައި ދިވެހިންނަށް ފައިދާ ލިބޭ ގޮތަށް، އަންނަ އަހަރު ގަވާއިދުތަކަށް ބަދަލު ގެނެސް އާންމުކުރާނެ އެވެ.

"ސަރުކާރުން ބޭނުންވަނީ މިކަމުން މަންފާ ލިބެނީ 100 ޕަސެންޓް ދިވެހި ކުންފުނިތަކުގެ ގޮތުގައި ބޭއްވުމަށް،" އަމީން ވިދާޅުވި އެވެ.

އޭނާ ވިދާޅުވި ގޮތުގައި އޮޑިޓް ވެސް ކުރާ ގޮތަށް މި ގެންނަ ބަދަލާ އެކު ޔޮޓް ހޭންޑްލިންގެ މަސައްކަތުން ބޭރު ކުންފުނިތަކަށް ލިބޭ އާމްދަނީ ނިމުމަކަށް އަންނާނެ އެވެ.