ތާލިބާނުގެ މަންދޫބާ ދިވެހި ސަފީރު ބައްދަލުކުރެއްވީ ހުއްދަ ނެތި، ފިޔަވަޅު އަޅައިފިން: މިނިސްޓްރީ

ރާއްޖެއިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ، އަފްޣާނިސްތާނުގެ މަންދޫބާ ބައްދަލުކުރެއްވީ ދިވެހި ސަރުކާރުގެ ހުއްދަ ނެތި ކަމަށާއި އެކަމާ ގުޅިގެން ފިޔަވަޅު އަޅާފައިވާ ކަމަށް ރާއްޖޭގެ ފޮރިން މިނިސްޓްރީން މިއަދު ބުނެފި އެވެ.

ތޯހާ ވަނީ، އަފްޣާނިސްތާނުން ޕާކިސްތާނަށް ހަމަޖައްސާފައިވާ ސަފީރު ސަރުދާރު އަހުމަދު ޝަކީބުއާ ޕާކިސްތާނުގެ ވެރިރަށް، އިސްލާމްއާބާދުގައި މިދިޔަ ހުކުރު ދުވަހު ބައްދަލުކުރައްވައިފަ އެވެ. އެއާ އެކު، ތާލިބާން ޖަމާއަތުން އަފްޣާނިސްތާނުގައި ހިންގާ ވެރިކަން ރާއްޖޭން ބަލައިގަތީ ތޯ ގިނަ ބަޔަކު ވަނީ ސުވާލު އުފައްދައިފަ އެވެ.

އެކަމާ ގުޅިގެން ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ތޯހާ، ދިވެހި ސަރުކާރުގެ ހުއްދަ ނުނަގައި އަފްޣާނިސްތާނުގެ މަންދޫބާ ބައްދަލުކުރެއްވުމުން އަޅަންޖެހޭ ފިޔަވަޅު އަޅާފައިވާ ކަމަށެވެ.

ނަމަވެސް އެއީ ކޮން ފިޔަވަޅެއް ކަމެއް ނުބުނެ އެވެ.

ފޮރިން މިނިސްޓްރީން ބުނީ ރާއްޖޭން ގައުމުތަކުގެ ސަރުކާރުތައް ބަލައިގަތުމުގައި ސުވާލު އުފެދޭ ހާލަތެއްގައި އަބަދު ވެސް ބަލަނީ އދ. އިން ކަނޑައަޅާފައިވާ މިންގަނޑުތަކާ އުސޫލުތަކަށް ކަމަށެވެ. އެ އުސޫލާ އެއްގޮތަށް، އދ. ގައި އަފްޣާނިސްތާނު ތަމްސީލުކުރާ ފަރާތަކީ، އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ވެސް ބަލައިގަންނަ ފަރާތް ކަމަށް ބުންޏެވެ.

އެ ގައުމުގެ ސަރުކާރުގެ އޮފިޝަލާ އެކު، ބޭއްވި ބައްދަލުވުމަށް ފަހު އެ އެމްބަސީން އެކްސްގައި ކުރި ޕޯސްޓުގައި ބުނީ މުސްލިމް ދެ ގައުމުގައި އޮތް ގުޅުމާއި ރާއްޖެއާ މެދު އޭޝިއާގެ ގައުމުތަކުގެ މެދުގައި އޮތް ވިޔަފާރީގެ ކަންކަން، އަފްޣާނިސްތާނު މެދުވެރިވެގެން ހަރުދަނާ ކުރުމާ ގުޅޭގޮތުން ދެ ބޭފުޅުން މަޝްވަރާ ކުރެއްވި ކަމަށެވެ.

އަފްޣާނިސްތާނުން ބޭނުންވަނީ ހުރިހާ ގައުމަކާ އެކު ބިނާކުރަނިވި ގުޅުމެއް ބާއްވަން ކަމަށާއި ސަރަހައްދު ގުޅުވައިދޭ ހަބަކަށް ހެދުމަށް އަމާޒުކޮށްގެން މަސައްކަތް ކުރާ ކަމަށް ވެސް ބުންޏެވެ.

އެމެރިކާ އާއި އިނގިރޭސި ސިފައިން 20 އަހަރު ވަންދެން އަފްޣާނިސްތާނު އަޅުވެތިކޮށް ތިބުމަށް ފަހު، އޮގަސްޓް 2021 ގައި އެ ގައުމުން ފޭބުމާ އެކު، ތާލިބާނުންގެ ހަނގުރާމަވެރިން ވަނީ، އެ ގައުމުގައި އޮތް ސަރުކާރު ވައްޓާލައި، ވެރިކަމަށް އަރައިފަ އެވެ.

ތާލިބާނުން އަފްޣާނިސްތާނުގެ ވެރިކަމާ ހަވާލުވިތާ ތިން އަހަރު ވެގެންދިޔައިރު ވެސް ދުނިޔޭގެ ގިނަ ގައުމަކުން އަދި ބައިނަލްއަގުވާމީ ޖަމާއަތަކުން ވެސް ތާލިބާނުންގެ ސަރުކާރު ގަބޫލެއް ނުކުރެ އެވެ.

ޕާކިސްތާނުގައި ހުންނަވާ ދިވެހި ސަފީރަކަށް ނ. ހޮޅުދޫ އުފަންވެލި، ތޯހާ މުހައްމަދު ހަމަޖެއްސެވުމުގެ ކުރިން އޭނާ ފުރަތަމަ ކަނޑައަޅަން ނިންމީ ސައޫދީ އަރަބިއްޔާގެ ސަފީރަކަށެވެ. ސައޫދީ ސަފީރަކަށް ތޯހާ އައްޔަން ކުރަން ފެންނަ ކަމަށް ރައްޔިތުންގެ މަޖިލިހުން ރުހުން ވެސް ދީފައި ވަނިކޮށް އޭނާ ޕާކިސްތާނަށް ބަދަލުކުރަން ދިވެހި ސަރުކާރުން ނިންމީ އެވެ. އެކަމަކު، އޭގެ ސަބަބެއް ނުބުނެ އެވެ.