ނޭމާ އަށް އަނެއްކާ ވެސް އަނިޔާވެއްޖެ

ރިޔާދު (ނޮވެމްބަރު 5) – އަނިޔާގައި އަހަރެއްހާ ދުވަސް ހޭދަކުރުމަށް ފަހު ބްރެޒިލް ފޯވާޑް ނޭމާ އެނބުރި އައިސް ކުޅުނު ދެ ވަނަ މެޗުގައި އަނިޔާވެއްޖެ އެވެ.

ސައޫދީ އަރަބިއްޔާގެ އަލް ހިލާލް އަށް ކުޅޭ ނޭމާ އަށް އަނިޔާވީ އޭއެފްސީ ޗެމްޕިއަންސް ލީގު އެލީޓްގެ ލީގު ބުރުގައި، އީރާން ލީގު ދެވަނަ ހޯދި އިސްތިގްލާލް އާ ވާދަކޮށް 3-0 އިން ރޭ ހިލާލް މޮޅުވި މެޗުގަ އެވެ. ހިލާލް މި މެޗު ކާމިޔާބު ކުރީ އަލެކްސެންޑަ މިޓްރޮވިޗްގެ ހެޓްރިކަކުންނެވެ.

ރޭގެ މެޗުގައި ނޭމާ ކުޅެން އެރީ 58 ވަނަ މިނިޓުގަ އެވެ. ނަމަވެސް 90 މިނިޓު ހަމަވާން ތިން ވަރަކަށް މިނިޓަށް ވެފައި ވަނިކޮށް ނޭމާ އަށް އަނިޔާ ވެގެން ވަނީ ބަދަލު ކުރަން ޖެހިފަ އެވެ. ނޭމާގެ ފަލަމަސްގަނޑަށް ލިބުނު މި އަނިޔާގެ ސީރިއަސްކަމާ މެދު އަދި ކްލަބުން އެއްޗެއް ނުބުނެ އެވެ.

އަނިޔާގެ މައްސަލައާ ހުރެ އަލް ހިލާލުން ސައުދީ ލީގުގައި ކުޅޭ ސްކޮޑުގައި ނޭމާ ހިމަނާފައެއް ނުވެ އެވެ. ނަމަވެސް ޗެމްޕިއަންސް ލީގު ސްކޮޑުން ވަނީ އޭނާ އަށް ފުރުސަތު ދީފަ އެވެ. އެގޮތުން އޭނާ ވަނީ އަނިޔާއިން ރަނގަޅު ވުމަށް ފަހު، މިދިޔަ މަހު ޔޫއޭއީގައި އެގައުމުގެ އަލް އައިންއާ ދެކޮޅަށް ކުޅުނު މެޗުގެ ފަހު 15 މިނިޓުގައި ކުޅެފަ އެވެ.

އޭއެފްސީ ޗެމްޕިއަންސް ލީގުގައި ވާދަކުރާ 12 ޓީމުގެ ލީގު ބުރުގައި، ހިލާލް މިހާތަނަށް ކުޅުނު ހަތަރު މެޗު ވެސް ވަނީ ކާމިޔާބު ކޮށްފަ އެވެ.

ހަމަ އެއާ އެކު ސައުދީ އަރަބިއްޔާގެ އަލް އަހްލީ ވެސް މިހާތަނަށް ކުޅުނު ހަތަރު މެޗު ވަނީ ކާމިޔާބު ކޮށްފަ އެވެ. އެޓީމުން ރޭ ވަނީ 5-1 އިން އިރާގުގެ އައް ޝުރުތާ (ޕޮލިސް ކްލަބް) ބަލިކޮށްފަ އެވެ. މި މެޗުގައި އަހްލީގެ ރޮބާޓޯ ފިރްމީނޯ ދެ ގޯލު ޖެހި އިރު، ރިޔާދު މަހްރޭޒް ވެސް ވަނީ ގޯލެއް ޖަހައިފަ އެވެ.

ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ކުޅޭ އައް ނަސްރު ވަނީ މިހާތަނަށް ކުޅުނު ތިން މެޗުގެ ތެރެއިން ދެ މެޗު ކާމިޔާބު ކޮށް، އެއް މެޗު އެއްވަރު ކޮށްގެން ހަތް ޕޮއިންޓް ހޯދައިފަ އެވެ. އެޓީމުގެ ހަތަރު ވަނަ މެޗުގައި މިރޭ އަލް އައިންއާ ދެކޮޅަށް ކުޅޭނެ އެވެ.